روزا مۇقانوۆانىڭ «مەنىڭ ۇكىم» اڭگىمەسى قازاق ادەبيەتىنە باستاعان العاشقى قادامى ەدى. جازۋشى وسى ءبىر تىرناقالدى تۋىندىسىن 6-سىنىپتا وقىپ جۇرگەندە جازىپتى. كەيىن بۇل اڭگىمە «قازاقستان پيونەرى» جۋرنالىندا جارىق كورەدى. «مەنىڭ ۇكىممەن» باستالعان قادام جازۋشىلىق جولعا بەت بۇرعىزدى. ءيا، ءبىزدىڭ بۇگىنگى كەيىپكەرىمىز – قازاق ادەبيەتىنە وزىندىك سۇرلەۋىمەن، ءوز الەمىمەن كەلگەن جازۋشى روزا مۇقانوۆا. قالامگەرمەن اڭگىمەمىز دە ادەبيەت توڭىرەگىندە ءوربىدى.
– روزا اپاي، كەز كەلگەن شىعارماشىلىق ادامىنىڭ (اقىن، جازۋشى) ءبىر ءتولقۇجاتى ىسپەتتەس شىعارماسى بولادى. «ماڭگىلىك بالا بەينە» دەسە، ەلەڭ ەتە قالاتىنىمىز – سوندىقتان. بۇل شىعارما ءسىزدىڭ عانا ەمەس، مارقۇم رەجيسسەر بولات اتابايەۆتىڭ دا وڭ جامباسىنا تۋرا كەلگەن دۇنيە بولدى دەسەك، ارتىق ايتقاندىق ەمەس. دەگەنمەن «ماڭگىلىك بالا بەينەدەن» دە بۇرىن جازۋشىنىڭ جەكە قولجازباسىندا ساقتالعان شىعارمالار بارشىلىق شىعار. جازۋ دەيتىن اۋىر جۇكتىڭ العاشقى باسپالداعى قالاي باستالدى؟
– نەگىزى، ءبىر عانا شىعارماسىن تانۋ – وبال. اتاقتى «ەركە سىلقىمنىڭ» اۆتورى ءابدىمومىن جەلدىبايەۆ اعامىزدىڭ ايتقانى ەسىمنەن كەتپەيدى. «ەركە سىلقىمنىڭ» تۇيەسىندەي كۇيلەرىم بار، ءبىراق جۇرت «ەركە سىلقىمدى» عانا بىلەدى دەپ. «ماڭگىلىك بالا بەينەنى» جۇرتتىڭ ءبارى ايتادى، دۇرىس تا شىعار. ءبىراق «ماڭگىلىك بالا بەينەدەن باسقا ەش نارسە جازباعانداي كۇيدە قالاسىڭ. «مىسىقتار پاتشالىعى»، «ساررا»، «فاريزا»، «بوپاي حانىم» سياقتى جوعارى باعا العان شىعارمالارىم بار. تۇركىستان تەاترىنداعى «فاريزانى»، ق. قۋانىشبايەۆ اتىنداعى تەاترعا «بوپاي حانىم» سپەكتاكلىن كورۋ ءۇشىن وبلىستاردان ۇشىپ كەلەتىن كورەرمەن بار. بالكىم، «ماڭگىلىك بالا بەينە» باعىندىرعان شىڭ ءوز بيىگىنەن تۇسكىسى كەلمەيتىن شىعار. بولات اتابايەۆ «ءماڭگىلىك بالا بەينەنى»، م. اۋەزوۆتىڭ «قارالى سۇلۋىن» (ينسەنيروۆكاسىن جازدىم) ساحناعا شىعارىپ ۇلگەردى. ونىڭ ەڭ ۇلكەن جوباسى «مىسىقتار پاتشالىعىن» ساحنالاۋ ەدى. مەنىڭ دە ارمانىم وسى پەسامنىڭ ساحناعا شىعۋى بولاتىن.
بۇل دراماتۋرگ پەن رەجيسسەردىڭ جۇمىس بارىسىنداعى ءبىرىن-بىرى تولىقتىرا الاتىن، ءبىرىن-بىرى ۇعا الاتىن شىعارماشىلىق تەڭدىكتىڭ كورىنىسىن اڭعارتادى. بولات بۇل شىعارماعا ەرەكشە قارادى، سۇيىسپەنشىلىكپەن بار ىنتا-شىنتاسىن سالدى. ول ءلايلا بولىپ ءومىر ءسۇردى، ءلايلانىڭ جان ازابىن كەشە ءبىلدى. ءلايلانىڭ جالعىزدىعىنا ءوز باسىنىڭ دا جالعىزدىعىن جالعادى. ءلايلادان اۆتوردىڭ جانىن كوردى. بولات شەبەر رەجيسسەر، ول ءسوز قۋمايتىن، وي ىزدەيتىن رەجيسسەر ەدى.
