ق ر پرەمەر-مينيسترى ءاليحان سمايىلوۆتىڭ توراعالىعىمەن وتكەن جاڭا جىلداعى ءبىرىنشى ۇكىمەت وتىرىسىندا قازاقستانداعى قازىرگى سانيتاريالىق-ەپيدەميولوگيالىق احۋال قارالدى. بۇل تۋرالى ۇكىمەتتىڭ باسپا ءسوز قىزمەتى حابارلايدى.
دەنساۋلىق ساقتاۋ ءمينيسترى اجار عينياتتىڭ ايتۋىنشا، 2023 جىلدىڭ قورىتىندىسى بويىنشا جۇقپالى اۋرۋلار بويىنشا ەپيدەميولوگيالىق احۋال تۇراقتى بولىپ قالدى. الدىن الۋ شارالارىنىڭ ارقاسىندا 20 اسا ءقاۋىپتى جۇقپالى اۋرۋ تىركەلگەن جوق، ولاردىڭ اراسىندا وبا، تىرىسقاق جانە پوليوميەليت بار. سونداي-اق 39 ينفەكسيا بويىنشا، ونىڭ ىشىندە كوروناۆيرۋس، روتاۆيرۋس جانە ءجىتى ىشەك ينفەكسيالارى بويىنشا سىرقاتتانۋشىلىق تومەندەدى.
قازىرگى ۋاقىتتا ءجىتى رەسپيراتورلىق ينفەكسيالارمەن سىرقاتتانۋدىڭ كەزەكتى ماۋسىمى ءجۇرىپ جاتىر، ول جىل سايىن قازاننان مامىرعا دەيىن سوزىلادى. الدىن الۋ ماقساتىندا وتكەن جىلى قاۋىپ-قاتەر توبىنا جاتاتىن 2،4 ملن ادام تۇماۋعا قارسى ەكپە الدى، بۇل حالىقتىڭ 12%-ىن قۇرايدى. بۇل رەتتە ددسۇ ۇسىناتىن دەڭگەي كەمىندە 10%-دى قۇرايدى.
جالپى ەپيدەميولوگيالىق ماۋسىم باستالعاننان بەرى ستاسيونارلاردا 31 مىڭنان استام ناۋقاس ەمدەلدى، 2 ملن-نان استام ناۋقاس امبۋلاتوريالىق ەم الدى. ەل بويىنشا بارلىعى 10 مىڭعا جۋىق ينفەكسيالىق توسەك-ورىن قويىلدى، ولاردىڭ ىشىندە بالالار ءۇشىن شامامەن 3 مىڭ توسەك-ورىن قاراستىرىلعان.
COVID-19 پاندەمياسىنىڭ اياقتالۋىنا قاراماستان، ءتيىستى باقىلاۋ جالعاسىپ جاتىر. قازاقستاندا كوروناۆيرۋستىق ينفەكسيا بويىنشا جاعداي تۇراقتى. سوڭعى جارتى جىلدا اي سايىن 100-دەن 400-گە دەيىن جاعداي تىركەلگەن، بۇل كوروناۆيرۋستىڭ جىل بويى تارالاتىنىن راستايدى.
2023 جىلدىڭ سوڭىندا ەلدە 29 مىڭنان استام قىزىلشا جۇقتىرۋ جاعدايى تىركەلدى، ونىڭ 80%-ى 14 جاسقا دەيىنگى بالالارعا تيەسىلى. 1 قاڭتاردان باستاپ 1 674 قىزىلشامەن سىرقاتتانۋشىلىق تىركەلدى. جاعدايدى تۇراقتاندىرۋ ءۇشىن وتكەن جىلى جوسپار بويىنشا ۆاكسينالاۋ جۇرگىزىلدى، ناتيجەسىندە التى جاسقا دەيىنگى 700 مىڭعا جۋىق بالا ەكپە الدى.
وعان قوسا ۇكىمەت رەزەرۆىنەن قاراجات ءبولىنىپ، قىزىلشاعا، قىزامىققا جانە پاروتيتكە قارسى 1،5 ملن دوزا ۆاكسينا ساتىپ الىندى. بۇگىنگى تاڭدا قوسىمشا ۆاكسينالاۋ اياسىندا 930 مىڭنان استام ادام ەكپە الدى، كۇن سايىن 20 مىڭنان استام ادام ۆاكسينا الۋدا.
