بيىل ينتەرنەتتە ۇلتتىق الاۋىزدىق پەن سەپاراتيزمدى قوزدىرعانى ءۇشىن 6 قىلمىستىق ءىس قوزعالدى. بۇل تۋرالى ءىىم حابارلادى.
ينتەرنەت كەڭىستىگى مەن كوممۋنيكاسيالىق رەسۋرستاردىڭ (الەۋمەتتىك جەلىلەر، چات-رۋلەتكا، مەسسەندجەرلەر) دامۋىنا بايلانىستى ءبىزدىڭ ازاماتتارىمىز ونلاين-اڭگىمەلەسۋ بارىسىندا (ونىڭ ىشىندە شەتەلدىك پايدالانۋشىلارمەن) قازاقستاندىق زاڭنامانىڭ تالاپتارىن بۇزعان جاعدايلار تۋىندايدى. اتاپ ايتقاندا، ازاماتتاردىڭ ۇلتتىق، ناسىلدىك جانە ءدىني سەزىمدەرىن قوزعايتىن سەپاراتيستىك، ەكسترەميستىك سيپاتتاعى مالىمدەمەلەرگە جول بەرىلەدى. كورسەتىلگەن قۇقىق بۇزۋشىلىقتار ءۇشىن ق ر قىلمىستىق كودەكسىندە قىلمىستىق جاۋاپتىلىق شارالارى كوزدەلگەن. ماسەلەن، الەۋمەتتىك، ۇلتتىق، رۋلىق، ناسىلدىك، تاپتىق نەمەسە ءدىني الاۋىزدىقتى قوزدىرعانى ءۇشىن (ق ر قك 174-بابى) 2 مىڭنان 7 مىڭ اەك (7 ملن تەڭگەدەن 26 ملن تەڭگەگە دەيىن) مولشەرىندە ايىپپۇل نە 2 جىلدان 7 جىلعا دەيىنگى مەرزىمگە باس بوستاندىعىن شەكتەۋ نە باس بوستاندىعىنان ايىرۋ تۇرىندەگى جاۋاپكەرشىلىك كوزدەلگەن.
سەپاراتيستىك قىزمەت (ق ر قك 180-بابى) 1 مىڭنان 5 مىڭ اەك (3،5 ملن.تەڭگەدەن 18،5 ملن. تەڭگەگە دەيىن) مولشەرىندە ايىپپۇل سالۋعا نە 7 جىلعا دەيىنگى مەرزىمگە باس بوستاندىعىن شەكتەۋگە نە سول مەرزىمگە باس بوستاندىعىنان ايىرۋعا جازالانادى.
جىلدىڭ باسىنان باستاپ ينتەرنەت كەڭىستىگىنە مونيتورينگ جۇرگىزۋ بارىسىندا 12 بەينەروليك انىقتالدى، وندا شەتەلدىك پايدالانۋشىلار قازاقستاندىقتاردى ۇلتتىق الاۋىزدىق پەن سەپاراتيزمنىڭ تۇتانۋ بەلگىلەرى بار مالىمدەمەلەرگە يتەرمەلەيدى.
6 فاكتى بويىنشا 6 قىلمىستىق ءىس قوزعالدى. تاعى 6 فاكت بويىنشا قاتىسۋشىلارمەن قىلمىستىق-قۇقىقتىق ىقپال ەتۋ شارالارىن تۇسىندىرۋمەن پروفيلاكتيكالىق اڭگىمەلەر وتكىزىلدى.
وسىعان بايلانىستى، ءىىم ازاماتتاردى ۇلتتىق جانە قوعامدىق قاۋىپسىزدىككە قول سۇعۋشىلاردىڭ سوزدەرىن بولدىرماۋ بولىگىندە ق ر زاڭناماسىن قاتاڭ ساقتاۋعا شاقىرادى.