– ادەبيەت جىنىسقا بولىنبەيتىنى راس. ونى ءبىز الەمدىك كلاسسيكادان دا جاقسى بىلەمىز. جازۋى ەر-ازاماتتاردان كەم تۇسپەيتىن قالامگەر قىزداردىڭ شىعارمالارى ادەبيەتسۇيەر قاۋىمعا جاقسى تانىس. ادەبيەت دەيتىن ۇلى ونەردىڭ كوشىن سۇيرەۋدە نازىك قىزداردىڭ جۇتىلىپ كەتپەۋى ءۇشىن نە قاجەت؟
– جۇتىلمايتىن شىعارما جازۋ قاجەت. ءباسىن بەرمەۋى كەرەك، جاساندى جازباۋى كەرەك. شىعارما اتىڭدى شىعارادى، اتاعىڭدى دا ءوزى تانىتادى، جازۋشى ەتىپ جاريا سالادى. ءوزىڭدى-وزىڭ جازۋشى ەتىپ جاريا سالا المايسىڭ، اتىڭدى ايگىلەيتىن، داڭقىڭدى اسىراتىن كوركەم شىعارما. كوركەم شىعارمانىڭ دەڭگەيى بولەك، اۋقىمى كەڭ. بۇل – اقيقات! ادەبيەت ءسوز قۇراۋدىڭ ۇلگىسى ەمەس، ادەبيەت – جان، سانا، قاقتىعىس!
كۇندەلىكتى ءومىردىڭ پروبلەماسىن قوزعاۋ، مورال ايتۋ، تاربيە جۇرگىزۋ، اقىلمان بولىپ كوسىلۋ، لەپىرۋ – ادەبيەتءتىڭ مىندەتىنە جاتپايدى. ادەبيەت ۇمىت بولاتىن، بۇگىنگى پروبلەمانى قوزعاۋ ءۇشىن جازىلمايدى. ادەبيەت ەشقاشان شەشىلمەيتىن، شەشىمى جوق ادامزاتتىڭ ازابىن، تراگەدياسىن جازادى.
– جانكەشتىلىكتى تالاپ ەتەتىن شىعارماشىلىق دەيتىن الەمدە ايەلدىڭ سالماعى قالاي كورىنەدى؟
– ايەلدىڭ سالماعى ەر-ازاماتتارمەن بىردەي، تەڭ. «مەن ايەلمىن»، «مەنىڭ جازعان شىعارماما جولىڭدى بەر»، «جەڭىلدىك جاساڭدار» دەپ ايتا المايسىز، ايتۋعا حاقىڭىز دا جوق. ادەبيەتكە گەندەرلىك ساياساتتى دا كىرىستىرۋدىڭ قاجەتى جوق. سوعىستا ايەل دەپ، ەركەك دەپ تاڭداۋ جاسامايدى، قارۋ بارىنە ورتاق. قالام دا سول – قارۋىڭ. جازۋشى تابيعاتى – ايەل، ەركەك دەپ بولە قاراۋعا كەلمەيتىن ۇعىم. ەكەۋىنە دە قارا ءسوزدىڭ قاسيەتى قونعان، جان ورتاق، سانا ورتاق. ءبىراق تاڭداۋلىسى عانا تانىلادى.