وڭىرلەردە قىزىلشاعا قارسى يممۋنيزاسيانى كۇشەيتۋ جونىندەگى شارالار تۋرالى قاراعاندى وبلىسىنىڭ اكىمى ەرماعانبەت بولەكپايەۆ پەن قوستاناي وبلىسىنىڭ اكىمى قۇمار اقساقالوۆ ايتىپ بەردى.
پرەمەر-مينيستر مونيتورينگ قورىتىندىسى بويىنشا وتكەن جىلى ەڭ ءقاۋىپتى ينفەكسيالارمەن اۋىرعان ناۋقاستار تىركەلمەگەنىن ايتتى. بۇل رەتتە كەڭ تارالعان ۆيرۋستىق ينفەكسيالار بويىنشا دا كورسەتكىشتەر تومەندەدى.
«تەك وتكەن جىلدان بەرى ەلىمىزدە قىزىلشامەن اۋىرعاندار سانى ايتارلىقتاي ءوسىپ كەتتى. ول سوڭعى 10 جىلدا بولماعان كورسەتكىشكە جەتىپ وتىر. ولاردىڭ 80%-عا جۋىعى – 14 جاسقا دەيىنگى بالالار. اۋىرعانداردىڭ كوپشىلىگى – ءتيىستى ەكپە الماعاندار»، — دەدى ءاليحان سمايىلوۆ.
سونىمەن قاتار ۇكىمەت باسشىسى ەكپە الماعان ناۋقاستاردىڭ اۋرۋى اسقىنىپ كەتۋ ءقاۋپى جوعارى ەكەنىن ايتتى. دەگەنمەن اتا-انالاردىڭ اراسىندا بالالارىنا ەكپەنى ادەيى سالعىزباي، باس تارتىپ وتىرعانداردىڭ قاتارى از ەمەس، مۇنىڭ سوڭى اۋىر زارداپتارعا الىپ كەلۋى مۇمكىن.
«جاعدايدى تۇراقتاندىرۋدىڭ جالعىز جولى – ەكپە سالۋ. قىزىلشاعا قارسى جاپپاي يممۋنيزاسيا جۇرگىزۋ ءۇشىن قوسىمشا 1،5 ملن دوزا ۆاكسينا ساتىپ الىندى. وسى ماقساتتار ءۇشىن ۇكىمەت وتكەن جىلدىڭ قىركۇيەك ايىندا رەزەرۆتەن 3 ملرد تەڭگەدەن استام قاراجات ءبولدى. الايدا، كورىپ وتىرعانىمىزداي، كەيبىر وڭىرلەردە قىزىلشاعا قارسى يممۋنيزاسيامەن قامتۋ دەڭگەيى ءالى دە تومەن»، — دەدى پرەمەر-مينيستر.
وسىعان بايلانىستى ءاليحان سمايىلوۆ قىزىلشاعا قارسى ۆاكسينالاۋ جۇمىستارىن كۇشەيتۋدى، سونداي-اق باسقا دا پروفيلاكتيكالىق ەكپەلەرمەن ۆاكسينالاۋدى جانداندىرۋدى تاپسىردى.
«جول قاتىناسى قيىن جانە شالعايداعى اۋىل تۇرعىندارىن ۆاكسينالاۋ ءۇشىن جاعداي جاساۋ كەرەك»، — دەدى ۇكىمەت باسشىسى.
سونداي-اق ۇكىمەت باسشىسى مەديسينا قىزمەتكەرلەرىنىڭ جاۋاپكەرشىلىگىن ارتتىرا وتىرىپ، اسىرەسە اۋىلدىق جەرلەرگە جەتكىزۋ كەزىندە ۆاكسينالاردى ساقتاۋ مەن تاسىمالداۋدىڭ ءتيىستى رەجيمىن قامتاماسىز ەتۋ قاجەتتىگىن ايتتى.
«باسپاسوزدە جانە الەۋمەتتىك جەلىلەردە ۆاكسيناسياعا قاتىستى ادەيى جالعان اقپاراتتىڭ تارالۋىنا مونيتورينگ جۇرگىزىپ، ولاردىڭ الدىن الۋ كەرەك. ۋچاسكەلىك دەڭگەيدەگى مەديسينا قىزمەتكەرلەرى اتا-انالارعا پروفيلاكتيكالىق ەكپەنىڭ بالالار ءۇشىن ماڭىزدىلىعى مەن قاۋىپسىزدىگى تۋرالى ءتۇسىندىرۋ جۇمىستارىن جۇرگىزۋى ءتيىس»، — دەپ تۇيىندەدى پرەمەر-مينيستر.