بۇگىن قازاقستان رەسپۋبليكاسى مەن ازەربايجان رەسپۋبليكاسى اراسىندا ديپلوماتيالىق قاتىناستار ورناتىلعانىنا 27 جىل تولادى. سىرتقى ىستەر مينيسترلىگى باسپا ءسوز قىزمەتىنىڭ مالىمەتىنشە، قازاقستاننىڭ باكۋدەگى ەلشىلىگى 1994 جىلدىڭ جەلتوقسان ايىندا، ال ازەربايجاننىڭ قازاقستانداعى ەلشىلىگى 2004 جىلدىڭ ناۋرىز ايىندا اشىلدى. 2008 جىلدىڭ قىركۇيەك ايىنان باستاپ ازەربايجاننىڭ اقتاۋ قالاسىنداعى باس كونسۋلدىعى جۇمىس ىستەۋدە.
ەكى ەل اراسىندا سىندارلى ساياسي ديالوگ ورناتىلعان. قازاقستان مەن ازەربايجان وڭىرلىك جانە حالىقارالىق سيپاتتاعى نەگىزگى وزەكتى ماسەلەلەر بويىنشا ۇستانىمداردىڭ جاقىندىعىمەن ەرەكشەلەنەدى.
قازاقستان-ازەربايجان قاتىناستارى 2005 جىلعى مامىردا باكۋدە قول قويىلعان ستراتەگيالىق ارىپتەستىك جانە وداقتاستىق قاتىناستار تۋرالى شارتتىڭ قاعيدالارى مەن ەرەجەلەرىنە سايكەس دامۋدا.
قازاقستان رەسپۋبليكاسىنىڭ تۇڭعىش پرەزيدەنتى – ەلباسى نۇرسۇلتان نازاربايەۆ پەن ازەربايجان رەسپۋبليكاسىنىڭ بۇرىنعى پرەزيدەنتى، جالپى ۇلتتىق كوشباسشىسى گەيدار الييەۆ ىرگەتاسىن قالاعان دوستىق قارىم-قاتىناس ازەربايجاننىڭ قازىرگى پرەزيدەنتى يلحام الييەۆپەن دە ءساتتى جالعاسىن تابۋدا.
2017 جىلدىڭ ءساۋىر ايىندا قازاقستاننىڭ تۇڭعىش پرەزيدەنتى – ەلباسى نۇرسۇلتان نازاربايەۆتىڭ ازەربايجان رەسپۋبليكاسىنا رەسمي ساپارى ورىن الىپ، ونىڭ ناتيجەسى بويىنشا 10 مەملەكەتارالىق جانە ۇكىمەتارالىق كەلىسىمگە قول قويىلدى.
2018 جىلدىڭ تامىز ايىندا ازەربايجان پرەزيدەنتى يلحام الييەۆ كاسپيي جاعالاۋى ەلدەرىنىڭ بەسىنشى سامميتىنە قاتىسۋ ماقساتىندا قازاقستان رەسپۋبليكاسىندا (اقتاۋ) جۇمىس ساپارىمەن بولدى.
جالپى 2018 جىل ىشىندە پرەزيدەنت، پرەمەر-مينيستر، پارلامەنت، ءسىم جانە باسقا دا مينيسترلىكتەر مەن ۆەدومستۆولار باسشىلارى دەڭگەيىندە 30-دان اسا ءوزارا ءىسساپارلار ورىن الدى.
2018 جىلى ەكىجاقتى تاۋاراينالىم 258،3 ملن. اقش دوللارىن قۇرادى. ازەربايجان سوڭعى 3 جىل ىشىندە قازاقستاننىڭ باتىس وڭىرىنە 70 ملن. اقش دوللارىنان اسا ينۆەستيسيا سالدى.
ەكىجاقتى ساۋدا-ەكونوميكالىق قاتىناستاردىڭ لوكوموتيۆى بولىپ تابىلاتىن كولىك-لوگيستيكالىق سالاداعى بايلانىستار ۇنەمى كەڭەيتىلىپ، دامىپ كەلەدى.
قازىرگى تاڭدا قازاقستاندا ازەربايجاننىڭ قاتىسۋىمەن 524 زاڭدى تۇلعالار تىركەلگەن، سونىڭ ىشىندە 221 بىرلەسكەن كاسىپورىن جۇمىس ىستەۋدە.
ەكىجاقتى ەكونوميكالىق ىنتىماقتاستىقتى دامىتۋعا ساۋدا-ەكونوميكالىق ىنتىماقتاستىق جونىندەگى قازاقستان-ازەربايجان ۇكىمەتارالىق كوميسسياسىنىڭ جۇمىسى دا ىقپال ەتۋدە.
ۇكىمەتارالىق كوميسسيانىڭ ۇسىنىستارى ەكىجاقتى قارىم-قاتىناستاردىڭ كەڭ-اۋقىمدى سپەكترىن قامتىپ، ەنەرگەتيكا، ترانزيتتىك جانە كولىكتىك جۇيەلەر، اۋىل شارۋاشىلىعى، ءبىلىم بەرۋ جانە تۋريزم سالالارىنداعى ساۋدا-ەكونوميكالىق جانە ينۆەستيسيالىق بايلانىستاردى كەڭەيتۋگە مۇمكىندىك بەرەدى.
كوپجاقتى فورماتتاعى قاتىناستارىمىز دا ءوزارا سەنىمدىلىككە نەگىزدەلىپ دامۋدا. حالىقارالىق كۇن تارتىبىندەگى وزەكتى ماسەلەلەر بويىنشا ءبىزدىڭ كوزقاراستارىمىز ۇيلەسىمدى جانە ۇقساس.
كوپجاقتى فورماتتا تاراپتار حالىقارالىق جانە وڭىرلىك ۇيىمدار (بۇۇ، ەقىۇ، يىۇ، تمد، تمىك، اوسشك، ەىۇ جانە ت.ب.) شەڭبەرىندە بەلسەندى ءوزارا ءىس-قيمىل جاساسىپ كەلەدى.
قازاقستان مەن ازەربايجان پارلامەنتتەرى اراسىندا تىعىز ءوزارا ءىس-قيمىل جولعا قويىلعان. ەكى ەلدىڭ زاڭ شىعارۋشى ورگاندارى اراسىنداعى دوستىق توبى قۇرىلدى جانە جۇمىس ىستەيدى. ءبىزدىڭ ەلدەرىمىزدىڭ زاڭنامالىق ورگاندارى تۇراقتى ءوزارا ساپارلارمەن، ونىڭ ىشىندە ق ر مەن ار-دا ۇيىمداستىرىلاتىن پارلامەنتتىك جانە پرەزيدەنتتىك سايلاۋدى ءوزارا باقىلاۋ جەلىسى بويىنشا الماسادى.
مادەني-گۋمانيتارلىق ىنتىماقتاستىقتى نىعايتۋ جانە ودان ءارى دامىتۋ ءۇشىن بەلسەندى جۇمىس جۇرگىزىلۋدە. تاراپتار تاجىريبە الماسىپ، ەكى ەلدىڭ اۋماعىنداعى ءتۇرلى ءىس-شارالارعا قاتىسادى.