– ايەل – نازىك جاراتىلىس. سولاي بولا تۇرا، تاريحتا قاھارمان ايەلدەردىڭ تۇلعاسى كوپ. ولاردى ەرجۇرەك ەتكەن نە سيقىر؟ ءسىزءدىڭ كەيىپكەرلەرىڭىز دە كىل قاھارمان ايەلدەردەن تۇراتىنىن جاقسى بىلەمىز. «ايەل قاھارمان كورىنسە، ونىڭ ۇرپاعى دا قاھارمان كورىنەدى، ۇلتى دا قاھارمان بولادى» دەگەنىءڭىز دە وسىنى مەڭزەسە كەرەك. دەگەنمەن ەر مەن ايەلدىڭ ورنىن سالىستىرعاندا، قوعام «باقىر باستى» ەركەككە كوبىرەك سالماق ارتاتىنىن بايقاتىپ قويادى. ال سوندا «التىن باستى» ايەلدىڭ كىناسى نەدە دەپ ويلايسىز؟
– ۇرپاقتى انا تاربيەلەيدى. ايەل جاردى دا ءوزى تاڭدايدى... وسىنىڭ ءوزى ايەل قۋاتى مەن قاھارماندىعىنىڭ كورىنىسى. ايەلگە ءالسىز دەپ قاراۋعا بولماس، ايەلدىڭ سىرتى نازىك كورىنگەنمەن، قۋاتى مىقتى. «جاقسى قاتىن، جامان ەركەكتى ادام ەتەدى» دەيدى ءبىزدىڭ حالىق. ءبىرىنشىدەن، جاقسى قاتىن جامان ەركەككە ولتىرسەڭ دە تيمەيدى، تيگەن جاعدايدا ءسوزسىز ادام ەتىپ شىعارۋعا عۇمىرىن ارنايدى. قاھارمان ەمەگەندە نە؟.. ويتكەنى ەركەگىنىڭ ەسىكتەگى باسىن، ۇرپاعى ءۇشىن تورگە شىعارۋعا بەل بۋادى، قايسار، ۇرپاق الدىنداعى مىندەتىن زور سانايدى، جاراتىلىسى سول! «ايەلدىڭ قىرىق جانى بار»، ەركەك نەگە قىرىق جاندى ەمەس؟.. ايەل – بولمىسىندا، تابيعاتىندا قاھارمان.
– كريستين حاننانىڭ «بۇلبۇل» رومانى – ءىى دۇنيەجۇزىلىك سوعىستا ەرلىك كورسەتكەن فرانسۋز قىزىنىڭ كوركەم وبرازىن سۋرەتتەگەن شىعارما. بىزدە دە سوعىستا ەرلىك كورسەتكەن باتىر قىز كوپ. ءاليا، مانشۇك، حيۋاز... ءبىراق «بۇلبۇل» سياقتى كوركەم شىعارما جازا الماعان سەكىلدىمىز. قازاق ايەلدەرى تاقىرىبىن جازۋداعى قيىندىق نەدە دەپ ويلايسىز؟
– شىنىمدى ايتسام، بۇل شىعارمانىڭ ماقتاۋى اسىپ جاتقان سوڭ مەن دە ساتىپ الدىم، ءبىراق تارتپادى. ادەبيەتتىڭ تابيعي كوركەم ءتىلى وزىنە ءتان بولماي شىققاندا وقىرمان رەتىندە كىتاپ وقي الماي قالامىن. قازاق ادەبيەتىندە سوعىس تاقىرىبىنا جازىلعان شىعارما از ەمەس. سونىڭ ىشىندە ايەل وبرازى دا قالىس قالمادى.
حح عاسىردىڭ باسىندا «ايەل تەڭدىگى» دەگەن تاقىرىپ بەلەڭ الدى. وسىعان بايلانىستى ار-ۇياتى تاپتالعان قازاق قىزدارىنىڭ اۋىر تاعدىرى ەسەلەپ جازىلدى. جۇسىپبەك ايماۋىتوۆ «كۇنىكەيدىڭ جازىعى»، ماعجان جۇمابايەۆ «شولپاننىڭ كۇناءسى»، مۇحتار اۋەزوۆ «قارالى سۇلۋ»، «قورعانسىزدىڭ كۇنى»، بەيىمبەت مايلين «كۇلپاش» سياقتى شىعارمانىڭ ءبارى كلاسسيكالىق شىعارمالار، ءبىراق قازاق قىزىنىڭ قامكوڭىل، قارالى، اۋىر تاعدىرى بەينەلەندى. ال قازاق دالاسىندا قازاقتىڭ اۋليە، دانا، قولباسشى، ساياساتكەر انالارى