پرەمەر-مينيستر ولجاس بەكتەنوۆتىڭ توراعالىعىمەن وتكەن ۇكىمەت وتىرىسىندا ەلىمىزدەگى سۋ تاسقىنى جاعدايى كۇن تارتىبىنەن تىس قارالدى. بۇل تۋرالى ۇكىمەتتىڭ ءباسپااسوز قىزمەتى حابارلادى.
ۆيسە-پرەمەر قانات بوزىمبايەۆ ايتىپ وتكەندەي، قازىرگى تاڭدا ەلىمىزدەگى سۋ تاسقىنى جاعدايى تۇراقتانىپ كەلەدى. وسى اپتادا اتىراۋ وبلىسىندا سۋ تاسقىنىنىڭ شارىقتاۋ شەگى بولادى دەپ بولجانىپ وتىر. بۇگىندە جايىق وزەنىندەگى سۋ دەڭگەيى يندەربور جانە ماحامبەت كەنتتەرىندەگى سۋ بەكەتتەرىندەگى ءقاۋىپتى بەلگىلەردەن اسىپ ءتۇستى. قازىرگى ۋاقىتتا وڭىردە اۋماققا توپىراق ءۇيۋ، قۇم تولتىرىلعان قاپشىقتاردى توسەۋ، توپىراقتان بىلىكتەر سالۋ جانە سۋ ايداۋ جۇمىستارى جۇرگىزىلىپ جاتىر.
ەلىمىزدىڭ سەگىز وڭىرىندە جەرگىلىكتى اۋقىمداعى توتەنشە جاعداي رەجيمى ساقتالۋدا. اقتوبە وبلىسىنداعى ەكى ەلدى مەكەندە ءالى دە كولىك قاتىناسى جوق. تۇرعىندار ازىق-تۇلىكپەن جانە دارى-دارمەكتەرمەن قامتاماسىز ەتىلگەن.
سۋ باسقان ايماقتاردان 119 مىڭنان استام ادام، ونىڭ ىشىندە 44 مىڭ بالا ەۆاكۋاسيالاندى. بۇگىنگى تاڭدا 55،6 مىڭ ادام ءوز ۇيلەرىنە ورالدى. ازىرگە ەۆاكۋاسيالاۋ بەكەتتەرىندە 5 مىڭعا جۋىق ازامات قالدى.
سۋ تاسقىنى سالدارىنان ەلىمىزدە 12 908 تۇرعىن ءۇيدى سۋ باستى، ونىڭ ىشىندە ءۇش وڭىردە ءالى 264 ءۇي سۋ استىندا قالىپ وتىر. سونداي-اق 18 025 ساياجاي ءۇيى بار 25 921 ساياجاي ۋچاسكەلەرى سۋ استىندا قالدى.
بۇگىنگى تاڭدا 20 600 وتباسى 100 اەك مولشەرىندە ءبىر رەتتىك تولەم الدى. تولەنگەن قاراجاتتىڭ جالپى سوماسى 7،5 ملرد تەڭگەنى قۇرادى. 680 وتباسىنا 362 ملن تەڭگە كولەمىندە كەلتىرىلگەن ماتەريالدىق شىعىن وتەلدى.
568 وتباسى 710 ملن تەڭگەگە تۇرعىن ءۇيدى جوندەۋگە جانە قالپىنا كەلتىرۋگە وتەماقى الدى. وڭىرلەردە كەلتىرىلگەن زالالدى باعالاۋ جانە وتەۋ جۇمىستارى جالعاسۋدا. جاعداي تۇراقتى باقىلاۋعا الىنعان.
ولجاس بەكتەنوۆ ءتيىستى قۇرىلىمدارعا تاسقىنعا قارسى جۇمىستاردى جالعاستىرۋدى تاپسىردى. اسىرەسە، جايىق وزەنىندەگى ءقاۋىپتى دەڭگەيدەن اسىپ كەتكەن يندەربور جانە ماحامبەت ەلدى-مەكەندەرىندەگى جاعدايدى باقىلاۋعا الۋ كەرەك.
«ەۆاكۋاسيالىق بەكەتتەر كەز كەلگەن ۋاقىتتا ادامداردى قابىلداۋعا دايىن بولۋى ءتيىس. كۇشتەر مەن قۇرالدار دا ساقاداي ساي تۇرۋى كەرەك. سۋ رەسۋرستارى مينيسترلىگى مەن اتىراۋ وبلىسىنىڭ اكىمدىگى جايىق وزەنىندەگى سۋ دەڭگەيىنە تۇراقتى مونيتورينگ جۇرگىزۋدى قامتاماسىز ەتسىن»، — دەپ تاپسىردى ۇكىمەت باسشىسى.
سونىمەن قاتار اقتوبە وبلىسىندا 2 ەلدى-مەكەندە ءالى كۇنگە دەيىن كولىك قاتىناسى جوق. وندا ازىق-تۇلىك پەن دارى-دارمەكتەردىڭ بولۋىن مۇقيات باقىلاۋعا الۋ كەرەك. ەلەكتر جارىعىنسىز وتىرعان اۋىلداردا جوندەۋ جۇمىستارىن تەزدەتۋ كەرەك.
«سونداي-اق سۋ تاسقىنى جاعدايى تۇراقتالعان وڭىرلەردە اكىمدىكتەر باعالاۋ جانە جوبالاۋ جۇمىستارىن كۇشەيتۋگە ءتيىس. كەلتىرىلگەن زالالدى وتەۋ، ونىڭ ىشىندە ۇيلەر مەن ينفراقۇرىلىمدى قالپىنا كەلتىرۋ جونىندەگى بارلىق شارالار بەلگىلەنگەن مەرزىمدە ىسكە اسىرىلۋى قاجەت. ءبىز زارداپ شەككەن تۇرعىنداردىڭ مۇمكىندىگىنشە تەزىرەك قالىپتى ومىرگە قايتا ورالۋىن قامتاماسىز ەتۋىمىز كەرەك»، — دەپ تۇيىندەدى ءسوزىن پرەمەر-مينيستر.
