بۇگىن مادەنيەت جانە ونەر قىزمەتكەرلەرى وزدەرىنىڭ كاسىبي مەرەكەلەرىن اتاپ ءوتىپ جاتىر. وسى ورايدا اتالعان ۆەدومستۆو باسشىسى ايدا بالايەۆا Kazinform اگەنتتىگىنە سۇحبات بەردى.
– ايدا عالىم قىزى، بيىل قازاقستاننىڭ مادەنيەت جانە ونەر قىزمەتكەرلەرى ءۇشىن مەرەيتويلىق جىل بولىپ وتىر. تۋرا 10 جىل بۇرىن وسى كۇنى كاسىبي مەرەكەلەرىن العاش رەت اتاپ ءوتتى. اتاۋلى داتانىڭ ماڭىزى نەدە؟
– ارينە، مادەنيەت جانە ونەر قىزمەتكەرلەرىنىڭ كاسىبي مەرەكەسىن اتاپ ءوتۋ – ءبىزدىڭ قوعام ءۇشىن ۇلكەن ماڭىزعا يە. ول وسى سالاداعى مىڭداعان ماماننىڭ ءارقايسىسىنىڭ ەڭبەگىنىڭ ەلەۋلى ەكەنىن ەسكە تۇسىرەدى. ولارسىز ءبىزدىڭ دامۋىمىز بەن رۋحاني بايۋىمىزعا سەپ بولار وتە ماڭىزدى كوپتەگەن مادەني ءىس-شارانى وتكىزە الماس ەدىك. سونىمەن قاتار، مادەنيەت پەن ونەردىڭ تاربيەلىك ماڭىزى دا وراسان زور. ونسىز ادام ءبىرتۇتاس، دامىعان تۇلعاعا اينالىپ، رۋحاني كەمەلدەنە المايدى.
مادەنيەت پەن ونەر مەرەكەسى مادەني مۇرانى ساقتاۋدىڭ، ءپاتريوتيزمدى قالىپتاستىرۋدىڭ جانە قوعامنىڭ جالپى مادەني دامۋىنىڭ ماڭىزىن ايرىقشا كورسەتەدى.
وسى ورايدا، مەملەكەت باسشىسىنىڭ مادەنيەت سالاسىن دامىتۋداعى ەرەكشە ءرولىن اتاپ وتكىم كەلەدى. پرەزيدەنتتىڭ تاپسىرماسى بويىنشا مادەنيەتتى دامىتۋ، دارىپتەۋ جانە ۇلتتىق مۇرانى ساقتاۋ ءۇشىن قولايلى جاعدايلار جاسالىپ جاتىر. شىعارماشىلىق ۇجىمدار ۇلتتىق مادەنيەتىمىز بەن ونەرىمىزدى جاقىن ءارى الىس شەت ەلدەردە تانىستىرىپ ءجۇر. ودان بولەك مادەني جاڭا نىساندار سالىنىپ، ماتەريالدىق-تەحنيكالىق بازا نىعايتىلۋدا. بۇل مەملەكەت باسشىسىنىڭ قولداۋىمەن جۇرگىزىلگەن جۇمىستىڭ ءبىر بولىگى عانا.
سونداي-اق اتالعان سالا وكىلدەرى ادىلەتتى قازاقستاندى قۇرۋعا باعىتتالعان پرەزيدەنتتىك رەفورمالاردى قولداپ، مۇنى ەلدىڭ جالپى وركەندەۋى مەن دامۋىنا جاسالعان ماڭىزدى قادام رەتىندە قاراستىرا وتىرىپ، ىسكە اسىرۋعا كومەكتەسەدى.
