بانگلادەشتەگى نارازىلىق قايتا باستالىپ، كەمىندە 95 ادام مەرت بولعان، دەپ حابارلايدى ۆۆس.

بانگلادەشتەگى ستۋدەنتتەر ەل تاۋەلسىزدىگى ءۇشىن سوعىسقان ارداگەرلەردىڭ تۋىستارىنا جۇمىس كۆوتالارىن الىپ تاستاۋدى تالاپ ەتىپ شىققان، ونىڭ ارتى ۇكىمەتكە قارسى نارازىلىققا ۇلاستى. شىلدەنىڭ اياعىندا سوت شەشىمى بويىنشا كۆوتالار قىسقارعان. سول كەزدە نارازىلىقتان 200-گە جۋىق ادام قازا بولدى.

كەيىن نارازىلار ۇكىمەتكە تيەسىلى عيماراتتاردى، دەپۋتاتتاردىڭ ءۇيىن جانە پوليسيا ۋچاسكەلەرىن قيراتىپ، 15 جىلدان اسا ۋاقىت بيلىكتە وتىرعان بانگلادەش پرەمەر-مينيسترى شەيح حاسينانىڭ قىزمەتتەن كەتۋىن تالاپ ەتتى. ول قاڭتاردا قاتارىنان ءتورتىنشى مەرزىمگە تاعايىندالعان ەدى. نارازىلار جۇرتتى جەكسەنبىدە (بانگلادەشتە جۇمىس كۇنى) جۇمىسقا شىقپاۋعا جانە سالىق پەن كوممۋنالدىق تولەمدەردى تولەمەۋگە شاقىردى.

بانگلادەش بيلىگى تارتىپسىزدىكتى توقتاتۋ ءۇشىن داككا مەن باسقا اۋدانداردا كومەندانت ساعاتىن ەنگىزىپ، ينتەرنەتتى 14 ساعاتقا ءوشىرىپ، سارسەنبىگە دەيىن دەمالىس جاريالادى. بيلىكتەگى پارتيا نارازىلىقتارعا وپپوزيسيانى ايىپتاپ، نارازىلارعا كەلىسسوزگە وتىرۋعا دايىنبىز دەدى.

نارازىلىقتار كەزىندە 11 مىڭنان اسا ادام قامالعان. ءقازىر داككا قالاسىنداعى اۋەجاي جۇمىس ىستەمەي تۇر، نارازىلار جولداردى جاۋىپ تاستاعان.

بانگلادەش پرەمەر-مينيسترى شەيح حاسينا قىزمەتىن دوعارىپ، نارازىلىق كەزىندە ەلىنەن كەتتى. بۇل تۋرالى جەرگىلىكتى Prothom Alo گازەتى حابارلادى.