سىبايلاس جەمقورلىققا قارسى ءىس-قيمىل اگەنتتىگى جارتىجىلدىعىنداعى جۇمىسىنىڭ قورىتىندىسىن شىعاردى، دەپ حابارلايدى Ulys.
القا جۇمىسىنا پرەزيدەنت اكىمشىلىگىنىڭ، باس پروكۋراتۋرانىڭ وكىلدەرى، قوعامدىق كەڭەس مۇشەلەرى، سونداي-اق اگەنتتىكتىڭ جانە ونىڭ اۋماقتىق بولىمشەلەرىنىڭ باسشىلىق جانە جەكە قۇرامى قاتىستى.
اگەنتتىك ءتوراعاسى اسحات جۇماعالي ءوز بايانداماسىندا سىبايلاس جەمقورلىققا قارسى ساياسات تۇجىرىمداماسىنىڭ ىسكە اسىرىلۋى، ازاماتتاردىڭ ءومىر ءسۇرۋ ساپاسىن جاقسارتۋعا جانە ەلدى دامىتۋعا باعىتتالعان قابىلدانىپ جاتقان شارالار، سونداي-اق مەملەكەت باسشىسىنىڭ ءبىرقاتار تاپسىرمالارىنىڭ ورىندالۋى تۋرالى حاباردار ەتتى.
سىبايلاس جەمقورلىققا قارسى قىزمەتتىڭ الدىن الۋ جۇمىستارى اياسىندا اعىمداعى جىلى 113 تالداۋ مەن مونيتورينگ جۇرگىزىلدى.
ءبىلىم، عىلىم جانە سپورت سالاسىندا ماڭىزدى تالداۋلار اياقتالدى.
بيۋدجەتتىك پروسەستەردى اۆتوماتتاندىرۋدىڭ جانە دەرەكتەر بازاسىن ينتەگراسيالاۋدىڭ بولماۋىنان تۋىنداعان بيۋدجەت قاراجاتىن جوسپارلاۋ جانە يگەرۋ كەزەڭدەرىندەگى جۇيەلىك تاۋەكەلدەر ءبىلىم بەرۋ سالاسىندا انىقتالدى.
بۇگىنگى كۇنى قابىلدانىپ جاتقان شارالارمەن قوسارلانعان قارجىلاندىرۋ، «جوق جاندارعا» تولەمدەر، ۇستەمەاقىلار مەن تىركەۋلەردى اسىرا باعالاۋ فاكتىلەرى الىنىپ تاستالادى.
عىلىم سالاسىنا جۇرگىزىلگەن تالداۋ عىلىمي جوبالاردى ىرىكتەۋدىڭ اشىقتىعىنا، ولاردى ىسكە اسىرۋدىڭ فورمالدىلىعىنا، ناتيجەلەر ءۇشىن جاۋاپكەرشىلىكتىڭ بولماۋىنا، زەرتتەۋ قورىتىندىلارىنىڭ تومەن سۇرانىسىنا بايلانىستى ەلەۋلى تاۋەكەلدەردى ايقىندادى.
جوبالاردىڭ 90%-ى بەلگىلەنگەن ماقساتتارعا جەتە المايدى، ال زەرتتەۋلەردىڭ 70%-ى پراكتيكالىق ماڭىزى جوق ماقالالار مەن كىتاپتار جازۋمەن اياقتالادى.
«جوعارى جەتىستىكتەر سپورتى» مەن «بۇقارالىق سپورت» اراسىنداعى قارجىلاندىرۋ تەڭگەرىمسىزدىگى، سونداي-اق ونىڭ اشىقتىعى سپورت سالاسىنداعى تەرىس پايدالانۋ ءۇشىن ەلەۋلى تاۋەكەلدەردى تۋدىردى.
