اقتاۋدا بىلتىرعى جەلتوقسان ايىندا ءازەربايجان اۋەكومپانياسىنىڭ ۇشاق اپاتىندا قايتىس بولعانداردى ەسكە الۋ اسى ءوتتى. ءىس-شاراعا قازاقستاننىڭ ازەربايجانداعى ەلشىلىگى مەن ماڭعىستاۋ وبلىسىنىڭ اكىمدىگى ۇيىتقى بولدى.
ءىس-شاراعا ماڭعىستاۋ وبلىسىنىڭ اكىمى نۇرداۋلەت قيلىباي، قازاقستاننىڭ ازەربايجانداعى ەلشىسى ءالىم بايەل، ازەربايجاننىڭ قازاقستانداعى ەلشىسى اگالار اتاموگلانوۆ، ازەربايجاننىڭ اقتاۋداعى باس كونسۋلى ايحان سۋلەيمانلى، قازا تاپقان قازاقستاندىقتاردىڭ وتباسى مۇشەلەرى، ازەربايجان دياسپوراسىنىڭ وكىلدەرى، قۇتقارۋ جۇمىستارىنا قاتىسقان مەكەمەلەردىڭ وكىلدەرى، اقتاۋ قالاسىنىڭ جۇرتشىلىعى قاتىستى. ءىس-شارانىڭ باسىندا قاسيەتتى قۇران اياتتارى وقىلدى.
ماڭعىستاۋ وبلىسىنىڭ اكىمى نۇرداۋلەت قيلىباي قازا تاپقانداردىڭ جاقىندارىنا كوڭىل ايتىپ، قازاقستان پرەزيدەنتى قاسىم-جومارت توقايەۆتىڭ تاپسىرماسى بويىنشا ۇشاق اپاتىنىڭ سالدارىن جويۋ جانە ونىڭ سەبەپتەرىن انىقتاۋ، زارداپ شەككەندەرگە كومەك كورسەتۋ جونىندەگى ۇكىمەتتىك كوميسسيا قۇرىلعانىن ەسكە سالدى. قازاقستاننىڭ قۇزىرەتتى ورگاندارى، سونىڭ ىشىندە ماڭعىستاۋ وبلىسىنىڭ اكىمدىگى قايعىلى وقيعا كەزىندە بارلىق قاجەتتى شارالاردى قابىلدادى. ن. قيلىباي قۇتقارۋشىلارعا، دارىگەرلەرگە جانە بەي-جاي قالماعان بارلىق قازاقستاندىقتارعا تاعى دا العىسىن ءبىلدىردى.
قازاقستاننىڭ ازەربايجانداعى ەلشىسى ءالىم بايەل قازاقستان مەن ازەربايجان اراسىنداعى قارىم-قاتىناستىڭ بۇگىندە شىن مانىندە وداقتاستىق سيپاتىنا يە بولعانىن اتاپ ءوتتى. ول كاسپيي تەڭىزىنىڭ شىعىسى مەن باتىسىندا ورىن تەپكەن قازاقستان مەن ازەربايجاننىڭ تۇركى الەمىنىڭ بەلسەندى ويىنشىلارى، سونداي-اق ەۋرازيا كولىك-لوگيستيكالىق ارحيتەكتۋراسىنىڭ ماڭىزدى بۋىندارىنا اينالىپ وتىرعانىن ايتتى.
ءا. بايەل ازەربايجان پرەزيدەنتى يلحام الييەۆتىڭ قايعىلى وقيعادان كەيىن ەلدەرىمىز اراسىنداعى دوستىق پەن باۋىرلاستىقتىڭ ودان سايىن كۇشەيە تۇسكەنى تۋرالى سوزدەرىن ەسكە سالدى. وسى تۇرعىدا ول قازاق تاراپىنىڭ ازەربايجاندىق كاسىپكەر اميل يۋسيفوۆتىڭ ۇشاق اپاتىنان قازا تاپقانداردىڭ وتباسىلارىنا كومەك كورسەتۋ تۋرالى ۇسىنىسىن ريزاشىلىقپەن قابىلداعانىن اتاپ ءوتتى. ءوز كەزەگىندە ازەربايجاندىق بيزنەسمەن قازاقستاندا تابىستى جۇمىس ىستەپ جاتقانىن جانە قازاق ەلىنە قولداۋ كورسەتۋدى وزىنە مىندەت سانايتىنىن جەتكىزدى.
ءىس-شارا بارىسىندا اميل يۋسيفوۆ قازا تاپقان قازاقستاندىقتاردىڭ جاقىندارىنا الماتى قالاسىنىڭ جاڭا تۇرعىن ءۇي كەشەنىندەگى بەس ەكى بولمەلى پاتەردىڭ كىلتتەرىن تابىس ەتتى. پاتەرلەر جيھازبەن جانە تۇرمىستىق تەحنيكامەن جابدىقتالعان. سونىمەن قاتار، مەسەنات ماڭعىستاۋ وبلىسىنىڭ توتەنشە جاعدايلار دەپارتامەنتىنە، اقتاۋ قالاسىنىڭ اۋرۋحاناسى مەن جەدەل جانە شۇعىل مەديسينالىق جاردەم ستانسياسىنا ءۇش جاڭا اۆتوكولىك سىيلادى.
قازا تاپقانداردىڭ جاقىندارى مەن زارداپ شەككەندەرگە كومەك كورسەتۋگە اتسالىسقان مەكەمەلەردىڭ قىزمەتكەرلەرى ازەربايجاندىق كاسىپكەرگە العىستارىن ايتتى. وبلىس اكىمى ن. قيلىباي ماڭعىستاۋ وبلىسىنىڭ جۇرتشىلىعى اتىنان ريزاشىلىق ءبىلدىرىپ، ءىس-شارانىڭ قازاق-ازەربايجان دوستىعىنىڭ تاعى ءبىر جارقىن ۇلگىسى ەكەنىن اتاپ ءوتتى.