– مادەنيەت سالاسىنداعى جەتىستىكتەر جەتەرلىك، ءبىراق سونىمەن بىرگە كوپتەگەن ماسەلە دە بار. مينيستر رەتىندە بۇل سالاعا 9 اي بۇرىن كەلدىڭىز. ارينە، كەيبىر جاھاندىق ناتيجەلەر تۋرالى ايتۋعا ءالى ەرتە، دەگەنمەن ءقازىردىڭ وزىندە نە ىستەلدى جانە الدا قانداي جۇمىستار اتقارىلماق؟
– ءيا، بۇل باعىتتا جۇمىس ىستەۋ ۇنەمى ءجىتى نازار مەن كۇش-جىگەردى قاجەت ەتەدى. ويتكەنى، بۇل سالا ارقىلى حالىقتارمەن، ەلدەرمەن مادەني بايلانىستى نىعايتىپ، كوكجيەگىمىزدى كەڭەيتە تۇسەمىز. مەملەكەت باسشىسىنىڭ الدىمىزعا قويعان ماڭىزدى مىندەتتەرىنىڭ ءبىرى – مادەني ساياساتتى جەتىلدىرۋگە بايلانىستى. 2023 جىلى قازاقستان رەسپۋبليكاسىنىڭ 2029 جىلعا دەيىنگى كەزەڭگە ارنالعان مادەني ساياساتىنىڭ تۇجىرىمداماسى بەكىتىلدى. قۇجاتتا مادەني ساياساتتى دامىتۋدىڭ نەگىزگى پرينسيپتەرى مەن تاسىلدەرى، سونداي-اق ماقساتتى ينديكاتورلار مەن كۇتىلەتىن ناتيجەلەر ايقىندالعان.
جوسپارلى جۇمىس ءتۇرلى باعىتتاردا جۇرگىزىلەدى: ينفراقۇرىلىمدى دامىتۋ، شىعارماشىلىق باستامالاردى قولداۋ، كادرلىق دايارلىق جانە قازاقستاندىق مادەنيەتتى شەتەلگە تانىتۋ. ارينە، قيىندىقتار بار، ءبىراق سونىمەن بىرگە جۇيەلى جۇمىس ءجۇرىپ جاتىر، ءتۇيىندى ماسەلەلەردى قالاي شەشەتىنىمىزگە، ءارى قارايعى باعىت-باعدارىمىزعا قاتىستى ناقتى جوسپار بار.
ايتا كەتەيىك، الەۋمەتتىك زەرتتەۋلەر حالىقتىڭ وسى سالاداعى قىزمەت ساپاسىنا قاناعاتتانۋ دەڭگەيى 74% قۇراعانىن كورسەتتى. بۇل مادەني ساياساتتى جاقسارتۋ بويىنشا جۇرگىزىلىپ جاتقان شارالار ءوز جەمىسىن بەرىپ وتىرعانىن كورسەتەدى. الايدا مادەنيەت پەن ونەردى ودان ءارى دامىتۋ ءۇشىن ءالى دە كوپ جۇمىس ىستەۋ كەرەك.
– مادەنيەت قايراتكەرلەرى ءوز شىعارماشىلىعى ءۇشىن ميلليونداعان گونورار الادى. بۇل تۋرالى پىكىرىڭىز قانداي؟
– كوبىسى ونەر ادامدارى ساحناعا شىققانى ءۇشىن ميلليونداعان تەڭگە الادى دەپ ەسەپتەيدى. ارينە، وندايلار بار، ءبىراق وتە كوپ ەمەس. تەك كوممەرسيالىق تۇرعىدان تابىستى جۇلدىزدار عانا. ال نەگىزىنەن ادەتتەگى جالاقىعا ءوز شىعارماشىلىعىن بولىسۋگە دايىن ونەر ادامدارى كوپ. ولار جۇمىس جايىنا وكپە ارتپاي، ءوز كاسىبىنە ادالدىقتىڭ ۇلگىسىن تانىتىپ كەلەدى. ولاردىڭ ادالدىعى مەن ىسىنە دەگەن سۇيىسپەنشىلىگىنە ەشقانداي باعا جەتپەيدى.
