سىبايلاس جەمقورلىققا قارسى ءىس-قيمىل اگەنتتىگى ماڭعىستاۋ وبلىسىنىڭ قىلمىستىق ىستەر جونىندەگى اقتاۋ قالالىق سوتى ءتوراعاسىنىڭ ۇستالعانىن راستادى، دەپ حابارلايدى Ulys
«قىلمىستىق-پروسەستىك كودەكستىڭ 550- بابىنا سايكەس، باس پروكۋرورمەن كەلىسىلگەن سوتقا دەيىنگى تەرگەۋ اياسىندا ماڭعىستاۋ وبلىسىنىڭ قىلمىستىق ىستەر جونىندەگى اقتاۋ قالالىق سوتىنىڭ ءتوراعاسى ۇستالدى. ول سەنىمدى ادامى – اقتاۋ قالاسىنىڭ تۇرعىنى ارقىلى سوتتالۋشىدان وعان قاتىستى باس بوستاندىعىنان ايىرۋدان باسقا جازاعا ۇكىم شىعارۋ سىلتاۋىمەن 18 ملن تەڭگە كولەمىندە اقشالاي قاراجات العان»، - دەپ حابارلايدى انتيكور.
دەرەككوزگە سۇيەنسەك، ول اقتاۋ قالاسىنىڭ تەرگەۋ يزولياتورىنا قامالدى.
«كونستيتۋسيانىڭ 77-بابى 3-تارماعىنىڭ 1-تارماقشاسىنا جانە قىلمىستىق-پروسەستىك كودەكستىڭ 19-بابى 1-بولىگىنە سايكەس، قىلمىستىق قۇقىق بۇزۋشىلىق جاساۋداعى كىناسى سوتتىڭ زاڭدى كۇشىنە ەنگەن ۇكىمىمەن بەلگىلەنگەنگە دەيىن ءاربىر ادام كىناسىز دەپ ەسەپتەلەدى»، - دەپ ەسكەرتەدى انتيكور.