بولعانىن تاريحتان جاقسى بىلەمىز. وسى تاقىرىپتارعا قادام باسۋ كەرەك. جازۋشى ءشاربانۋ بەيسەنوۆانىڭ «ۇلى دالا ارۋلارى» اتتى ەڭبەگىندە قازاق دالاسىنداعى ايگىلى انالار بەينەءسىنىڭ تاريحى جيناقتالىپ، اۆتورلار ۇجىمىنىڭ جيناعى جارىق كوردى. سونداعى سۇزگە، ءسۇيىنبيكە، اقىن سارا سىندى تۇلعالاردى ءشاربانۋ اپاي تەرەڭ زەرتتەگەن. دومالاق انا، مۇرىن انا، قىزاي انا، بوپاي حانشا، ايعانىم جانە باسقالار. وسى زەرتتەۋلەر ءتۇبى كوركەم شىعارمالاردىڭ جازىلۋىنا مۇرىندىق بولادى دەپ ويلايمىن. قازاق قىزدارىنىڭ ادىلەتتى، قاھارمان وبرازىن جاسايتىن ۋاقىت كەلدى. ادەبي وبراز – ەڭ اۋەلى تاقىرىپتى زەرتتەۋ ارقىلى، ءتول تاريحىمىزدى تەرەڭ ءبىلۋ ارقىلى عانا جۇزەگە اسادى، بۇعان جىلدار كەتەتىنى داۋسىز. ءبىزدىڭ تاريحي تۇلعالار تەك اۋىزشا تاريحتىڭ دەرەكتەرىمەن شەكتەلىپ كەلدى. ادەبيەت، كينو، تەاتر –قاھارمان، قولباسشى بولعان بوپاي حانشا (كەنەسارى حاننىڭ قارىنداسى )، نازىم، گاۋھار سىندى باتىر قىزداردىڭ بەينەسىن سومداۋعا اتسالىسۋى كەرەك.
– بۇرىن ادام بالاسىندا بەلگىلى ءبىر قۇندىلىقتاردى قۇرمەت تۇتۋ بار ەدى. ءقازىر كوپ نارسە وزگەردى: ءبىراق سول وزگەرىستەردىڭ اراسىندا ءبىز ادامي قاسيەتتەردى ساقتاپ، ۇستاپ قالا الامىز با؟
– ساقتاي الامىز، ەگەر ءداستۇرىمىزدى، ۇلتتىق ەرەكشەلىگىمىزدى، انا ءتىلىمىزدى قۇندى دەپ تانىساق. ەگەر وسى قۇندىلىقتاردان اجىراپ قالساق، بىزدەگى باۋىرمالدىق پەن قايىرىمدىلىق تا، ادامي قاسيەتتەر دە، قارىم-قاتىناس تا بىرتىندەپ سونە بەرەدى، جويىلا بەرەدى.
– بۇرىن ادام جانىن ءسوز ەمدەيتىن ەدى، ءقازىر كەرىسىنشە سوزبەن بۋلليڭ جاساپ، جارالايتىندار كوبەيدى. ءسوزدىڭ ءقادىرى كەتتى دەپ ويلايمىز با؟
– ءسوزدىڭ بە؟... مەنىڭشە، تۇلعالاردىڭ ءقادىرى كەتتى. بۇرىن تۇلعالارعا قاراپايىم جۇرتتىڭ قولى جەتپەيتىن، بيلىكتىڭ دە ءسوزى وتپەيتىن. ءبىزدىڭ قوعام تۇلعالاردى قولجاۋلىق ەتىپ العانى راس، ساياساتقا دا، تويعا دا ورتاق، ءار جەردە ءارتۇرلى ءسوز ايتادى، وزگەرمەلى، ارزانقول بولىپ كەتتى.
– شىعارماشىلىق ادامى توقىرايتىن ۋاقىت بولا ما؟ ءسىزدىڭ جازۋ لابوراتورياڭىزدىڭ ەرەكشەلىگى نەدە؟
– توقىرايدى. ءبىراق توقىراعانىن بىلمەيتىندەرى بار، بىلەتىندەرى بار. جازعىم كەلەتىن تاقىرىپتار اۋەلى ءولى قالپى جاتادى، 4-5 جىلدا سانامداعى كەيىپكەرگە اقىرىنداپ جان بىتە باستايدى، فورماعا تۇسەدى، ءتاسىلى، ارەكەتى پايدا بولادى، تولىققاندى جاراتىلىپ بولعاندا عانا سىرتقا شىعارۋعا، جازۋعا بەل بايلايمىن. شىعارمالارىمنىڭ اراسى تىم ۇزاق بولاتىنى دا سوندىقتان.