بۇل ادامدار ماڭىزدى ميسسيانى ورىنداپ، قاراپايىم حالىققا قۋانىش سىيلايدى، رۋحاني قولداۋ كورسەتەدى. بۇل اسىرەسە ءتۇرلى سىن-سىناق كەزىندە اسا ماڭىزدى. ماسەلەن، مۇنى كەشەگى ەلىمىزدىڭ باتىسىنداعى سۋ تاسقىنى كەزىندە كوردىك. وندا بارشا شىعارماشىلىق ۇجىمدار دا، جەكە تۇلعالار دا ءوز باستاماسىمەن كونسەرتتەر وتكىزىپ، تۇسكەن قاراجاتتى زارداپ شەككەندەرگە اۋدارىپ، ءبىر كۇندىك جالاقىلارىن جيناپ، ۆولونتەر بولدى. ولار وسىنداي ەل باسىنا كۇن تۋعان ساتتە شەتتە قالعان جوق، ماسەلەنىڭ بەل ورتاسىندا ءجۇردى.
ءار ىسكە جانكەشتىلىكپەن كىرىسەتىن جانە ۇدايى ەڭبەك ەتەتىن ناعىز پاتريوت جاندار.
مۇنداي ادامدار ءۇشىن جانى قالايتىن ىسپەن اينالىسۋ وتە ماڭىزدى. ولاردىڭ ارقاسىندا ءبىز الەم تۋرالى جاڭا دۇنيەلەردى ءتانىپ-بىلىپ، رۋحاني قۇندىلىقتاردان، ونەردىڭ تەرەڭدىگى مەن سۇلۋلىعىنان ءلاززات الامىز.
– اتالعان سالا قىزمەتكەرلەرىنىڭ جالاقىسى قانداي؟ بۇل باعىتتا قانداي شارالار قابىلدانىپ جاتىر؟
– مادەنيەت قىزمەتكەرلەرىن قارجىلىق-ماتەريالدىق ىنتالاندىرۋ تاقىرىبى ءبىزدىڭ مينيسترلىكتىڭ كۇن تارتىبىندەگى ەڭ وزەكتى ماسەلە بولىپ قالا بەرمەك. جالاقى مولشەرى سالاداعى وتكىر ماسەلەلەردىڭ ءبىرى بولعاندىقتان عانا ەمەس. مەملەكەت جانە ەڭ الدىمەن، ەل پرەزيدەنتى بۇل باعىتتا توقىراۋدىڭ الدىن الۋ ءۇشىن بار كۇشىن سالىپ جاتىر. وتكەن 2023 جىلدىڭ وزىندە 64 مىڭعا جۋىق مادەنيەت جانە ارحيۆ ءىسىنىڭ قىزمەتكەرلەرىنىڭ جالاقىسى 45% كوتەرىلدى.
بۇل اتقارىلعان جالعىز جۇمىس ەمەس. اتاپ ايتقاندا، ق.قۋانىشبايەۆ پەن «ازىرەت سۇلتان» مۇراجاي-قورىعىنا «ۇلتتىق» مارتەبە بەرىلىپ، وسى ۇجىمداردىڭ 450 قىزمەتكەرىنىڭ لاۋازىمدىق جالاقىسى 1،75 كوەففيسيەنتى بويىنشا ءوستى.
اقتوبە جانە تۇركىستان وبلىستارىنداعى 34 كوركەمونەرپاز ۇجىمىنا «حالىقتىق» جانە «ۇلگىلى» اتاقتارى بەرىلدى.
اراعا كوپ جىل سالىپ، مەملەكەت باسشىسىنىڭ تاپسىرماسى بويىنشا «حالىق ءارتىسى» قۇرمەتتى اتاعى قايتارىلدى. بۇل ماراپاتتىڭ جالپىحالىقتىق ماڭىزى زور. قازىرگى ۋاقىتتا بۇل اتاقپەن 8 مادەنيەت قايراتكەرى ماراپاتتالدى. ولاردىڭ سانى جىل سايىن ارتاتىنىنا سەنىمدىمىن.
