10-شى باكۋ حالىقارالىق كىتاپ كورمەسى كەمەل توقايەۆ كىتابىنىڭ تۇساۋكەسەرىمەن اشىلدى، دەپ حابارلايدى Ulys قازاقستاننىڭ ازەربايجانداعى ەلشىلىگىنە سىلتەمە جاساپ.
باكۋدا كورنەكتى قازاق جازۋشىسى جانە قوعام قايراتكەرى كەمەل توقايەۆتىڭ ازەربايجان تىلىندە جارىق كورگەن «ەرەكشە تاپسىرما» اتتى كىتابىنىڭ تۇساۋكەسەرى ءوتتى.
كىتاپ تۇركى مادەنيەتى جانە مۇراسى قورىنىڭ ۇيىمداستىرۋىمەن باسىلىپ شىقتى. تۇساۋكەسەر 10-شى باكۋ حالىقارالىق كىتاپ كورمەسى اياسىندا ءوتتى.
ءىس-شاراعا قازاقستان رەسپۋبليكاسى پرەزيدەنتىنىڭ كەڭەسشىسى مالىك وتاربايەۆ، قازاقستاننىڭ ازەربايجانداعى ەلشىسى ءالىم بايەل، تۇركى مادەنيەتى جانە مۇراسى قورىنىڭ پرەزيدەنتى اقتوتى رايىمقۇلوۆا، پارلامەنت دەپۋتاتتارى، ازەربايجاننىڭ مەملەكەتتىك قۇرىلىمدارى مەن زيالى قاۋىمىنىڭ وكىلدەرى جانە ت.ب. قاتىستى.
اقتوتى رايىمقۇلوۆانىڭ ايتۋىنشا، تۇركى الەمىنىڭ كورنەكتى تۇلعالارىنىڭ شىعارماشىلىعىن ناسيحاتتاۋ – تۇركى مادەنيەتى جانە مۇراسى قورى قىزمەتىنىڭ باستى باعىتتارىنىڭ ءبىرى سانالادى. وسى تۇرعىدا قور «تۇركى الەمىنىڭ كورنەكتى تۇلعالارى»، «تۇركى الەمىنىڭ ادەبي ءىنجۋ-مارجاندارى»، «تۇركى الەمىنىڭ عىلىمي ءىنجۋ-مارجاندارى» سياقتى كىتاپ سەريالارىن شىعارۋدا.
«قازاقتىڭ كورنەكتى جازۋشىسى ءارى قوعام قايراتكەرى كەمەل توقايەۆتىڭ «تۇركى الەمىنىڭ ادەبي ءىنجۋ-مارجاندارى» سەرياسىنا جاتقىزىلعان «ەرەكشە تاپسىرما» كىتابى قوردىڭ كەزەكتى شىعارىلىمى بولدى. كەمەل توقايەۆ تۇركى مادەنيەتى مەن ءسوز ونەرىنىڭ دامۋىنا زور ۇلەس قوسقان ادام. ول جازۋشىلىق قىزمەتتەن بولەك، قازاقستاننىڭ ماڭىزدى مادەني جانە الەۋمەتتىك ماسەلەلەرىن جارىققا شىعارا وتىرىپ، جۋرناليستيكامەن دە اينالىستى»، - دەپ اتاپ ءوتتى اقتوتى رايىمقۇلوۆا.
مەملەكەت باسشىسىنىڭ كەڭەسشىسى مالىك وتاربايەۆ قاتىسۋشىلارعا قازاقستان پرەزيدەنتى قاسىم-جومارت توقايەۆتىڭ اتىنان قوشەمەت ءبىلدىرىپ، كەمەل توقايەۆتىڭ قازاق ادەبيەتىندەگى دەتەكتيۆتىك جانردىڭ نەگىزىن قالاعان جازۋشى ەكەنىن اتاپ ءوتتى.
«ونىڭ ءاربىر جۇمىسى مۇراعاتتىق دەرەكتەر نەگىزىندە جازىلدى. ول ءوز زامانىنىڭ رۋحىن كورسەتىپ، تاريحتا ۇمىتىلماس ءىز قالدىردى»، - دەدى كەڭەسشى.
مالىك وتاربايەۆتىڭ ايتۋىنشا، باكۋ تۇرعىندارى ءۇشىن شىعارمانىڭ ازەربايجان تىلىنە اۋدارىلىپ، تۇساۋكەسەرىنىڭ كىتاپ كورمەسىندە ءوتۋى ايرىقشا ماڭىزعا يە. اۆتوردىڭ قالامىنان شىققان ءار شىعارما بولاشاق ۇرپاققا مۇرا بولىپ قالاتىن دۇنيە.
