بۇگىن (26.02.2024) دانيار الپييەۆكە الدانعان ءبىر توپ ساۋداگەر الماتى وبلىستىق پوليسيا دەپارتامەنتىندە شۋ شىعاردى، دەپ حابارلايدى “ادىرنا” سايتى.

قونايەۆ قالاسىنا كەلگەن كاسىپكەرلەر الەۋمەتتىك جەلىدە دانيار الپييەۆتى، ەرمەك مارقابايەۆتى اقتاپ الۋدى كوزدەيتىن ادۆوكاتتاردىڭ ارەكەتتەرىنە، كورشى مەملەكەتكە نوتا جولداتقان استىرتىن ويىندارعا الاڭداۋلى ەكەندەرىن جەتكىزدى.
قىلمىستىق ارەكەتتى جۇمسارتۋ ءۇشىن جاسالاتىن اقپاراتتىق ناۋقان تەرگەۋگە قىسىم كورسەتۋدىڭ ءبىر ءتۇرى. سوڭعى ۋاقىتتا بۇل ءۇردىس قالىپتى جايتقا اينالىپ، بيشىمبايەۆتى دا اقتاپ الۋ ارەكەتتەرى اشكەرە بولۋدا. سوندىقتان، جاپا شەگۋشى تاراپ الماتى وبلىستىق پوليسيا دەپارتامەنتى باستىعىنىڭ ورىنباسارى سەرىك قاسەن ۇلى شالقاروۆقا بىرنەشە سۇراقتى جۇزبە-جۇز قويدى:

“ساۋداگەرلەردى سەرگەلدەڭگە سالعان، 2 ملرد-قا جۋىق قارجى جىمقىرعان دانيار الپييەۆتىڭ ۇيىمداسقان توبىنا قانداي شارا قولدانىلدى؟ الاياقتىق بويىنشا قىلمىستىق ءىس قوزعالدى ما (№3 پاۆيلون قۇرىلىسى)؟ جابىرلەنۋشىلەر سانى قانشاعا جەتتى؟ پاۆيلون قۇرىلىسىنا قارجى جيناۋعا تىكەلەي قاتىسى بار ەرمەك مارقابايەۆ، كاسسير مارجان ەسجانوۆا، بەكەت ءابىلوۆ جانە باسقالارعا نەگە شارا قولدانىلماي جاتىر؟” - دەدى.

بۇگىنگى جيىنعا دانيار الپييەۆتىڭ تۋعان-تۋىستارى دا قاتىسقان. بۇعان دەيىن دانيار الپييەۆتىڭ باسشىلىعىنداعى كومپانيا ءۇشىنشى پاۆيلوندى سالۋ ءۇشىن 300-دەن استام ۇلەسكەردەن زاڭسىز قاراجات جيناعان.

اتاپ ايتقاندا، بازاردىڭ اتقارۋشى ديرەكتورى بولىپ قىزمەت اتقارعان قىرعىز ازاماتى ەرمەك مارقابايەۆ، كاسسادا جۇمىس ىستەگەن مارجان ەسجانوۆا جانە بازاردىڭ باقىلاۋشىسى بەكەت ءابىلوۆ سىندى تۇلعالاردىڭ قاتىسۋىمەن بولعان زاڭسىز قارجى جيناۋ ارەكەتى ءالى كۇنگە دەيىن ءوز شەشىمىن تاپپاعان.

الماتى وبلىسى پوليسيا دەپارتامەنتىنىڭ باسشىلىعى  ۇلەسكەرلەردىڭ كوكەيتەستى ماسەلەسى بويىنشا قىلمىستىق ءىس قوزعالاتىنىن جانە ۇلەسكەرلەردى جابىرلەنۋشى رەتىندە تانيتىندىعىن ايتتى.

«Westoil Software» كومپانياسى تاعى دا مالىمدەمە جاسادى، دەپ حابارلايدى Ulys.

