«بالا كۇنىندە كىتاپ وقىماعاندار كىتاپ وقىعاندارعا قىزمەت ەتەدى» دەپ كەلەتىن ءتامسىل بار. 100 پايىز ءابسوليۋتتى شىندىق بولماسا دا، جانى بار ءسوز. مۇنىڭ عالامدىق ماسشتابپەن «كىتاپ وقىماعان ۇلت كىتاپ وقيتىن ۇلتقا كىرىپتار بولادى» دەپ قولدانۋعا دا بولادى. مەملەكەتتىڭ جاس بۋىن اراسىندا كىتاپ وقۋدى ترەندكە اينالدىرۋ ءۇشىن قولعا العان شارالارىن وسىنداي نيەتتەن تۋعان ستراتەگيالىق قادام دەپ باعالاۋعا بولادى.
قازاقستاندا 20 ملن ادام تۇرادى دەسەك، ەلدەگى كىتاپتىڭ قورى ءار ادامعا 3،5 كىتاپتان كەلەدى ەكەن. ويتكەنى رەسپۋبليكا اۋماعىنداعى 11 مىڭنان استام كىتاپحانادا 72 ميلليوننان استام كىتاپ بار.
كەيىنگى ەكى جىلدا ەلەكتروندى كىتاپحانا ارقىلى اقپارات ىزدەپ، ءبىلىمىن جەتىلدىرەتىندەردىڭ سانى 3 ميلليوننان 5 ميلليونعا دەيىن وسكەن ەكەن. بۇل تۇرعىدان العاندا قازاقستان الەمدە ەلەكتروندى كىتاپ قىزمەتىن ۇسىنىپ وتىرعان 110 ەلدىڭ ءبىرى دەگەن ءسوز.
كەيىنگى 10 جىلدا بيۋدجەت ەسەبىنەن، ياعني، مەملەكەتتىك تاپسىرىس بويىنشا 2501 كىتاپ باسىلىپ شىققان. بۇل كىتاپتاردىڭ تارالىم اۋقىمى 7،4 ملن داناعا جەتكەن. ياعني، قازاق دالاسىندا كىتاپ العاش كەلگەن زاماننان بەرى جيناقتالعان 73 ملن كىتاپتىڭ 10 پايىزى كەيىنگى ون جىلدا، بيۋدجەت ەسەبىنەن باسىلىپ شىققان.
استانادا جاڭا توقسان باستالعالى جالپى ءبىلىم بەرەتىن مەكتەپتەردە «8 مينۋتتىق وقۋ» دەپ اتالاتىن جاڭا جوبا قولعا الىندى. بالالار ءبىرىنشى ساباقتىڭ الدىندا كۇندەلىكتى 8 مينۋت ۋاقىتىن كىتاپ وقۋعا ارنايدى. 2 مينۋت ۇزىلىستەن سوڭ ساباقتارىنا كىرىسەدى. جوبا ەرەجەسىنە سايكەس، كىتاپ قاعاز فورماتتا بولۋى كەرەك.
كىتاپ شىعارۋ باردا ونى حالىقتىڭ يگىلىگىنە جاراتا ءبىلۋ بار. مەملەكەت بۇل مىندەتتى بۇرىنعىداي كىتاپحانالارعا عانا ارتىپ قويماي، ءبىلىم بەرۋ مەكەمەلەرىن، اكىمشىلىك رەسۋرستاردى دا وسى ىسكە كىرىكتىرىپ جاتىر. مىسالى، بىلتىر استانادا كىتاپ وقۋعا باۋليتىن جوبا قولعا الىندى. ناقتى ايتساق، ساباق اراسىنداعى ۇزىلىستەردىڭ ءبىرى كىتاپ وقۋعا ارنالعان. ءتىپتى ول ءۇشىن ارنايى سازدى قوڭىراۋ بەلگىسى دە ورناتىلعان. وسىلايشا بالالار مەكتەپتەگى ءار كۇننىڭ 8 مينۋتىن كىتاپ وقۋعا ارناپ ءجۇر.
ماماندار 8 مينۋتتىق ءۇزىلىس ارقىلى-اق وقۋشىلارعا ءبىر جىلدا 10 كىتاپ وقۋىنا مۇمكىندىك جاساۋعا بولاتىنىن ەسەپتەپتى.
بۇل ماسەلەنى پرەزيدەنت قاسىم-جومارت توقايەۆ تا ۇنەمى نازارىندا ۇستاپ كەلەدى. ۇلتتىق قۇرىلتاي جيىنىندا ءتىپتى ۇلتتىق كىتاپ كۇنىن بەلگىلەۋدى ۇسىندى دا.
«كوپتەگەن مەملەكەت ۇلتتىق كىتاپ كۇنىن اتاپ وتەدى. ءبورىحان نۇرمۇحامەدوۆ، ايدوس سارىم، دانيار اشىمبايەۆ باستاعان قۇرىلتاي مۇشەلەرى وسىنداي باستاما كوتەردى. مەن ولاردىڭ ۇلتتىق كىتاپ كۇنىن بەلگىلەۋ تۋرالى ۇسىنىسىن قولدايمىن. ءبىراق ونى مازمۇندى ەتىپ وتكىزۋ قاجەت. مىسالى، ءتۇرلى ءىس-شارالار ۇيىمداستىرىپ، ارنايى جارمەڭكەلەر وتكىزۋ قاجەت. شىن مانىندە، وزىق ويلى ۇلت بولۋدىڭ ەڭ توتە جولى – كىتاپ وقۋ. سوندىقتان كىتاپ وقۋ مادەنيەتىن قوعامدا بارىنشا ورنىقتىرۋىمىز كەرەك»، - دەگەن دەدى مەملەكەت باسشىسى اتىراۋدا.
وسىلايشا 23 ءساۋىر ۇلتتىق كىتاپ كۇنى بولىپ بەكىتىلدى. بيىل 16 شىلدەدە وسى تۋرالى رەسمي قۇجات كۇشىنە ەندى.