ارينە، بۇل شارالاردىڭ بارلىعى مەملەكەتتىك قولداۋدى كۇشەيتۋگە جانە شىعارماشىلىق ۇجىمداردىڭ ەڭبەگىن باعالاۋعا باعىتتالعان. بۇل ەلدىڭ مادەني ءومىرىن دامىتىپ، ۇلتتىق مۇرانى قولداۋ ءۇشىن ماڭىزدى.
تاعى ءبىر ماسەلە – زاڭنامانى جەتىلدىرگەن جاعدايدا عانا بولاتىن تۇبەگەيلى وزگەرىستەر. بۇل جالاقىنى قايتا قاراۋعا عانا ەمەس، سونىمەن قاتار كرەاتيۆتى يندۋستريانىڭ تۇراقتى جۇيەسىن قۇرۋعا دا قاتىستى. سالاۋاتتى، باسەكەگە قابىلەتتى رۋحاني-مادەني قىزمەت كورسەتۋ يندۋسترياسى پايدا بولماي، جالاقىنى يندەكستەۋ ماسەلەسى تۋىنداي بەرەتىنى انىق. ءقازىر وسى جانە باسقا دا ماسەلەلەردى شەشۋ جولدارىن قاراستىرىپ جاتىرمىز.
– ءقازىر بىزدە ەل بىلەتىن جۇلدىزدار كوپ بولعانىمەن، جاڭا ەسىمدەر اشىلماي جاتقان سياقتى؟
– ولاي دەپ ايتا الماس ەدىم. جىل سايىن ناعىز جۇلدىزعا اينالاتىن جاڭا تالانتتار شىعىپ كەلەدى. ءبىز ەلىمىزدە مۋزىكانى دامىتىپ، تالانتتى مۋزىكانتتاردىڭ جاڭا بۋىندارىن قالىپتاستىرۋ جولىندا ۇنەمى جۇمىس ىستەيمىز. جاڭا ەسىمدەردى اشىپ، جاس تالانتتاردى قولداۋ ءۇشىن بارلىق جاعداي جاسالعان.
2023 جىلى بيبىگۇل تولەگەنوۆا اتىنداعى حالىقارالىق ۆوكاليستەر بايقاۋى، سكريپكاشىلار بايقاۋى، نۇرعيسا تىلەندييەۆ اتىنداعى رەسپۋبليكالىق ديريجەرلەر بايقاۋى، قۇرمانعازى اتىنداعى ءداستۇرلى مۋزىكالىق اسپاپتاردا ورىنداۋشىلار بايقاۋى سياقتى حالىقارالىق جانە رەسپۋبليكالىق دودالاردا 65 جاس تالانت جەڭىمپاز بولدى.
بۇل بايقاۋلاردىڭ باستى ماقساتى – دارىندى ونەرپازداردى انىقتاپ، قولداۋ عانا ەمەس، سونىمەن قاتار، ولاردىڭ كاسىبي ءوسۋى مەن دامۋى ءۇشىن مۇمكىندىكتەر جاساۋ.
– قازاق مادەنيەتىن شەتەلدە قانشالىقتى جاقسى بىلەدى؟
– ءبىزدىڭ مادەنيەتكە شەتەلدىكتەر ەرەكشە قىزىعادى. جىل سايىن ءتۇرلى جانرلار مەن باعىتتارداعى حالىقارالىق كونكۋرستار مەن فەستيۆالدەرگە قاتىسۋ، سونداي-اق، «مادەنيەت كۇندەرى» فورماتىنداعى ءىس-شارالاردى ۇيىمداستىرۋ، مەرەيتويلىق داتالاردى مەرەكەلەۋ بۇل ۇدەرىستە ماڭىزدى ءرول اتقارادى.
