مەركە-شۋ-بۋرىلبايتال تاسجولىندا بولعان جول اپاتىنان التى ادام، ونىڭ ىشىندە ەكى پاترۋل قىزمەتكەرى قازا تاپتى، دەپ حابارلايدى Ulys.
جول-كولىك وقيعاسى تۋرالى اقپارات جانە قايعىلى وقيعا ورنىنان كادرلار الەۋمەتتىك جەلىدە جاريالاندى. كولىكتەر مەركە-شۋ-بۋرىلبايتال تاسجولىندا سوقتىعىسقانى حابارلاندى.
پوليسيا دەپارتامەنتىنىڭ باسپا ءسوز قىزمەتى اپات 17 تامىزدا ساعات 01:00 شاماسىندا، مەركە-شۋ - بۋرىلبايتال رەسپۋبليكالىق ماڭىزى بار اۆتوجولىنىڭ 40-شاقىرىمىندا بولعان.
«Toyota Alphard كولىگىنىڭ جۇرگىزۋشىسى قارسى جولاققا شىعىپ، Skoda Octavia پاترۋلدىك پوليسياسىنىڭ كولىگىمەن سوقتىعىسقان. سالدارىنان قىزمەتتىك كولىكتە بولعان جانە جول قاۋىپسىزدىگىن قامتاماسىز ەتەتىن تراسسادا پاترۋلدەۋ جۇرگىزگەن ەكى پاترۋلدىك پوليسيا وقيعا ورنىندا قازا تاپتى. قازا بولعان پوليسيا قىزمەتكەرلەرىنىڭ ءبىرى 11 بالا تاربيەلەپ وتىرعان كوپ بالالى اكە بولاتىن. Toyota Alphard كولىگىندە 8 جولاۋشى بولعان. ولاردىڭ تورتەۋى سول جەردە قايتىس بولدى، ال جۇرگىزۋشى ءۇش جولاۋشىمەن بىرگە ءارتۇرلى دارەجەدەگى جاراقاتپەن ورتالىق اۋداندىق اۋرۋحاناعا جاتقىزىلدى»، - دەپ حابارلادى پوليسيا.
وسى فاكتى بويىنشا قىلمىستىق كودەكستىڭ 345-بابى 4-بولىگى «ولىمگە اكەپ سوقتىرعان جول قوزعالىسى ەرەجەلەرىن بۇزۋ» بويىنشا سوتقا دەيىنگى تەرگەۋ باستالدى. تەرگەۋ شارالارى جۇرگىزىلۋدە.