استانا ماڭىنداعى «ارعىماق» ات-سپورتتىق ساۋىقتىرۋ كەشەنىندە ەلوردالىق ەلشىلەردىڭ قاتىسۋىمەن 5ء-شى دۇنيەجۇزىلىك كوشپەندىلەر ويىندارى اياسىندا «اتقا ءمىنۋ ءداستۇرى» رەسپۋبليكالىق چەللەندجى ءوتتى، دەپ حابارلايدى قالالىق اكىمدىكتىڭ رەسمي سايتى.
جىلدىڭ ەڭ ماڭىزدى وقيعاسى سانالاتىن 5ء-شى دۇنيەجۇزىلىك كوشپەندىلەر ويىندارىن قولداۋعا جانە جوبانى حالىق اراسىندا ناسيحاتتاۋ ماقساتىندا قۇرىلعان ءبىر توپ ەلشى ايتۋلى شارانىڭ كۋاسى بولدى. ەلشىلەردىڭ قۇرامىندا ۇلتتىق ات سپورتى فەدەراسياسى مەن ۇلتتىق سپورت تۇرلەرى قاۋىمداستىعىنىڭ نەگىزىن قالاۋشىلاردىڭ ءبىرى، «اتبەگىلەر مەن شاباندوزدارى» قازاقستاندىق ۇيىمىنىڭ ءتوراعاسى، ۇلتتىق سپورت تۇرلەرىنەن ەڭبەك سىڭىرگەن جاتتىقتىرۋشى، جازۋشى-پۋبليسيست سادىبەك تۇگەل بولدى. ءىس-شارا الدىندا سادىبەك تۇگەل قاتىسۋشىلارعا اق باتاسىن بەرىپ، كەزەكتى رەسپۋبليكالىق «اتقا ءمىنۋ ءداستۇرى» چەللەندجىنىڭ شىمىلدىعىن اشىپ بەردى.
«دۇنيەجۇزىلىك كوشپەندىلەر ويىندارىنا قاتىساتىن بارلىق سپورتشىلارعا شىن جۇرەكتەن ساتتىلىك تىلەيمىن! سىزدەر قازاق حالقىنىڭ ماقتانىشى بولىپ، ۇلتتىق سپورتىمىزدى الەمگە تانىتادى دەگەن سەنىمدەمىن. ءاربىر جارىستا ءوز شەبەرلىكتەرىڭىزدى، باتىلدىقتارىڭىزدى جانە قاجىرلى ەڭبەكتەرىڭىزدى كورسەتىپ، ەلىمىزدىڭ تۋىن بيىككە كوتەرۋلەرىڭىزگە تىلەكتەسپىن. جەڭىستى ساتتەرىمىز كوپ بولىپ، اتا-بابالارىمىزدىڭ رۋحى سىزدەرگە قۋات بەرسىن!» - دەدى استانا قالاسىنىڭ ەلشىسى سادىبەك تۇگەل.
ايتۋلى شاراعا استانا قالاسى دەنە شىنىقتىرۋ جانە سپورت باسقارماسىنا قاراستى مەكەمە قىزمەتكەرلەرى جانە ەلىمىزگە تانىمال ءبىرقاتار سپورتشىلار قاتىستى.
ايتا كەتەيىك، «بىرلىك كەرۋەنى» جوباسى ەلىمىزدىڭ بارلىق ايماعىندا ۇيىمداستىرىلۋدا. استانا قالاسىنىڭ ءبىر توپ ەلشىسى كۇنى كەشە كوكپاردان وتكەن شەبەرلىك ساباعىنا ارنايى قاتىسقان بولاتىن. ۇيىمداستىرۋشىلاردىڭ ايتۋىنشا، «بىرلىك كەرۋەنى» جوباسى اياسىندا قۇرىلعان ەلشىلەر الداعى ۋاقىتتا دا ەلوردا تورىندە ۇلتتىق سپورت تۇرلەرىنەن وتەتىن جارىستاردىڭ كۋاسى بولادى.