مىسالى، سۇلتان بەيبارىستىڭ 800 جىلدىعىن مەرەكەلەۋ اياسىندا 660 ءىس-شارا وتكىزدىك، ونىڭ ىشىندە 7ء-ى شەتەلدە بولدى. كايردە سۇلتان ءاز-زاحير بەيبارىس مەشىتىنىڭ اشىلۋى، «قازاقستاننىڭ ساندىك-قولدانبالى ونەرى» شەبەرلەرىنىڭ كورمەسى جانە باسقا دا اۋقىمدى ءىس-شارالار ءوتتى. بۇل جوبالار قازاق مادەنيەتى جانكۇيەرلەرىنىڭ نازارىن اۋدارعانى ءسوزسىز.
سونداي-اق قازاقستان 60-شى ۆەنەسيا بيەننالەسىنە قاتىستى. بۇل – ۇلكەن وقيعا. وندا ءبىز «Jerūiyq: كوكجيەكتەن تىس كوزقاراس» تاقىرىبىمەن ۇلتتىق پاۆيلوندى العاش رەت تانىستىردىق.
الداعى ۋاقىتتا جاڭا كورمەلەر مەن ءىس-شارالار، سونىڭ ىشىندە پاريجدەگى گيمە شىعىس ونەر مۇراجايىنداعى ۇلتتىق ونەر كورمەسى كۇتىپ تۇر. ونىڭ اشىلۋى قاراشا ايىنا جوسپارلانعان.
ودان بولەك بيىل قازاق مادەنيەتى مەن ونەرىن دارىپتەۋ ماقساتىندا تاجىكستاندا، تۇرىكمەنستاندا قازاقستاننىڭ مادەنيەت كۇندەرىن وتكىزۋدى جوسپارلاپ وتىرمىز.
ءوز كەزەگىندە تۇرىكمەنستان، ازەربايجان، ارمەنيا جانە ەگيپەت تە ءوز مادەنيەتى مەن ونەرىن ءبىزدىڭ ەلىمىزدە كورسەتۋگە دايىن.
ءبىز تۋريستەردى تارتۋ جانە تاريحي ورىنداردى تانىمال ەتۋ جۇمىسىن جالعاستىرامىز. وسىعان بايلانىستى گاۋحار انا، ەسىك، ورداباسى مۇراجاي-قورىقتارىنىڭ اۋماعىندا ۆيزيت-ورتالىقتاردىڭ قۇرىلىسى، «بوزوق» اشىق اسپان استىنداعى ۇلتتىق ساياباعىن قۇرۋ بويىنشا جۇمىستار جۇرگىزىلىپ جاتىر.
تاريحي-مادەني مۇرا وبەكتىلەرىن يۋنەسكو-نىڭ بۇكىلالەمدىك مۇرا تىزىمىنە ەنگىزۋ، «ۇلى جىبەك جولى: فەرعانا-سىرداريا ءدالىزى» ترانسۇلتتىق نوميناسياسى بويىنشا 6 وبەكتى بويىنشا نوميناسيالىق دوسە ازىرلەۋ جۇمىستارى جالعاسۋدا.
سىم-مەن بىرلەسىپ، يۋنەسكو-نىڭ ماتەريالدىق ەمەس مادەني مۇراسىنىڭ وكىلدىك تىزىمىنە قازاقستاننان ەكى ەلەمەنتتى – «سالبۋرىن» مەن «بەتاشار» جانە وزبەكستانمەن بىرلەسىپ ءبىر ەلەمەنتتى – «كەستە-سيۋزاننا» ونەرى بويىنشا كوپۇلتتى نوميناسيانى ەنگىزۋ جۇمىسى جۇرگىزىلۋدە.
بيىل 11 جىلدا العاش رەت ماتەريالدىق ەمەس مادەني مۇرانىڭ ۇلتتىق تىزبەسى جاڭارتىلدى. وعان قوسىمشا 75 ەلەمەنت كىرەدى.
سونداي-اق كۇنى كەشە عانا وزدەرىڭىز بىلەتىندەي، مينيسترلىكتىڭ قولداۋىمەن Qazaq Culture اقپاراتتىق-تانىمدىق پلاتفورماسى ىسكە قوسىلدى. مادەنيەت سايتى 8 تىلدە حابار تاراتادى.