اگەنتتىك قارجىلاندىرۋدىڭ اشىقتىعىن، مەملەكەتتىك قاراجاتتىڭ ءتيىمسىز جۇمسالۋىن، ءونىم بەرۋشىلەردىڭ ۇلەستەستىگىن، ساتىپ الۋ باعاسىن كوتەرۋدى بەلگىلەدى.
بارلىق كورسەتىلگەن تالداۋلار بويىنشا ورىندالۋى پرەزيدەنت اكىمشىلىگىنىڭ باقىلاۋىنداعىتاۋەكەلدەردى جويۋ تۋرالى جول كارتالارى ازىرلەندى.
دارى-دارمەكتەرمەن ساپالى قامتاماسىز ەتۋ ماسەلەسىنىڭ وزەكتىلىگىنە بايلانىستى «سك-فارماسيادا» تالداۋ جۇرگىزىلدى.
كومپانيادا انىقتالعانداي، ساتىپ الۋ جۇيەلەرى ءتيىمسىز قۇرىلعان، قاجەتسىز «توسەمدەر» جاسالعان، كوتەرمە جەتكىزۋشىلەردىڭ كارتەلدىك كەلىسىمى بار جانە ولاردىڭ قىزمەتىنە ءتيىمدى باقىلاۋ جوق.
اگەنتتىك جۇمىسىندا جەمقورلىققا قارسى مادەنيەتتى قالىپتاستىرۋعا جانە پاراساتتىلىق قۇندىلىقتارىن ناسيحاتتاۋعا ەرەكشە كوڭىل بولىنەدى.
بيزنەستى قورعاۋ شەڭبەرىندە سىبايلاس جەمقورلىققا قارسى قىزمەت «بيزنەسكە جول» جوباسىن ىسكە اسىرۋدى جالعاستىرۋدا.
اعىمداعى جىلى 84 پروبلەمالىق كەيس شەشىلدى، 9،5 مىڭعا جۋىق كاسىپكەردىڭ قۇقىقتارى قورعالدى.
مىسالى، تۇركىستان وبلىسىندا فەرمەرلەرگە سۋارمالى سۋدى قايتا ساتقان دەلدالداردىڭ قىزمەتى توقتاتىلدى.
ءبىزدىڭ باستامامىز بويىنشا سۋ جەتكىزۋشىمەن تىكەلەي شارتتار جاسالدى، بۇل اۋىل تۇرعىندارى ءۇشىن باعانى 2 ەسەگە تومەندەتتى.
سىبايلاس جەمقورلىققا قارسى قىزمەتتىڭ وڭىرلىك بولىمشەلەرى اعىمداعى جىلى پروبلەمالىق تۇرعىن ءۇي جانە الەۋمەتتىك وبەكتىلەردى سۇيەمەلدەۋدى جالعاستىردى.
مونيتورينگتە 156 جوبا بار، ولاردىڭ 40-ى اياقتالدى.
ماسەلەن، اگەنتتىكتىڭ باقىلاۋىمەن اعىمداعى جىلى 9 مەكتەپ سالىندى، ەلىمىزدىڭ 14 اۋىلىندا سۋمەن جابدىقتاۋ ىسكە قوسىلدى.
سىبايلاس جەمقورلىقتىڭ الدىن الۋمەن ءبىر مەزگىلدە جازانىڭ بۇلتارتپاۋشىلىق قاعيداتىن قامتاماسىز ەتۋگە ۇلكەن كوڭىل بولىنەدى.
جىل باسىنان بەرى 876 قىلمىستىق قۇقىق بۇزۋشىلىق تىركەلدى.
ونىڭ ەداۋىر بولىگى پاراقورلىق، جىمقىرۋ جانە لاۋازىمدىق وكىلەتتىكتەردى تەرىس پايدالانۋ بولىپ تابىلادى.
592 ادام اشكەرەلەندى، ونىڭ 107ء-سى ءارتۇرلى دەڭگەيدەگى باسشىلار. 329 ادام سوتتالدى.
