پارلامەنت ءماجىلىسىنىڭ دەپۋتاتى ەدىل جاڭبىرشين ەلىمىزدىڭ كومىرسۋتەك رەسۋرستارى تۋرالى ايتتى، دەپ حابارلايدى Ulys.
دەپۋتاتتىڭ اقپاراتىنا سۇيەنسەك، ءقازىر مەملەكەت ەسەبىندە 348 كومىرسۋتەك شيكىزاتى كەن ورنى بار. ال ەلدەگى مۇناي قورىنىڭ جالپى كولەمى 4،3 ملرد توننانى قۇرايدى. كومىرسۋتەك شيكىزاتى قورىنىڭ 72%-ى – «تەڭىز»، «قاشاعان»، «قاراشىعاناق» كەن ورىندارىنىڭ ۇلەسىنە تيەسىلى.
«الداعى 10-15 جىلدان كەيىن وسى ءۇش ءىرى كاسىپورىندا مۇناي-گاز ءوندىرۋ كولەمى تومەندەيتىنى انىق. وعان قوسا، يگەرۋدىڭ كەش ساتىسىنداعى كەن ورىندارىندا مۇناي-گاز ءوندىرۋ ءتىپتى ازايادى، كەيبىرى جۇمىسىن توقتاتادى. ارىپتەستەر، شىندىعىندا سوناۋ اكادەميك ساتپايەۆتىڭ كەزەڭىندەگىدەي، تاۋەلسىزدىكتىڭ سوڭعى 25 جىلىندا جۇيەلى، ماسشتابتى گەولوگيالىق زەرتتەۋ-بارلاۋ جۇمىستارى جۇرگىزىلگەن جوق. ال قازىرگى ۋاقىتتا قورلاردىڭ ءوسىمى سوناۋ كەڭەس وداعى كەزىندە اشىلعان كەن ورىندارىن قايتا باعالاۋ مەن زەرتتەۋ ەسەبىنەن تولىعىپ جاتىر»، - دەيدى جاڭبىرشين ماجىلىستە «مۇناي سالاسىنىڭ قازىرگى جاعدايى جانە ونى دامىتۋ پەرسپەكتيۆالارى» تۋرالى وتكەن ۇكىمەت ساعاتىندا.
ونىڭ ايتۋىنشا، سوڭعى بەس جىلدا مۇناي قورلارىنىڭ ءوسىمى ورتا ەسەپپەن 73 ملن توننانى قۇراسا، ال ءوندىرۋ كولەمى 80 ملن تونناعا جەتكەن.
«ياعني، مۇناي قورىنىڭ تولىعۋىنان ءوندىرۋىمىز ءقازىردىڭ وزىندە 7 ملن تونناعا ارتىق. بۇل مۇناي-گاز سالاسىنداعى زەرتتەۋ جۇمىستارى مەن ءوندىرۋدىڭ اراسىنداعى ديسبالانستى ناقتى كورسەتىپ وتىر. گەولوگيالىق بارلاۋدىڭ قازىرگى باياۋ قارقىنى مەن مۇناي ءوندىرۋدىڭ بۇگىنگى دەڭگەيى ساقتالار بولسا، تاياۋداعى 15 جىلدا ەلىمىزدىڭ كومىرسۋتەك رەسۋرستارىنىڭ قورى تاۋسىلاتىنى انىق. دۇرىسىندا مۇناي-گاز قورىمىز وندىرۋدەن كەمى 1،5 ەسەگە ارتىق بولۋى ءتيىس»، - دەيدى ماجىلىسمەن.
جاڭبىرشين قازاقستاندا كومىرسۋتەكتەردىڭ جاڭا كەن ورىندارىن اشۋ ءۇشىن قاجەتتى الەۋەت بار دەپ ەسەپتەيدى.
«گەولوگتار ەلىمىزدە 76 ملرد توننا بولجامدى وتىن رەسۋرسى بار جانە ءتۇرلى دارەجەدە زەرتتەلگەن 15 شوگىندى باسسەيندى ءبولىپ كورسەتكەن بولاتىن. الايدا 30 جىل ىشىندە 2021 جىلى ءبىر عانا جاڭا مۇناي كەن ورنى اشىلدى. دەگەنمەن، بىزدە تاۋارلىق-ماتەريالدىق قورلاردى تولتىرۋدىڭ، ءوندىرىستى ۇلعايتۋدىڭ جانە جوعارى تابىس تابۋدىڭ ناقتى مۇمكىندىكتەرى بار. ءبىراق ءقازىر بۇل مۇمكىندىكتەردى پايدالانۋ مۇمكىن بولماي وتىر. وعان سەبەپ – ەل ەكونوميكاسىنا ەداۋىر ۇلەس قوساتىن قازبا بايلىعىمىزدى دامىتۋ سالاسى تۇرالاپ، ونىڭ مۇمكىندىكتەرى شەكتەلىپ وتىر. ياعني، ەكونوميكانىڭ نەگىزىن قۇرايتىن گەولوگيا سالاسى ستراتەگيالىق شەشىم قابىلداي المايتىن، قۇزىرەتى شەكتەۋلى، بيۋروكراتيالىق شىرماۋمەن بايلانعان ۇكىمەتتىڭ كوميتەتى دەڭگەيىندە عانا جۇمىس ىستەۋگە ءماجبۇر»، - دەيدى دەپۋتات.
