اقتاۋدا «تازا جاعالاۋ» اۋقىمدى ەكواكسياسى ءوتتى. ەكواكسيانى ۇيىمداستىرۋشىلار جاعالاۋدى بولىكتەرگە ءبولىپ، ءارقايسىسىنا ۇيلەستىرۋشى تاعايىندادى. ناتيجەسىندە، جاعالاۋداعى ساۋلەتتىك مۇسىندەر رەتكە كەلتىرىلىپ، بەس شاقىرىمدىق جاعالاۋ ايماعى قوقىستان تازارتىلدى. دايۆەرلەر دە ەكواكسيادان قالىس قالمادى.
- تەرەڭدىگى شامامەن بەس مەتردەن كەيىن باستالادى، تەڭىز تۇبىندە شىنى جانە پلاستيك بوتەلكەلەر، سونداي-اق، مەتالل كونسەرۆىلەر ءجيى كەزدەسەدى. كاسپيي تەڭىزىنىڭ ءمولدىر سۋى تۇرمىستىق قالدىقتاردى الىستان انىق كورۋگە مۇمكىندىك بەرەدى. مۇنداي اكسيالار تۇراقتى تۇردە وتكىزىلىپ تۇرۋى كەرەك دەپ ويلايمىن، – دەيدى سۇڭگۋىر جانىبەك عازيزوۆ.
سونىمەن قاتار، سۇڭگۋىرلەر جاعاعا قۇرال-جابدىقتارىن قويدى. ولار تەڭىز ءتۇبىن جينالعان قوقىستان تازارتادى. قوقىستار اراسىندا پلاستيك، سومكەلەر جانە مەتالل بانكالار كوپ كەزدەسەدى. كوماندير لەيتەنانت، سۇڭگۋىر قىزمەتىنىڭ اعا نۇسقاۋشىسى سايران ابدىكارىموۆ قازاقستان رەسپۋبليكاسى اسكەري-تەڭىز كۇشتەرىندە 9 جىلدان استام قىزمەت ەتىپ كەلەدى. ول اسكەريلەردىڭ مۇنداي ارەكەتتەردى قولداۋعا ءارقاشان دايىن ەكەنىن اتاپ ءوتتى.
- ءۇش سۇڭگۋىر شامامەن 250 شارشى مەتر اۋماقتى ءبولىپ، ءارقايسىسى قوقىس جينادى. وتكەن جولى 10 سومكە جيناعان ەدىك، بۇل جولى – 12. مۇنداي شارالارعا ءارقاشان قۋانا قاتىسامىن، ويتكەنى تەڭىز تازا بولۋى كەرەك، – دەدى سۇڭگۋىر.
15 تامىزدا «تازا قازاقستان» اكسياسى اياسىندا اقتاۋ قالاسىنىڭ 19ا شاعىناۋدانىندا «تازا مەكتەپ» ەكواكسياسى ءوتىپ، وعان ءبىلىم بەرۋ مەكەمەلەرىنىڭ قىزمەتكەرلەرى مەن قالا جاستارى قاتىستى. اكسيا جاڭا وقۋ جىلىندا پايدالانۋعا بەرىلەتىن مەكتەپ عيماراتىنىڭ اينالاسىندا ءوتتى. ءدال وسى كۇنى وسى جىلى پايدالانۋعا بەرىلەتىن مۇنايلى اۋدانىنىڭ قىزىلتوبە اۋىلىنداعى تاعى ءبىر مەكتەپ ءوز اۋماعىندا سەنبىلىك ۇيىمداستىردى.
- جاڭا وقۋ جىلى قارساڭىندا ءبىز «تازا مەكتەپ» ەكواكسياسىنا قاتىستىق. مۇنداي ءىس-شارالار بالالار ءۇشىن ءقاۋىپسىز جانە جايلى وقۋ ورتاسىن جاساۋعا كومەكتەسەدى. ءبىلىم وشاقتارىنىڭ ماڭايىنداعى تازالىق پەن ءتارتىپ تەك سىرتقى كەلبەتتى جاقسارتۋعا عانا ەمەس، سونىمەن قاتار وقۋشىلاردىڭ قورشاعان ورتاعا دەگەن قۇرمەتىن ارتتىرۋعا دا سەپتىگىن تيگىزەدى، - دەيدى قىزىلتوبە اۋىلىنداعى №18 ورتا مەكتەپ ديرەكتورىنىڭ وقۋ ءىسى جونىندەگى ورىنباسارى سالتانات نۇرمامەدوۆا.
15 تامىزدا «تازا قازاقستان» اكسياسى اياسىندا اقتاۋ حالىقارالىق اۋەجايىنا اپاراتىن جول ۋچاسكەسىندە سەنبىلىك ءوتتى. وعان 50-گە جۋىق ادام قاتىسىپ، سانيتارلىق تازالاۋ جۇمىستارىنا ارنايى تەحنيكالار جۇمىلدىرىلدى.
-تابيعاتتى ايالاۋدىڭ، تازالىقتى ساقتاۋدىڭ ماڭىزدىلىعىن ادامداردىڭ بويىنا ءسىڭىرۋىمىز كەرەك. قورشاعان ورتاعا قامقورلىق كورسەتۋدى ورتاق ىسكە اينالدىرۋ ءۇشىن وسىنداي اكسيالاردى ءجيى وتكىزىپ، قاتىسۋشىلاردى كوبىرەك تارتۋ قاجەت، - دەيدى جاستار جەتەكشىسى باقتيار ماقساتوۆ.
ايتا كەتەيىك، 10 تامىزدا ماڭعىستاۋدا «تازا قازاقستان» اكسياسى اياسىندا اۋقىمدى سەنبىلىك ءوتتى. جاعالاۋدى، ساياباقتاردى، الاڭداردى، ءتىپتى تەڭىز ءتۇبىن تازالاۋعا 3 مىڭنان استام ادام شىعىپ، 100-گە جۋىق ارنايى تەحنيكا جۇمىلدىرىلدى. بارلىعى 300 توننا قوقىس جينالىپ، شىعارىلدى. سونداي-اق، اقتاۋ جانە جاڭاوزەن قالالارىنا مۇنايلى، ماڭعىستاۋ، ءتۇپقاراعان، بەينەۋ جانە قاراقيا اۋداندارى قوسىلدى.
سونىمەن قاتار، «تازا قازاقستان» ەكولوگيالىق اكسياسى اياسىندا تامىز ايىندا چەللەندج تۇرىندە «مەكتەپكە جول، تازالىققا نىق قادام!» اكسياسى وتۋدە. اتالمىش شارانىڭ ماقساتى – 2024-2025 وقۋ جىلىنا ءبىلىم بەرۋ ۇيىمدارىن اعىمداعى جوندەۋ، اباتتاندىرۋ، مەكتەپتەرگە ىرگەلەس جاتقان جولدارعا جول سحەمالارى مەن بەلگىلەر ورناتۋ، جارىقتاندىرۋدى قالپىنا كەلتىرۋ جانە تازالىق جۇمىستارىن كۇشەيتۋ. «مەكتەپكە جول، تازالىققا نىق قادام!» اتتى چەللەندج اقتاۋدان باستاۋ الىپ، قازىرگى ۋاقىتتا باسقا قالالار مەن اۋدانداردا ەستافەتا تۇرىندە جالعاسۋدا.
بۇعان قوسا، تامىز ايىنىڭ سوڭىنا دەيىن «ماڭعىستاۋمۇنايگاز» اق قىزمەتكەرلەرى كاسپيي تەڭىزىنىڭ جاعالاۋىندا ەكواكسيا وتكىزۋدى جوسپارلاپ وتىر.