– ەكى بىردەي شىعارماشىلىق ادامى ءبىر وتباسىندا توعىسقاندا ادەبي پروسەستە قيىندىق تۋا ما؟ الدە ورتاق ۇيلەسىم بار ما؟ اكىم اعانىڭ قاي قاسيەتى ءسىز ءۇشىن قۇندى؟ ول كىسى ءسىزدىڭ شىعارماشىلىعىڭىزعا باعا بەرە مە؟
– قيىندىق بولعان ەمەس، ءبىز ءبىر-بىرىمىزگە نە جازاتىنىمىزدى، نە جازىپ جۇرگەنىمىزدى ايتپايتىنبىز. ايتا قالساق، اۋزىمىزدان الدەقالاي شىعىپ كەتسە، ول شىعارما اۋاعا جايىلىپ كەتتى دەگەن ءسوز. ەشقاشان جازىلمايدى، ءبىتتى! مۇنداي وكىنىشتى ساتتەر بولعان. سول سەبەپتى مەنىڭ بىردەڭە تۇرتە باستاعانىمدى سەزسە، اكىم اعاڭ مازالاماۋعا تىرىسادى. شىعارمامدى بىتىرگەنگە دەيىن بايەك بولىپ جۇرەدى. مەن كەيبىر وزىمە ۇناعان تۇستاردى اعاڭا وقىعىم كەلىپ تۇرادى، بولىسكىم كەلىپ تۇرادى. ال تارازي مۇلدە باسقا، ول جازۋ بارىسىندا بوي جاسىرىپ تىعىلىپ، كوزگە كورىنبەي جۇرەدى، پاتەر جالداپ كەتىپ تە قالادى، قاباعى اشىلمايدى، كۇيىنىپ، ىزا بولىپ، بۋلىعىپ جۇرەتىن. ونداي كەزدە مەن بايەك بولىپ، تاماعىن، اس-سۋىن دايىنداپ قۇراق ۇشامىن. بۇرىن وسى كۇي ءجيى قايتالاناتىن، شىعارمانى اياقتاعاندا تاۋ قوپارعانداي باقىتتى بولاتىن ەدى. اعاڭ 80 جاسىندا «اندرەي» دەگەن كوركەم ەسسە جازدى. عاجاپ شىعارما! مۇنان كەيىن ادەبيەت دەگەن ناقسۇيەرىمەن بۇتىندەي قوشتاستى. تۇسىنەءسىز بە؟.. ونىڭ مۇڭىن بولىسەر، شەرىن ۇعىسار، وي-ساناسىنا ورتاق بولار مەن عانا قالدىم. ءوسىبىر اۋىرلاۋ ءساتتى ول كىسى تەز جەڭە الدى، ال مەن جىلاپ ءجۇردىم، ايايتىنمىن... ول كىسى جازۋىمەن تابىسسا ەكەن دەپ شىن تىلەدىم، ءبىراق قايىرىلمادى. مەنىڭ تۇسىنىگىمدە سۋرەتكەر جازۋمەن ماڭگى بىرگە بولادى، ەرلى-زايىپتىلار سياقتى دەپ ويلايتىنمىن. سويتسەم، ولاردىڭ دا ەرلى-زايىپتىلار سياقتى ءبىرى ەرتە كەتىپ، ءبىرى سوڭىندا قالادى ەكەن.
اكىم اعاڭنىڭ بويىندا اسىل قاسيەتتەر كوپ، وتە كوپ! سونىڭ ءبىرى وسەك تىڭدامايدى، بوس سوزگە ارالاسپايدى، قيانات ءسوز ايتۋدان بويىن تازا ۇستاعان ادام، كىسى سىرتىنان ءسوز ايتپايتىن جان. بۇل – اسىل قاسيەت، مۇنداي ادامدار سيرەك قوي. الدەكىمدەر كوكەلەپ كەلىپ، ەركىن سويلەي باستاعاندا بىردەن تىيىپ تاستاپ وتىرادى. ونداي كەزدە الگى ادامنىڭ كوڭىلىنە اۋىر كەلدى عوي دەپ مەن قينالىپ وتىرامىن، ءبىر قىزىعى، جاڭاعى ادام دا كوڭىلىنە المايدى. اعاڭنىڭ ادىلدىگىن ىشتەي مويىنداپ كەتەدى.
ول كىسىنى اللا ەرەكشە سابىرمەن جاراتقان. دۇنيە توڭكەرىلىپ تۇسسە دە سابىرىن جوعالتپاعان ادام. باتىل، شەشىمىنەن اينىمايدى. وسىنداي قاسيەتتەر مەندە جوق، مۇنداي قاسيەت اركىمدە بولا بەرمەيدى.