سونىمەن قاتار، اگەنتتىك قىلمىستىق توپتاردى، جوعارى لاۋازىمدى تۇلعالاردىڭ قاتىسۋىمەن تۇراقتى سحەمالاردى اشكەرەلەۋگە، جۇيەلى جەمقورلىقتى انىقتاۋعا بايلانىستى ساندىق ەمەس، ساپالىق كورسەتكىشتەرگە باعدارلانعان.
بۇزىلعان قۇقىقتار مەن الەۋمەتتىك ادىلەتتىلىكتى قالپىنا كەلتىرۋدىڭ ماڭىزدى قۇرامداس بولىگى زالالدى وتەۋ جانە اكتيۆتەردى قايتارۋ بولىپ تابىلادى.
اعىمداعى جىلى اياقتالعان ىستەر بويىنشا 195 ملرد تەڭگە وتەلدى.
ال 2،5 جىل ىشىندە قازاقستان حالقىنا 1،07 ترلن تەڭگە قايتارىلدى.
اگەنتتىك حالىقارالىق قۇقىق قورعاۋ جەلىلەرىمەن – بۇۇ جانىنداعى GlobE، ەگمونت، CARIN جانە ARIN توبىمەن بەلسەندى ىنتىماقتاستىق قۇرىلدى، بۇل شەتەلدىك سەرىكتەستەرمەن اقپارات الماسۋدى ايتارلىقتاي جەدەلدەتەدى جانە جەڭىلدەتەدى.
بۇگىنگى تاڭدا اگەنتتىك جەمقورلىققا قارسى ۆەدومستۆولارمەن 13 مەموراندۋم جاساپ، ونىڭ تورتەۋىنە بيىل قول قويىلدى.
ولار ازەربايجان، گونكونگ، قاتار جانە رەسەي.
سونداي-اق، القا وتىرىسىندا ءتۇرلى سالالارداعى جەمقورلىققا قارسى ءىس-قيمىل، سيفرلىق قۇرالداردى ەنگىزۋ، جوسپارلانعان زاڭنامالىق وزگەرىستەر، قىلمىستىق پروسەستە ادام قۇقىقتارىنىڭ زاڭدىلىعىن جانە قورعالۋىن قامتاماسىز ەتۋ ماسەلەلەرى تالقىلاندى.
تالقىلاۋ بارىسىندا پىكىر الماسىپ، قابىلدانىپ جاتقان جەمقورلىققا قارسى شارالاردى جەتىلدىرۋ بويىنشا ءبىرقاتار ۇسىنىستار ايتىلدى.
قورىتىندىلاي كەلە، اسحات جۇماعالي اگەنتتىكتىڭ جەمقورلىققا قارسى ساياساتتى ساپالى ىسكە اسىرۋ جونىندەگى جۇمىسىن جالعاستىراتىنىن اتاپ ءوتتى، ونىڭ نەگىزگى باعىتتارى جەمقورلىققا قارسى ىمىراسىز كۇرەس، ونىڭ العىشارتتارىن جويۋ، جازانىڭ بۇلتارتپاستىعىن قامتاماسىز ەتۋ، زاڭسىز شىعارىلعان اكتيۆتەردى قايتارۋ جانە بيزنەستى جەمقورلىقتان قورعاۋ بولىپ قالا بەرەدى.
ۆەدومستۆو باسشىسى مەملەكەت باسشىسىنىڭ ازاماتتارىمىزدىڭ ءال-اۋقاتىن ارتتىرۋعا جانە ەلدىڭ الەۋمەتتىك-ەكونوميكالىق دامۋىنا باعىتتالعان تاپسىرمالارىنىڭ مۇلتىكسىز ورىندالۋىن قامتاماسىز ەتۋ تۋرالى ايتتى.
اگەنتتىكتىڭ قۇرىلىمدىق جانە اۋماقتىق بولىمشەلەرىنىڭ باسشىلارىنا ءتيىستى تاپسىرمالار بەرىلدى.