وسىلايشا، ءتۇرلى مادەني ءىس-شارالار مەن بەلسەندى حالىقارالىق قىزمەتتى ۇيىمداستىرۋدىڭ ارقاسىندا قازاقستاندىق مادەنيەت حالىقارالىق مادەني بايلانىستاردى نىعايتۋعا ىقپال ەتە وتىرىپ، ەلىمىزدەن تىس جەرلەردە تانىلىپ كەلەدى.
– مادەني ورتالىقتار تۋرالى ايتايىقشى. بىلۋىمىزشە، قازاقستاننىڭ مادەني ورتالىعى قحر-دا اشىلماق...
– مادەني ورتالىقتار ەكى ەل اراسىنداعى بايلانىستى نىعايتۋدا جانە مادەني مۇرانى ناسيحاتتاۋدا ماڭىزدى ءرول اتقارادى. مادەني ورتالىقتاردى ءوزارا قۇرۋ تۋرالى ۇكىمەتارالىق كەلىسىمگە 2023 جىلعى قاراشادا استانا قالاسىندا قول قويىلدى. قازىرگى ۋاقىتتا ءبىز بەيجىڭدە قازاقستاندىق مادەني ورتالىقتى اشۋ جانە كونتەنتتى تولىقتىرۋ بويىنشا بەلسەندى جۇمىس ىستەپ جاتىرمىز. جۇڭگو تاراپى دا قازاقستاندا ءوز ورتالىعىن اشۋعا نيەتتى.
وسى باستاما اياسىندا «ءبىر بەلدەۋ، ءبىر جول» حالىقارالىق جوباسىنىڭ 10 جىلدىعىنا ورايلاستىرىلىپ بەيجىڭدە كوشپەلى كورمە ءوتتى. كورمەگە «ەسىك» مەملەكەتتىك تاريحي-مادەني مۇراجاي-قورىعىنىڭ قورلارىنان ءساق-ۇيسىن ءداۋىرىنىڭ ەكسپوناتتارى قويىلدى.
– ماتەريالدىق-تەحنيكالىق بازانى نىعايتۋدا قانداي شارالار قابىلدانىپ جاتىر؟ بارىنە ءمالىم، كوپتەگەن مادەني نىساننىڭ عيماراتتارى توزعان. ونىڭ سەبەبى بەلسەندى پايدالانۋمەن قاتار، ماقساتسىز پايدالانۋ، ايتالىق، بارلىق جينالىستار، اكسيالار، جەرلەۋ راسىمدەرى... بۇعان شىعارماشىلىق ادامداردىڭ وزدەرى دە شاعىمدانادى. وسى ورايدا تاعى ءبىر سۇراق، كەيبىر قۇرالداردىڭ سوڭعى 30 جىلدا جاڭارتىلماعانى راس پا؟
– وكىنىشكە قاراي، بۇل سالادا ۇزاق ۋاقىت بويى شەشىمىن تاپپاعان جۇيەلى ماسەلەلەر بار. مۋزىكالىق اسپاپتارعا قاتىستى ماسەلە دە وسىعان سايادى.
مادەني نىسانداردىڭ ماتەريالدىق-تەحنيكالىق بازاسىنا كەلەتىن بولساق، سوڭعى جىلدارى مەملەكەت باسشىسىنىڭ تىكەلەي قولداۋىمەن كورنەكتى عيماراتتاردى رەكونسترۋكسيا جاساۋعا كوپ كوڭىل ءبولىندى. اتاپ ايتقاندا، «قازاقكونسەرت» مەملەكەتتىك اكادەميالىق كونسەرتتىك ۇيىمىنىڭ عيماراتىن كۇردەلى جوندەۋ، «استانا وپەرا» مەملەكەتتىك وپەرا جانە بالەت تەاترىنىڭ ساحنالىق جابدىقتارىن جاڭعىرتۋ جوسپارلانعان. قوجا احمەت ياساۋي كەسەنەسىنىڭ «قازاق» كۇمبەزىنىڭ اپاتقا قارسى جانە كونسەرۆاسيالىق جۇمىستارى جۇرگىزىلەدى.