– قازاقتىڭ قالامگەر قىزدارىنىڭ ىشىندە ءسىز قۇرمەت تۇتاتىن، ۇلگى تۇتاتىن كىمدەر بار؟ جالپى، بىرەۋگە ەلىكتەگەن كەزىڭىز بولدى ما؟
– مەن قازاق جازۋشى قىزدارىنا ەلىكتەمەدىم، كەرىسىنشە جازۋشى اعالارىما ەلىكتەدىم. مۇحتار اۋەزوۆتى ەرەكشە جاقسى كوردىم، مەكتەپ قابىرعاسىندا دا، ستۋدەنت كەزىمدە دە فوتوسۋرەتتەرىن قيىپ الىپ، جيناپ جۇرەتىن ەدىم. «ەڭلىك-كەبەكتەگى» ەڭلىكتىڭ مونولوگىن جاتتاپ الىپ، مەكتەپكە بارعانشا، قايتقانشا جاعىم تالماي، ءرولىن ويناپ، ايتىپ كەلەتىنمىن. اۋەزوۆتى ءپىرىم دەپ بىلەمىن. شىعارماشىلىعىما تاكەن ءالىمقۇلوۆتىڭ پروزاسى اسەر ەتتى. ستۋدەنت كەزىمدە ستەفان سۆەيگپەن تابىستىم. ءارى قاراي كەتە بەرەدى. سايىن مۇراتبەكوۆ پەن قاليحان ىسقاقتى اكىم تارازيدىڭ ەڭ جاقىن دوستارى بولعاندىقتان ەرەكشە ىنتامەن وقىدىم.
– شىعارماشىلىقتان جالىعاتىن كەز بولا ما؟ روزا مۇقانوۆا قالامگەر بولماسا، قاي سالانى تاڭدار ەدى؟
– شىعارماشىلىقتان جالىققان ەمەسءپىن، كەرىسىنشە ۋاقىت بولە المادىم، قارىزدارمىن. وعان بار عۇمىرىمدى سارپ ەتىپ، جانكەشتى بولىپ ءوزىمدى بۇتىندەي ارناي المادىم. جازۋ – مەنى تاڭدادى، ال مەن ساتقىندىق جاسادىم. جازۋدان گورى وتباسىمدى ىلگەرى قويدىم، بولاشاقتا كەشىرىلەمىن بە، كەشىرىلمەيمىن بە، بىلمەيمىن... جازۋ – كيە! كيەگە اباي بولۋ كەرەك! ول ماڭگى بىرگە بولا المايدى، سەنەن كوشىپ كەتەتىن مەزگىلى بولادى، ۋاقىتشا جانىڭنان ۇيا تاۋىپ قوناقتايدى. ال سەن ونىڭ يەسى رەتىندە باپتاۋىڭ كەرەك، بەرىلۋىڭ كەرەك، قارا باسىڭدى سوعان ارناۋىڭ كەرەك. بويىڭداعى بارىڭدى سارپىپ بەرۋىڭ كەرەك. كەمپىرباي اقىننىڭ «كەۋدەمنەن كوكالا ۇيرەك قوش دەپ ۇشتى» دەگەنىندەي، جازۋ ماڭگىلىككە قالمايدى، تاستاپ كەتە بارادى. مەن ءۇشىن جازۋ – ءمىناجات. تازارۋ ءۇشىن، جانىمدى ساقتاپ قالۋ ءۇشىن جازدىم. جازۋ – ويدى بۇزبايدى، جاندى كىرلەتپەيدى. جازۋ – جالعان سويلەتپەيدى. وسىنداي قاسيەت بار قالامدا.
– شاكىرت تاربيەلەپ جۇرگەن ۇستاز رەتىندە جاستارعا نە ايتار ەدىڭىز؟ ولار نەنى، كىمدى ۇلگى تۇتۋى كەرەك؟
– شاكىرتتەرىم مەنەن گورى مىقتى، تالانتتى، ءبىلىمدى، قايسار، جانكەشتى بولسا ەكەن، قالامدى كيە تۇتسا، ادال بولسا ەكەن. بولاشاعىنان ءۇمىت كۇتكەن تاماشا ءشاكىرتتەرىم بار، تەك اللا ولارعا عۇمىر بەرسىن دەپ تىلەيمىن.
– اڭگىمەڭىزگە راقمەت!
"ايقىن" گازەتى