«نارازىلىق اكسياسىن توقتاتقىسى كەلمەگەن 50 ادام قىزمەتتەن بوساتىلدى.بۇگىن، 29 اقپاندا" Westoil Software " كومپانياسى جۇمىسقا ورنالاسۋعا كەزەكتە تۇرعان ازاماتتار اراسىنان ۇمىتكەرلەرمەن اڭگىمەلەسۋدى باستادى. قىزمەتكەرلەر زاڭسىز نارازىلىق اكسياسىنا قاتىسقانىنا قاراماستان، ءبىز ولارعا جۇمىسقا قابىلداۋ جۇرگىزىلگەنگە دەيىن كەلىسىم كوميسسياسى ارقىلى قايتا جۇمىس ورىندارىنا ورالۋعا مۇمكىندىك بەرەمىز. پايدا بولعان بوس جۇمىس ورىندارىنا كانديداتتاردى ىرىكتەۋ زاڭسىز نارازىلىق اكسياسىنا قاتىسۋشىلارمەن ەڭبەك شارتتارى بۇزىلعان جانە ولاردى جۇمىسقا كەزەككە تۇرعان ازاماتتارمەن اۋىستىرعان كەزدە كەزەڭ-كەزەڭىمەن جۇرگىزىلەتىن بولادى»، - دەلىنگەن كومپانيا حابارلاماسىندا.

بۇعان دەيىن حابارلاعانىمىزداي اتالعان كومپانيا بىرنەشە رەت مالىمدەمە جاساپ، جاعدايدى تۇسىندىرگەن بولاتىن.

وتكەن جىلدىڭ 11 جەلتوقسانىنان باستاپ، ماڭعىستاۋ وبلىسىنداعى West Oil Software قىزمەتكەرلەرىنىڭ ەرەۋىلى جالعاسۋدا. كەيىن West Oil Software –دىڭ نارازى جۇمىسكەرلەرىن جۇمىسسىز جۇرگەن جەتىبايلىقتار باسۋعا دايىن ەكەنى حابارلاندى.

بىلتىر اقتاۋ پورتىنان ەكسپورتقا 3 ملن 376 مىڭ توننا مۇناي تاسىمالدانعان. بۇل تۋرالى قازمۇنايگاز ۇلتتىق كومپانياسىنىڭ باسپا ءسوز قىزمەتى حابارلادى.

قازاقستان مۇنايىن اقتاۋ پورتىنان ەكسپورتقا تاسىمالداۋ كولەمىنىڭ ارتۋى «باكۋ-تبيليسي-دجەيحان» مۇناي قۇبىرى باعىتىندا جونەلتىلەتىن شيكىزات كولەمىنىڭ ۇلعايۋىمەن بايلانىستى.

«2022 جىلى قازاقستان رەسپۋبليكاسىنىڭ پرەزيدەنتى قاسىم-جومارت توقايەۆ ترانسكاسپيي ءدالىزى بويىنشا مۇناي تاسىمالداۋدى ارتتىرۋدى تاپسىردى. وسى تاپسىرماعا سايكەس «قازمۇنايگاز» ۇك اق مەن ازەربايجان رەسپۋبليكاسىنىڭ SOCAR مەملەكەتتىك مۇناي كومپانياسى «تەڭىز» كەنىشىنەن «باكۋ-تبيليسي-دجەيحان» مۇناي قۇبىرى باعىتىندا جىلىنا 1،5 ميلليون تونناعا دەيىن مۇناي تاسىمالداۋدى كوزدەيتىن كەلىسىم جاسادى. بىلتىر «باكۋ-تبيليسي-دجەيحان» باعىتىمەن تاسىمالدانعان مۇناي 250 مىڭ توننادان 1 ملن 392 مىڭ تونناعا ارتتى. بۇل 2022 جىلدىڭ سايكەس كەزەڭىمەن سالىستىرعاندا 5،5 ەسەگە ارتىق. «تەڭىز» كەنىشىنەن وسى باعىت بويىنشا 1 ميلليون 057 مىڭ توننا مۇناي جونەلتىلدى»، -دەلىنگەن كومپانيانىڭ حابارلاماسىندا.

سونداي-اق اقتاۋ پورتىنان ماحاچكالا پورتىنا قاراي 1 ملن 984 مىڭ توننا مۇناي جىبەرىلگەن.