جوعارى اۋديتورلىق پالاتا نازاربايەۆ زياتكەرلىك مەكتەپتەرىنە 2019-2023 جىلدارى بولىنگەن بيۋدجەت قاراجاتىنىڭ قالاي جۇمسالعانىن تەكسەردى. مەملەكەتتىك اۋديت قورىتىندىسى بويىنشا ءبىرقاتار زاڭبۇزۋشىلىق انىقتالعان، دەپ حابارلايدى Ulys.
جاپ باسپا ءسوز قىزمەتىنىڭ اقپاراتىنشا، ءتورت جىل ىشىندە نازاربايەۆ زياتكەرلىك مەكتەپتەرىنىڭ قىزمەتىنە بيۋدجەتتەن 250 ملرد تەڭگە بولىنگەن، سونىڭ ىشىندە 22 ملرد تەڭگەدەن استامى نزم-نىڭ وڭ تاجىريبەسىن باسقا مەكتەپتەرگە تاراتۋ ءۇشىن قارالعان. الايدا بۇگىنگى تاڭدا مەملەكەتتىك جوسپارلاۋ جۇيەسىندە نازاربايەۆ زياتكەرلىك مەكتەپتەرىنىڭ ءرولى ناقتى ايقىندالماي وتىر.
ماسەلەن، جالپى ءبىلىم بەرەتىن مەكتەپتەرگە نزم ازىرلەگەن وقۋلىقتاردى ەنگىزۋ كورسەتكىشى وتە تومەن. سالالىق مينيسترلىك ماقۇلداعان 3 مىڭنان استام وقۋلىقتىڭ نەبارى 67ء-سى نەمەسە 2 پايىزى عانا نازاربايەۆ زياتكەرلىك مەكتەپتەرىنىڭ ۇلەسىنە تيەسىلى. ياعني ۇيىمنىڭ ورتا ءبىلىم بەرۋ جۇيەسىن دامىتۋ الەۋەتى تولىق پايدالانىلماي وتىر.
جوعارى اۋديتورلىق پالاتانىڭ ءتوراعاسى ءاليحان سمايىلوۆ بۇل باعىتتاعى ناتيجەنىڭ بولىنەتىن قاراجاتقا سايكەس كەلمەيتىنىنە نازار اۋداردى.
«ۇلىتاۋ وبلىسىنىڭ بۇكىل بيۋدجەتىن قۇرايتىن قاراجات وسى بەس جىلدان از ۋاقىت ىشىندە نازاربايەۆ زياتكەرلىك مەكتەپتەرىنە بولىنگەن. ونىڭ ىشىندە 22 ملرد تەڭگەدەن استامى تاجىريبەنى تاراتۋعا قارالعان. ستاتيستيكانى قالاي قاراساق تا، وكىنىشكە قاراي، ايتارلىقتاي وزگەرىس جوق. ونىڭ ۇستىنە، بۇل ءتىپتى مەملەكەتتىك جوسپارلاۋ جۇيەسى اياسىندا دا قامتىلماعان»، — دەدى ءاليحان سمايىلوۆ.
اۋديت بارىسىندا نازاربايەۆ زياتكەرلىك مەكتەپتەرىندە شىن مانىندە وتپەگەن ءىس-شارالاردىڭ جوسپارلانعانى انىقتالدى. 2019-2023 جىلدارى ورىندالماعان شارالار كولەمى شامامەن 8 ملرد تەڭگەنى قۇراعان.
پايدالانىلماعان قاراجاتتى كەيىنگى جىلدارعا اۋىستىرۋ سالدارىنان بيۋدجەت قاراجاتى قالدىقتارىنىڭ ەداۋىر كولەمىنىڭ قالىپتاسۋىنا الىپ كەلدى. ماسەلەن، ءۇش جىل ىشىندە نزم 16،4 ملرد تەڭگەنى يگەرمەگەن، ال بانك شوتتارىندا جىل سايىن 27 ملرد تەڭگەدەن 55 ملرد تەڭگەگە دەيىن اقشا قالدىعى جيناقتالعان.
نزم وتكىزگەن ساتىپ الۋلار بويىنشا 10،5 ملرد تەڭگەگە زاڭبۇزۋشىلىقتار انىقتالدى. مىسالى، 1 ملرد تەڭگەدەن استام سوماعا ءبىر كوزدەن ساتىپ الۋ ءتاسىلىن زاڭسىز قولدانۋ، وتىنىمدەردى نەگىزسىز جىبەرۋ نەمەسە قابىلداماۋ جانە تاعى باسقا جاعدايلار ورىن العان. بۇدان باسقا، مەملەكەتتىك كىرىستەر كوميتەتىنىڭ دەرەكتەرى جانە بوگدە ۇيىمداردىڭ كوممەرسيالىق ۇسىنىستارى نەگىزىندە تاۋارلاردى جوعارى باعامەن ساتىپ الۋ فاكتىلەرى انىقتالدى.
جالپى مەملەكەتتىك اۋديت بارىسىندا:
- 274،4 ملن تەڭگەگە قارجىلىق زاڭبۇزۋشىلىقتار؛
- 8،3 ملرد تەڭگەگە قاراجاتتى ءتيىمسىز جوسپارلاۋ؛
- شامامەن 6 ملرد تەڭگەنى ءتيىمسىز پايدالانۋ؛
- 134 راسىمدىك بۇزۋشىلىق پەن 30 جۇيەلى كەمشىلىك انىقتالدى.
تەكسەرىس قورىتىندىسى بويىنشا 1 ماتەريال قۇقىق قورعاۋ ورگاندارىنا، اكىمشىلىك قۇقىقبۇزۋشىلىق بەلگىلەرى بار تاعى 10 فاكتىنىڭ ماتەريالدارى ۋاكىلەتتى ورگاندارعا جىبەرىلدى.
ءاليحان سمايىلوۆ نازاربايەۆ زياتكەرلىك مەكتەپتەرى بيۋدجەتتەن سۇراتىلعان بارلىق قاراجاتتى ناقتى ەسەپتەۋلەرمەن نەگىزدەۋى قاجەت ەكەنىن مالىمدەدى. ونىڭ ايتۋىنشا، نزم-عا قويىلاتىن تالاپتار بيۋدجەتتىك باعدارلامالاردىڭ اكىمشىلەرىمەن بىردەي بولۋى كەرەك.