اتىراۋ وبلىسى اكىمىنىڭ ورىنباسارى جاسۇلان بيسەمباي قۇلسارىدا بولىپ جاتقان احۋال وتە كۇردەلى ەكەنىن ايتتى، دەپ حابارلايدى Ulys.
"جىلىويلىقتار تاسقىن سۋمەن كۇرەسكە بەل شەشپەي 2 اپتا دايىندالىپ، 3 كۇن بويى قارعىن سۋمەن كۇرەستى. ءبىراق، ءتىلسىز جاۋ قالانى باسىپ كەتتى.زارداپ شەككەن باۋىرلارىمىزعا بارلىق كومەك كورسەتىلۋدە، شىعىن كولەمى دە وتەلەدى. دەگەنمەن، اتىراۋ قالاسى دا بۇل تاعدىردى قايتالاۋى مۇمكىن. سۋ باسۋ ءقاۋپى ورىنبور، ورال قالالارىنان كەم بولمايدى دەگەن بولجام بار. البەتتە اكىمدىك دايىندالۋدا، 5 كۇننەن بەرى ءوڭىردىڭ ەڭ ۇلكەن 20 قۇرىلىس كومپانياسى جانە 6 ءىرى مۇناي كومپانيالارى جاعالاردى بەكىتۋگە، قورعاۋ دامبالارىن سالۋعا جۇمىلدىرىلدى. قاجەتتى ماتەريالداردىڭ (قاپشىق، كۇرەس جانە تب) رەزەرۆىن دايىندالىپ، ينەرتتى زاتتار جيناقتالدى"، - دەپ جازدى اكىمنىڭ ورىنباسارى جەلىدە.
ونىڭ ايتۋىنشا ورىنبور وبلىسىنداعى يريكلا سۋ قويماسىنان جايىققا جىبەرىلگەن سۋ قازاقستان اۋماعىندا باتىس قازاقستان وبلىسى ارقىلى اتىراۋعا وبلىستىڭ يندەر، ماحامبەت اۋداندارىنىڭ اۋماعىمەن اعىپ كەلەدى.
"يندەر اۋدانى بويىنشا جاعا بەكىتۋ جۇمىستارىنا 54 ارنايى تەحنيكا، 408 قىزمەتكەر جۇمىلدىرىلعان. ءقازىر اۋداندا جايىق وزەنىنىڭ جاعالاۋىنداعى ءقاۋىپتى اۋماقتارعا جالپى ۇزىندىعى 10 كم بوگەت سوعىلدى. ول جۇمىستارعا 37950 دانا قاپشىق پايدالانىلدى. تاسقىنعا قارسى كۇرەس جۇمىستارى جالعاسۋدا.ماحامبەت اۋدانى بويىنشا ەلدى مەكەندەردىڭ سۋدان قورعانۋ بوگەتتەرىنىڭ جالپى ۇزىندىعى – 80 كيلومەتر. جايىق وزەنى بويىندا ورنالاسقان 17 ەلدى مەكەننىڭ ىشىندە 9 قورعانۋ بوگەتى وسال. ولار تالدىكول، بەيبارىس، العا، ماحامبەت، سارىتوعاي، ەسكى سارايشىق، ەڭبەكشىل، ەسبول جانە ورتاقشىل اۋىلدارى تۇسىندا. تاسقىننان قورعانۋ ءۇشىن 56 مىڭ دانا قاپشىققا توپىراق قاپتالىپ، وزەن جاعالاۋى بەكىتىلدى. بۇل جۇمىستارعا بارلىعى 95 تەحنيكا، 142 قىزمەتكەر، 1300 ەرىكتى جۇمىلدىرىلدى. ال، جايىق وزەنىنىڭ قۇيار ساعاسىنداعى اتىراۋ قالاسىندا بارلىعى 12 اۋماقتا جاعا بەكىتۋ جۇمىستارىن 172 تەحنيكا جۇزەگە اسىرۋدا. ءقازىر جاعا بەكىتۋ بويىشا 2 مەتر بيىكتىكتە جالپى ۇزىندىعى 7 كم بوگەتتەر سالىندى. جۇمىستا بارلىعى 100 000 دانا قاپشىق پايدالانىلدى. جۇمىستار جالعاسۋدا.قازىرگى تاڭدا اتالعان جۇمىستاردى جالپى سانى 5 مىڭنان استام ادام ىسكە اسىرۋدا. ونىڭ ىشىندە، اكىمدىكتىڭ جانە قورعانىس مينيسترىلىگىنىڭ، ۇلتتىق ۇلاننىڭ، توتەنشە جاعدايلار، پوليسيا دەپارتامەنتتەرىنىڭ وكىلدەرى جۇمىلدىرىلعان"،- دەدى ول.
بۇل ىسكە 4 000-عا جۋىق ەرىكتىلەر توبى دا ۇلەس قوسۋدا.
«ءبىراق بۇل ءالى دە جەتكىلىكسىز. سەبەبى، بۇگىن ورىنبورداعى يريكلا سۋ قويماسى رەكوردتى سۋ كولەمىن تاعى دا جىبەردى. مۇنداي سۋ كولەمى ءبىزدىڭ تاريحىمىزدا بولماعان! سوندىقتان ەل بولىپ، بىرىلىگىمىزدى كورسەتىپ قالامىزدى اپاتتان امان الىپ قالۋعا جۇمىلايىق. بىزگە ءار اتىراۋلىقتىڭ كومەگى كەرەك. بارلىعىمىز ءبىر كىسىدەي جايىق جاعاسىن كوتەرەيىك. كوپ تۇكىرسە كول دەگەندەي، ءار ازامات ءبىر قاپشىق قۇمدى جاعاعا اكەلسە، ۇلكەن بەكەت بولارى ءسوزسىز. ءبىز بۇل سىناقتان بىرلىك ارقىلى عانا شىعا الامىز! بارشاڭىزدى جاعا بەكىتۋ جۇمىستارىنا قاتىسۋعا شاقىرامىن!»، - دەپ تولىقتىردى اكىمنىڭ ورىنباسارى.