ازەربايجاننىڭ حالىق جازۋشىسى انار رزايەۆ قازاقستانعا دەگەن سۇيىسپەنشىلىك ءبىرتۋار تۇلعا اباي تۋرالى ماقالا جازۋعا تۇرتكى بولعانىن جەتكىزدى. باۋىرلاس قازاق حالقىنا دەگەن ىقىلاسى ەرەكشە ەكەنىن اتاي وتىرىپ، جازۋشى كەمەل توقايەۆتىڭ شىعارماشىلىعىنا دا زور قۇرمەت ءبىلدىردى.
ازەربايجاننىڭ بەلگىلى جازۋشىسى چينگيز ابدۋللايەۆ شىعارمانىڭ ازەربايجان مەن قازاقستان حالىقتارى اراسىنداعى مادەني جانە ادەبي بايلانىستاردى ودان ءارى نىعايتۋعا ءوز ۇلەسىن قوساتىنىن، ءارى وقىرمان تاراپىنان ۇلكەن قىزىعۋشىلىققا يە بولاتىنىن اتاپ ءوتتى. چ. ابدۋللايەۆ دەتەكتيۆ جانرىندا جازاتىن قالامگەر رەتىندە كەمەل توقايەۆتىڭ كۇردەلى دە قىزىقتى تاعدىرىنا ايرىقشا تاڭ قالعانىن اتاپ ءوتتى.
ازەربايجان ۇلتتىق عىلىم اكادەمياسىنىڭ پرەزيدەنتى اكادەميك يسا گابيببەيلي كەمەل توقايەۆتىڭ كىتابىن ازەربايجان تىلىندە باسىپ شىعارۋ وقىرماندارعا قازاق ادەبيەتى قايراتكەرىنىڭ شىعارماشىلىعىمەن ءارى قاراي جاقىنىراق تانىسۋعا مۇمكىندىك بەرەتىنىنە توقتالدى.
ازەربايجانداعى اتاتۇرىك ورتالىعىنىڭ ديرەكتورى اكادەميك نيزامي دجافاروۆ تا كىتاپ تۋرالى ويلارىن ورتاعا سالدى. ول شىعارمادا كەڭەس داۋىرىندەگى فاشيزمگە قارسى كۇرەس تاريحى كەڭىنەن باياندالعانىنا نازار اۋدارادى.
ميللي ءماجىلىستىڭ قوعامدىق بىرلەستىكتەر مەن ءدىني ۇيىمدار جونىندەگى كوميتەتىنىڭ ءتوراعاسى فازيل مۇستافا كەمەل توقايەۆتىڭ شىعارماشىلىعى تۋرالى ايتا كەلە، وسىنداي ءىس-شارالاردى داستۇرگە اينالدىرۋدىڭ ماڭىزدى ەكەنىن اتاپ ءوتتى.
ەستەرىڭىزگە سالا كەتەر بولساق، 2023 جىلعى قىركۇيەكتە قازاقستاننىڭ ازەربايجانداعى ەلشىلىگىنىڭ ۇيىمداستىرۋىمەن كەمەل توقايەۆتىڭ 100-جىلدىعى جانە ازەربايجان ادەبيەتىنىڭ حح عاسىرداعى كلاسسيگى مير جالال پاشايەۆتىڭ 115-جىلدىعىنا ارنالعان «تۇركى ادەبيەتىنىڭ تارلاندارى» حالىقارالىق كونفەرەنسياسىندا كەمەل توقايەۆتىڭ ازەربايجان تىلىندەگى «تۇندە اتىلعان وق» اتتى پوۆەستەر جيناعىنىڭ تۇساۋكەسەرى وتكەن ەتىن. قوس مەملەكەت باسشىلارى قازاق-ازەربايجان قاتىناستارىنىڭ وداقتاستىق سيپاتىن ايرىقشا اتاي وتىرىپ، مادەني-گۋمانيتارلىق بايلانىستاردى ودان ءارى دامىتۋ قاجەتتىگىنە ەرەكشە ءمان بەرىپ وتىر.
پرەزەنتاسياعا قاتىسۋشىلار ك. توقايەۆ شىعارمالارىنىڭ جوعارى كوركەمدىلىگىنە دە نازار اۋداردى.
