«الماتى سۋ» باس ديرەكتورىنىڭ ورىنباسارى جانە قىزىلوردا وبلىسىنىڭ كاسىپكەرلىك باسقارماسىنىڭ باسشىسى ۇستالدى. بۇل تۋرالى انتيكور حابارلادى.
سىبايلاس جەمقورلىققا قارسى قىزمەت بيزنەس ءۇشىن جۇيەلى كەدەرگىلەردى جويۋعا ەرەكشە نازار اۋدارادى.
سونداي-اق، كاسىپكەرلەردىڭ قىزمەتىنە، ونىڭ ىشىندە قىلمىستىق-قۇقىقتىق شارالاردى قولدانا وتىرىپ، زاڭسىز ارالاسۋدىڭ جولىن كەسۋ جۇمىسى اگەنتتىكتىڭ ەرەكشە باقىلاۋىندا.
الماتى قالاسى بويىنشا دەپارتامەنتىمەن وسى جۇمىس شەڭبەرىندە اۋىر جەمقورلىق قىلمىس جاساۋدا «الماتى سۋ» شجق مكك باس ديرەكتورىنىڭ ورىنباسارى اشكەرەلەندى.
ول جەرگىلىكتى كاسىپكەردەن ورىندالعان جۇمىستاردىڭ اكتىلەرىنە قول قويعانى جانە جاسالعان مەملەكەتتىك ساتىپ الۋ شارتتارى بويىنشا اقشالاي قاراجات تولەگەنى ءۇشىن 345 ملن تەڭگە كولەمىندەگى بۇرىن كەلىسىلگەن سومادان 75 ملن تەڭگە العان.
قىزىلوردا وبلىسى بويىنشا سىبايلاس جەمقورلىققا قارسى قىزمەت وبلىستىق كاسىپكەرلىك جانە ونەركاسىپ باسقارماسىنىڭ باسشىسىن جالپى قامقورلىعى مەن كەلىسىمشارتتى ۇزارتۋعا جانە جەر قويناۋىن ءوندىرۋ كولەمىن ۇلعايتۋ رۇقساتىنا قول قويعانى ءۇشىن ايتارلىقتاي مولشەردە پارا الدى دەگەن كۇدىك بويىنشا ۇستادى.
كۇدىكتىلەرگە قاتىستى سوتتىڭ سانكسياسىمەن «قاماۋدا ۇستاۋ» تۇرىندەگى بۇلتارتپاۋ شاراسى قولدانىلدى.
اتالعان ىستەر بويىنشا تەرگەۋ جالعاسۋدا.
Transparency International «سىبايلاس جەمقورلىقتى قابىلداۋ يندەكسى» حالىقارالىق رەيتينگىندە 2024 جىلى قازاقستان ناتيجەلەرىن تاعى دا جاقسارتتى، دەپ حابارلايدى Ulys انتيكورعا سىلتەمە جاساپ.
الەم بويىنشا ورتاشا بالل – 43، ال «شىعىس ەۋروپا جانە ورتالىق ازيا» ايماعىندا (19 ەل) 35 بولدى.
قازاقستان رەيتينگىنىڭ 2016 جىلدان باستاپ ايتارلىقتاي وسكەن ەل رەتىندە اتاپ ءوتىلدى – 11 باللعا (29 باللدان) ءوسۋ.
«ورتالىق ازيا ءوڭىرى ەلدەرىنىڭ ىشىندە قازاقستان ەڭ جوعارى پوزيسيانى يەلەنەدى جانە رەيتينگتى جاقسارتقان جالعىز ەل بولىپ سانالادى. يندەكستە قازاقستاننان كەيىن ءۇندىستان (38)، يندونەزيا (37)، ارگەنتينا (37)، سەربيا (35)، ۋكراينا (35)، برازيليا (34)، تايلاند (34)، تۇركيا (34)، بەلارۋس (33)، رەسەي (22) جانە ت.ب. ەلدەر ورنالاسقان. جەمقورلىقتى قابىلداۋ يندەكسى قازاقستاننىڭ رەيتينگىن شىعارۋ ءۇشىن 9 ءتۇرلى ۇيىمنىڭ دەرەكتەرى پايدالانىلعان كومپوزيتتىك يندەكس بولىپ سانالادى. رەيتينگ مەملەكەتتىك سەكتورداعى سىبايلاس جەمقورلىقتى قابىلداۋدىڭ ساراپتامالىق جانە بيزنەس-باعالاۋلارىنا نەگىزدەلگەن»، - دەلىنگەن انتيكور حابارلاماسىندا.
پارلامەنت ءماجىلىسىنىڭ بۇرىنعى ءتوراعاسى نۇرلان ءنىعماتۋليننىڭ اعاسى ارعىن نىعماتۋلين تەرگەۋ باستالعانعا دەيىن ەلدەن كەتىپ قالعان. بۇل تۋرالى سىبايلاس جەمقورلىققا قارسى ءىس-قيمىل اگەنتتىگى ءتوراعاسىنىڭ ورىنباسارى دارحان قۇراقبايەۆ مالىمدەدى، دەپ حابارلايدى Ulys.
«ءبىز ونىڭ قازاقستاندا ەمەس ەكەنىن بىلەمىز. تەرگەۋ باستالعانعا دەيىن ەلدەن كەتىپ قالعان. ول قازاقستاندا ەمەس. ونى ىزدەۋ جانە ەلگە قايتارۋ بويىنشا شارالار ءجۇرىپ جاتىر. ىزدەۋ شارالارى بارلىق ەلدى قامتيدى، وعان مەملەكەتارالىق ىزدەۋ جاريالانعان»، - دەدى قۇراقبايەۆ سەنات كۋلۋارىندا جۋرناليستەردىڭ سۇراعىنا جاۋاپ بەرىپ.
ەستەرىڭىزگە سالايىق، ناۋرىز ايىنىڭ باسىندا 69 جاستاعى ارعىن نىعماتۋلينگە ىزدەۋ جاريالانعانى حابارلاندى. ونى ىزدەۋگە پروكۋراتۋرا باستاماشى بولعان، ال ىزدەۋ شارالارىن انتيكور جۇرگىزەدى.
قازاقستان فۋتبول فەدەراسياسىنىڭ بۇرىنعى باسشىلىعىنا قاتىستى تەرگەۋ ءجۇرىپ جاتىر، دەپ حابارلايدى Ulys.
قارجى مونيتورينگى اگەنتتىگى بارمەنقۇلوۆقا، سونداي-اق فەدەراسيانىڭ ءبىرقاتار بۇرىنعى قىزمەتكەرلەرىنە قاتىستى تەرگەۋ ارەكەتتەرى مەن ءتىنتۋ جۇمىستارىن جۇرگىزىپ جاتىر.
بارمەنقۇلوۆ 2021-2024 جىلدار ارالىعىندا قفف باسشىسى قىزمەتىن اتقارعان.19 قاراشادا ۇيىمنىڭ كەزەكتەن تىس وتىرىسىندا ول قىزمەتىنەن كەتتى.
ب ا ق تاراپىنان كەلىپ تۇسكەن سۇرانىستارعا بايلانىستى، قما قازاقستان فۋتبول فەدەراسياسىنىڭ بۇرىڭعى باسشىلىعىنا قاتىستى سوتقا دەيىنگى تەرگەۋدى باستاعانىن راستايدى،- دەلىنگەن قارجى مونيتورينگى اگەنتتىگى حابارلاماسىندا.
