وسى قاسيەتتى ءتۇن مەرەكەسىنە وراي قازاقستان مۇسىلماندارى ءدىني باسقارماسىنىڭ ءتوراعاسى، باس ءمۇفتي ناۋرىزباي قاجى تاعان ۇلى قازاقستاندىقتارعا ۇندەۋ جولدادى.
***
اللا تاعالا تۇندەردىڭ ىشىندە ءقادىر ءتۇنىنىڭ ءقادىرى مەن قاسيەتىن ارتتىرىپ قويدى. رامازان ايىنىڭ قاسيەتتى بولۋىنىڭ ۇلى ەرەكشەلىكتەرىنىڭ ءبىرى – ءقادىر تۇنىندە تاعدىردىڭ جازىلۋى. ال ءقادىر ءتۇنىنىڭ قاسيەتتى بولۋىنىڭ ءمانى – ادامزات بالاسىن ەكى دۇنيە باقىتىنا جەتەلەۋشى، اق پەن قارانىڭ، ادال مەن ارامنىڭ اراجىگىن ايقىنداۋشى قۇراننىڭ ءتۇسۋى.
ءقادىر ءتۇنى – قاسيەتتى، تاعدىر، تارىلۋ دەگەن ماعىنالاردى بىلدىرەدى. ءقادىر ءتۇنى – اللا تاعالا پەرىشتەلەرگە ءامىر ەتۋىمەن قۇران كارىمدى لاۋحۋل ماحفۋزدان (بارلىق جاراتىلىستىڭ تاعدىرى جازىلعان كىتاپ) بايتۋل عيززاعا (دۇنيە اسپانى) تۇسىرگەن قاسيەتتى ءتۇن. ول جايلى اللا تاعالا قۇراندا:
«نەگىزىنەن قۇراندى ءقادىر تۇنىندە تۇسىردىك» («قادر» سۇرەسى، 1-ايات)، – دەپ ايتقان. كەيىن 23 جىل بويى ءتۇرلى سەبەپتەر مەن وقيعالارعا بايلانىستى پايعامبارىمىزعا (وعان اللانىڭ سالاۋاتى مەن سالەمى بولسىن) ۋاحي ەتىلىپ وتىرعان. بۇل ءتۇننىڭ ارتىقشىلىعى جونىندە اللا تاعالا قۇراندا بىلاي دەيدى: «ءقادىر ءتۇنى مىڭ ايدان دا قايىرلى» («قادر» سۇرەسى، 3-ايات).
ايشا انامىز (وعان اللا رازى بولسىن) ارداقتى پايعامبارىمىز مۇحاممەدتەن (وعان اللانىڭ سالاۋاتى مەن سالەمى بولسىن): «ۋا، اللانىڭ ەلشىسى، ءقادىر تۇنىندە قانداي دۇعا تىلەيىن؟» دەپ سۇرايدى. سوندا پايعامبارىمىز (وعان اللانىڭ سالاۋاتى مەن سالەمى بولسىن): «اللا، راسىندا، سەن كەشىرىمدىسىڭ جانە كەشىرگەندى جاقسى كورەسىڭ. مەنى كەشىرە گورشى» دەپ ايتاسىڭ» دەپ جاۋاپ بەرگەن. پايعامبارىمىز (وعان اللانىڭ سالاۋاتى مەن سالەمى بولسىن) تاعى ءبىر حاديسىندە: «كىمدە-كىم ءقادىر ءتۇنى يمانمەن جانە ساۋابىن ءۇمىت ەتىپ قۇلشىلىق ەتسە، ونىڭ الدىڭعى كۇنالارى كەشىرىلەدى»، – دەگەن.
ءيسى مۇسىلمان بالاسىنىڭ تاعدىر جازىلاتىن ءتۇندى تاعاتسىزدانا كۇتۋىنىڭ ءبىر حيكمەتى – جاراتقانعا جاقىنداي تۇسۋگە تالپىنۋى. سوندىقتان بۇل ءتۇندى ساۋاپتى ىستەرمەن وتكىزۋگە تىرىسايىق.
اللا تاعالادان قاسيەتتى ءقادىر تۇنىندە ەلىمىزدىڭ اماندىعى مەن تىنىشتىعىن تىلەپ، سۋ تاسقىنىنان زارداپ شەككەن حالقىمىزعا جەڭىلدىك سۇرايىق. جاراتۋشى يەمىز قازاق ەلىنە جار بولعاي! ءامين!