ءىىم ۇيىمداسقان قىلمىسقا قارسى كۇرەس دەپارتامەنتى قىلمىستىق توپتاردىڭ ارەكەتىنە توسقاۋىل قويۋعا باعىتتالعان ءىس-شارالار كەشەنىن جۇرگىزىپ كەلە، دەپ حابارلايدى Polisia.kz سايتىنا سىلتەمە جاساپ.
ءىىم مالىمەتىنشە، سوڭعى ەكى جىلدا 140-تان اسا وسىنداي توپتاردىڭ قىزمەتى توقتاتىلعان. كريميناليتەتتىڭ 550-دەن اسا وكىلى جاۋاپقا تارتىلعان.
"اسا ءقاۋىپتى قىلمىستىق توپتاردى، ونىڭ ىشىندە "قاڭتار وقيعاسى" كەزىندە جاپپاي تارتىپسىزدىككە قاتىسقانداردى قۇرىقتاۋ بويىنشا بەلسەندى كەزەڭ اياقتالىپ جاتىر. بيىلعى تامىزدا ۇقك جانە باس پروكۋراتۋرامەن بىرلەسىپ، الماتى جانە شىمكەنت قالالارىندا ءبىر ۋاقىتتا "ديكيي ارماننىڭ" ۇيىمداسقان قىلمىستىق توبىنىڭ 15 ىقتيمال مۇشەسىنە قاتىستى ۇستاۋ جانە ءتىنتۋ شارالارى جۇرگىزىلدى. توپتىڭ جەتەكشىسى مەن نەگىزگى مۇشەلەرى قاماۋعا الىنعانىمەن، ونىڭ باسقا مۇشەلەرى بوستاندىقتا زاڭسىز ارەكەتتەردى جاساۋدى جالعاستىرعان"، - دەدى ءىىم ۇيىمداسقان قىلمىسقا قارسى كۇرەس دەپارتامەنتىنىڭ باسقارما باستىعى قۋاندىق الپىس.
40-تان اسا ءتىنتۋ ءىس-شارالارى جۇرگىزىلىپ، اتىس، تراۆماتيكالىق جانە سۋىق قارۋ، سونداي-اق ولاردىڭ قۇقىققا قايشى قىزمەتىنىڭ وزگە دە زاتتاي دالەلدەمەلەرى تاركىلەندى. بارلىق كۇدىكتى ۋاقىتشا ۇستاۋ يزولياتورىنا قامالعان.
"بۇدان باسقا، ءىىم قىلمىستىق-اتقارۋ جۇيەسى كوميتەتىمەن بىرلەسىپ، ۇيىمداسقان قىلمىستىق توپتىڭ كوشباسشىلارى مەن نەگىزگى قاتىسۋشىلارى وتىرعان مەكەمەلەردە جەدەل جاعدايدى تۇراقسىزداندىرۋعا جول بەرمەۋ جانە ءتيىستى رەجيمدى قامتاماسىز ەتۋ جونىندە شارالار قابىلدانۋدا. بۇل باعىتتاعى جۇمىس جالعاساتىن بولادى"، – دەدى ءىىم ۇيىمداسقان قىلمىسقا قارسى كۇرەس دەپارتامەنتىنىڭ باسقارما باستىعى قۋاندىق الپىس.
