«اۋىلدا دەنساۋلىق ساقتاۋدى جاڭعىرتۋ» ۇلتتىق جوباسى شەڭبەرىندە جەتىسۋ وبلىسىندا 59 مەديسينالىق نىسان سالۋ جوسپارلانسا، سونىڭ 11ء-ى پانفيلوۆ اۋدانىندا تۇرعىزىلادى، اتاپ ايتقاندا 9-ى بيىل پايدالانۋعا بەرىلەدى، 2-ەۋى – كەلەسى جىلعا وتپەلى جوبا. بۇل تۋرالى بۇگىن اۋدان تۇرعىندارىمەن بولعان كەزدەسۋ بارىسىندا وبلىس اكىمى بەيبىت يسابايەۆ ايتتى، - دەپ حابارلايدى جەتىسۋ وبلىسى اكىمىنىڭ باسپا ءسوز قىزمەتى.
قازىرگى تاڭدا بارلىق نىساندار بويىنشا مەردىگەر ۇيىمدار ايقىندالىپ، قۇرىلىس جۇمىستارى باستالدى.
- جىل سوڭىنا دەيىن قىرىققۇدىق، ءالتىۇي، المالى، تۇرپان، اقجازىق، قورعاس، سۇپتاي، سارىتوبە، اققۇدىق اۋىلدارىندا 9 نىساندى قولدانىسقا بەرەمىز، سادىر، ديحان-قايرات اۋىلىنداعى قالعان 2 نىساندا قۇرىلىس جۇمىستارى كەلەسى جىلى جالعاسادى، - دەدى ب. يسابايەۆ.
جيىندا ايتىلعانداي، جەرگىلىكتى بيۋدجەت ەسەبىنەن بىلتىر اقكەنت جانە اقارال اۋىلدارىندا بلوكتى-مودۋلدى مەديسينالىق پۋنكتتەر، سونداي-اق جاركەنت قالاسىندا جەدەل جانە شۇعىل كومەك ستانسياسى ورناتىلسا، وسى جىلى قاراشانىڭ سوڭىنا دەيىن قىزىلجيدە، كەرىماعاش اۋىلدارىندا وسىنداي تاعى ەكى مەديسينالىق پۋنكت ورناتىلىپ، قولدانىسقا بەرىلەدى.
سونداي-اق بيىل شىلدەدە جاركەنت قالاسىنداعى كوپسالالى اۋدانارالىق اۋرۋحانانىڭ كۇندىزگى ستاسيونارىنىڭ كۇردەلى جوندەۋ جۇمىستارى اياقتالدى. وسى ايدىڭ سوڭىندا شەجىن اۋىلىندا فەلدشەرلىك-اكۋشەرلىك پۋنكت پايدالانۋعا بەرىلەدى. اۋليەاعاش، نۇركەنت جانە ءالتىۇي اۋىلدارىنا 3 سانيتارلىق اۆتوكولىك ساتىپ الىندى. ال جىلدىڭ سوڭىنا دەيىن اۋداننىڭ ورتالىق اۋرۋحاناسى مەديسينالىق قۇرال-جابدىقتارمەن قامتاماسىز ەتىلەدى.
سونىمەن قاتار «اۋىل – ەل بەسىگى» باعدارلاماسى اياسىندا نادەك اۋىلىندا ءبىر اۋىسىمدا 25 ادام قابىلدايتىن دارىگەرلىك امبۋلاتوريا سالىنىپ جاتىر، نىسان 2025 جىلى پايدالانۋعا بەرىلەدى.
