جەتىسۋ وبلىسىنىڭ ەڭ نەگىزگى تابيعي ءارى تۋريستىك كورنەكتى جەرلەرىنىڭ ءبىرى – بۇرحانبۇلاق سارقىراماسىنا اپاراتىن جولدىڭ قۇرىلىسى كەلەسى جىلى باستالادى. بۇل تۋرالى وبلىس اكىمى بەيبىت يسابايەۆ ەسكەلدى اۋدانىنىڭ تۇرعىندارىمەن كەزدەسۋدە مالىمدەدى، دەپ حابارلايدى جەتىسۋ وبلىسى اكىمىنىڭ باسپا ءسوز قىزمەتى.
- ەسكەلدى اۋدانى – تۋريستىك الەۋەتى جوعارى وڭىرلەردىڭ ءبىرى. وسى جىلدىڭ 10 ايىندا تۋريستەردى قابىلدايتىن نىسانداردا 41 مىڭ ادامعا قىزمەت كورسەتىلىپ، سونىڭ ىشىندە اقىلى قىزمەت كورسەتۋ كولەمى 25 ملن. تەڭگەگە جەتتى. وسى رەتتە بۇرقانبۇلاق سارقىراماسىنا اپاراتىن 31 كم اۆتوجولدى جوندەۋ جۇمىستارى كەلەسى جىلى باستالاتىنىن اتاپ ءوتۋ كەرەك. بۇل ماقساتقا 2025 جىلى رەسپۋبليكالىق بيۋدجەتتەن 3 ملرد. تەڭگە قاراجات بولىنەدى. سوندىقتان ءتۋريزمدى دامىتۋ ءۇشىن ينفراقۇرىلىمدى جاقسارتىپ، جاڭا قوناق ۇيلەر، دەمالىس بازالارىن سالىپ، جولداردى جوندەۋ قاجەت. ينتەرنەت-رەسۋرستار مەن الەۋمەتتىك جەلىلەر ارقىلى كورىكتى جەرلەردى كەڭىنەن ناسيحاتتاپ، ەكوتۋريزم مەن اگروتۋريزم باعىتتارىن دامىتۋ كەرەك، - دەپ اتاپ ءوتتى ءوڭىر باسشىسى ب. يسابايەۆ.
ەسكە سالساق، جەتىسۋدىڭ تۋريزم سالاسى 5 دەستيناسيانىڭ الەۋەتىن تىرەك ەتەدى. ولار - الاكول مەن بالقاش كولدەرى، «التىنەمەل» جانە «جوڭعار الاتاۋى» ۇلتتىق پاركتەرى، جوڭعار الاتاۋىنىڭ تاۋلى الابى.
