پرەزيدەنت الماتى قالاسىنىڭ اكىمى ەربولات دوسايەۆتى قابىلدادى. قاسىم-جومارت توقايەۆقا الماتى قالاسىنىڭ بيىلعى 9 ايداعى الەۋمەتتىك-ەكونوميكالىق دامۋىنىڭ الدىن الا قورىتىندىسى باياندالدى. بۇل تۋرالى اقوردا حابارلادى.
ەربولات دوسايەۆتىڭ ايتۋىنشا، ەسەپتى كەزەڭدە قىسقامەرزىمدى ەكونوميكالىق ينديكاتور 104،1 پايىزدى قۇرادى. 2024 جىلى الماتىنىڭ وڭىرلىك جالپى ءونىمى 5،5 پايىز دەڭگەيىنە جەتىپ، كەلەسى جىلى 6،4 پايىزعا دەيىن وسەدى دەپ بولجانىپ وتىر.
بيىلعى 9 ايدىڭ قورىتىندىسى بويىنشا نەگىزگى كاپيتالعا 1 133 ميلليارد تەڭگە ينۆەستيسيا تارتىلىپ، ءوسىم 8،1 پايىزعا جەتكەن. جىل سوڭىنا دەيىن 2 تريلليون تەڭگە ينۆەستيسيا تارتىلادى.
پرەزيدەنتكە جەرگىلىكتى بيۋدجەت كىرىستەرى 27،2 پايىزعا ارتقانى جونىندە مالىمەت بەرىلدى. بۇل الماتى قالاسىن 2025 جىلعا دەيىنگى دامىتۋ باعدارلاماسى جانە 2030 جىلعا دەيىنگى ورتا مەرزىمدى پەرسپەكتيۆالارى اياسىندا باسىمدىق بەرىلگەن جوبالاردى قارجىلاندىرۋ كولەمىن ۇلعايتۋعا مۇمكىندىك بەردى. جىل باسىنان بەرى قالا بيۋدجەتى 204،5 ميلليارد تەڭگەگە ارتىپ، 1828،5 ميلليارد تەڭگەنى قۇرادى.
مەملەكەت باسشىسىنىڭ تاپسىرماسىنا سايكەس، شاعىن جانە ورتا بيزنەستى وركەندەتۋگە دەن قويا وتىرىپ، ەكونوميكانى ءارتاراپتاندىرۋ جۇمىستارى جالعاسادى. كاسىپكەرلىك سۋبەكتىلەر سانى 6،2 پايىزعا ءوسىپ، 361،1 مىڭعا جەتتى. جىل قورىتىندىسى بويىنشا الماتىنىڭ وڭىرلىك جالپى ءونىم كورسەتكىشىندەگى شاعىن جانە ورتا كاسىپكەرلىك ۇلەسى 60 پايىزعا دەيىن ارتادى.
پرەزيدەنت تاپسىرماسىن ورىنداۋ ماقساتىندا قالانىڭ دامۋىن ساپالى قامتاماسىز ەتۋگە جانە ءتيىمدى باقىلاۋعا ارنالعان قالا قۇرىلىسى رەگلامەنتى، قۇرىلىس جۇرگىزۋ ەرەجەسى جانە تۇرعىن ءۇيدى رەنوۆاسيالاۋ باعدارلاماسىنىڭ جاڭا جوباسى ازىرلەندى. وزگەرىستەر جىل سوڭىنا دەيىن قالالىق ءماسليحاتتىڭ سەسسياسىندا بەكىتىلەدى.
قاسىم-جومارت توقايەۆقا بيىل دەنساۋلىق ساقتاۋ ينفراقۇرىلىمىن جاڭعىرتۋعا ارنالعان بيۋدجەت 2،5 ەسە ءوسىپ، 26،3 ميلليارد تەڭگەگە جەتكەنى تۋرالى ەسەپ بەرىلدى. تامىز ايىندا ەلىمىزدەگى العاشقى ەرتە ارالاسۋ ورتالىعى اشىلدى. بۇل مەكەمە ۆەدومستۆوارالىق ءىس-قيمىلدى ۇيلەستىرىپ، بالالار اراسىنداعى مۇگەدەكتىكتى تومەندەتۋمەن شۇعىلدانادى.
اكىمنىڭ ايتۋىنشا، باسىم باعىتتىڭ ءبىرى – ينجەنەرلىك ينفراقۇرىلىمدى جاڭارتۋ. ەسەپتى كەزەڭدە 219 شاقىرىم سۋمەن جابدىقتاۋ جانە سۋ تارتۋ جەلىلەرى سالىنىپ، قولدانىستاعى 27،3 شاقىرىم جەلى جاڭارتىلدى. بۇدان بولەك، 66 شاقىرىم ەلەكترمەن جابدىقتاۋ جەلىسى رەكونسترۋكسيالاندى.
مەملەكەت باسشىسىنا الماتىنىڭ جاسىل جەلەگىن كوبەيتۋ جونىندەگى تاپسىرماسىنىڭ ورىندالۋ بارىسى باياندالدى. وعان كۇتىم جاساۋ ءۇشىن 110 شاقىرىم تامشىلاتىپ سۋارۋ جۇيەسى ورناتىلعان. جىل سوڭىنا دەيىن ساياباقتاردىڭ اۋدانى 996 گەكتارعا دەيىن كەڭەيەدى.
پرەزيدەنت قاسىم-جومارت توقايەۆ كەزدەسۋ سوڭىندا قالا ەكونوميكاسىنداعى شاعىن جانە ورتا بيزنەس ۇلەسىن ارتتىرۋ، ترانسپورت قۇرىلىمىن دامىتۋ جانە قوعامدىق كولىكتەردى ەكولوگيالىق تالاپتارعا سايكەستەندىرۋ، سونداي-اق ينجەنەرلىك جانە الەۋمەتتىك ينفراقۇرىلىمدى ساپالى جاڭعىرتۋ جونىندە ءبىرقاتار ناقتى تاپسىرما بەردى.