ەندىگى كەزەكتە – ناتاليا ساس اتىنداعى بالالار مەن جاسوسپىرىمدەرگە ارنالعان مەملەكەتتىك اكادەميالىق ورىس تەاترىنىڭ عيماراتىن قايتا جاڭارتۋ جانە رەسپۋبليكالىق مەملەكەتتىك اكادەميالىق نەمىس دراما تەاترىنىڭ عيماراتىن جوندەۋ. تۇتاستاي العاندا، مۋزەيلەر، تەاترلار مەن وركەسترلەر سياقتى، ءارتۇرلى نىسانداردى جاڭارتۋ جانە جوندەۋ ولاردىڭ شىعارماشىلىق جانە مادەني مۇرانى ۇسىنۋى ءۇشىن قولايلى جاعدايلاردى جاساۋ ءۇشىن قاجەت.
ءوڭىر باسشىلارى جاڭا نىسانداردىڭ قۇرىلىسى بويىنشا جەكە تاپسىرمالار الدى. اتاپ ايتقاندا، شىمكەنت، سەمەي جانە ەلىمىزدىڭ باسقا دا وبلىس ورتالىقتارىندا جاڭا تەاترلار سالىنادى.
مادەني ينفراقۇرىلىم جاڭارتىلىپ، اكتيۆتەر جاڭا الاڭدارمەن تولىعاتىنى تۇسىنىكتى. ءبىراق، ءبىز كونە مۇرانى قاتاڭ تارتىپپەن ساقتاۋعا مىندەتتىمىز. وسىعان بايلانىستى شىعارماشىلىق ۇجىمدارداعى ارىپتەستەردىڭ مادەني نىساندارداعى ماقساتسىز جۇمىستارعا قاتىستى الاڭداۋشىلىعىن تۇسىنەمىن ءارى قولدايمىن.
ارينە، ءبىز ولاردى تىڭداپ، بەلگىلى تۇلعالارمەن قوشتاسۋ ءراسىمى ءجيى وتەتىن تەاتر قىزمەتكەرلەرىنىڭ پسيحو-ەموسيونالدىق جاعدايىنا دەن قويۋعا تىرىسامىز. سوندىقتان ءبىز مۇمكىندىگىنشە جاقىندارىنا باسقا دا بالاما فورمالار بار ەكەنىن جەتكىزۋگە تىرىسامىز. مەنىڭ ويىمشا، كوپ ۇزاماي ءبىز كەڭەستىك كەزەڭدەگىدەي مادەنيەت مەكەمەلەرىندە ەسكە الۋ كەشتەرىن ۇيىمداستىرۋ تاجىريبەسىنەن مۇلدەم باس تارتامىز.
– قورىتىندىلاي كەلە، وسى ۇلكەن سالانىڭ قىزمەتكەرلەرىنە قانداي تىلەك ايتاسىز؟
– مادەنيەت جانە ونەر سالاسىنىڭ بارلىق قىزمەتكەرلەرىنە شالقار شابىت، شىعارماشىلىق ورلەۋ جانە تولايىم تابىس تىلەيمىن. ءاربىر جوبالارىڭىز كورەرمەنگە قۋانىش سىيلاپ، مادەني مۇراعا قوسقان ۇلەستەرىڭىز باعا جەتپەس قۇندىلىققا اينالسىن. ماقساتتارىڭىزعا جەتۋدە تاباندى بولىڭىزدار، جاڭا كوكجيەكتەردى اشىپ، يدەيالارىڭىزدى باتىل جۇزەگە اسىرىڭىزدار. سىزدەردىڭ جۇمىستارىڭىز الەمدى نۇرعا بولەسىن، جارىق سىيلاسىن جانە بۇل قىزمەت سىزدەرگە دە جەتىستىكتەر مەن تابىس اكەلەدى دەپ سەنەمىن.
