Ystanbulda Qazaqstannyń saýda-ekonomıkalyq mısıasy ótti. Shara elimizdiń Indýstrıa jáne ınfraqurylymdyq damý mınıstrligi,  «Atameken» ulttyq kásipkerler palatasy, Qazaqstannyń Túrkıa Respýblıkasyndaǵy Elshiligi, Qazaqstannyń Syrtqy saýda palatasy jáne Túrkıanyń saýda palatalary men bırjalar odaǵynyń qoldaýymen uıymdastyryldy.

Qazaqstannyń Túrkıa Respýblıkasyndaǵy Elshiliginiń feısbýktegi resmı paraqshasynda jarıalanǵan  málimet boıynsha, saýda mısıasyna qazaqstandyq jáne túrik kompanıalarynyń 150-den astam ókilderi qatysty. Sonyń ishinde 30 qazaqstandyq óńdelgen ónim eksporttaýshysy boldy.

Saýda mısıasy barysynda Qazaqstannyń eksporttyq jáne ınvestısıalyq múmkindikteri, sondaı-aq, eldegi bıznes júrgizý tártibi, eksporttaýshylar men sheteldik ınvestorlarǵa kórsetiletin memlekettik qoldaý sharalary men jalpy saýda júrgizýdi yntalandyrýdyń túrli quraldary týraly baıandamalar jasaldy.

İs-shara barysynda Qazaqstan Respýblıkasynyń Túrkıa Respýblıkasyndaǵy Elshisi Abzal Saparbekuly sóılegen sózinde Túrkıa Qazaqstannyń mańyzdy strategıalyq ári basty saýda-ekonomıkalyq jáne ınvestısıalyq seriktesteriniń biri ekenin atap ótti. Sondaı-aq, Elshi eki jaqty saýdanyń 1992 jylǵy 30 mıllıon AQSH dollary kórsetkishinen búgingi tańda 2 mıllıard dollarǵa jetip otyrǵanyn aıtyp ketti.

Sonymen qatar, A. Saparbekuly táýelsizdik jyldarynda Túrkıa Qazaqstan ekonomıkasyna 3,8 mıddıard dollar shamasynda ınvestısıa quıǵanyn jáne qazirgi tańda Qazaqstan ekonomıkasynyń túrli salalarynda túrik kapıtalynyń qatysýymen 2200-ge jýyq kásiporyn jumys istep jatqanyn aıtty.

QR Indýstrıa jáne ınfraqurylymdyq damytý mınıstrliginiń Jaýapty hatshysy Mereke Pshembaev óz sózinde Qazaqstannyń Túrkıaǵa aýyl sharýashylyǵy, et ónimderi, metal jáne metal ónimderi, hımıa ónerkásibi ónimderi, mashınalar men qurylǵylar, dári-dármek, azyq-túlik jáne t.b. salalardyń eń perspektıvaly 47 taýarlyq ónimin jetkizýge daıyn ekendigin mádimdedi.

QR «Atameken» ulttyq kásipkerler palatasy Basqarmasynyń Tóraǵasy Abylaı Myrzahmetov ashylý sózinde túrik kásipkerlerin ınvestısıalyq yntymaqtastyqqa shaqyra otyryp, Qazaqstan arqyly Reseı jáne EAEB naryqtaryna shyǵýǵa bolatyndyǵyn jáne Qazaqstandaǵy ınvestısıalyq ortanyń aımaqtaǵy eń tıimdi ekenin alǵa tartty.

Saýda mısıasy sheńberinde Qazaqstan jáne Túrik kásipkerleri arasynda V2V formatynda eki jaqty kelissózder ótkizilip, sonyń nátıjesinde birqatar qazaqstandyq ónimniń túrik naryǵyna shyǵarylýy boıynsha kelisimderge qol jetkizildi.

Sondaı-aq, is-sharalar aıasynda Túrki saýda-ónerkásip palatasy men Qazaqstan-Túrkıa birikken palatasynyń alǵashqy otyrystary ótkizildi. Ázirbaıjan, Qazaqstan, Qyrǵyzstan jáne Túrkıa múshe bolyp tabylatyn bul palata múshe memleketterdiń kásipkerleri arasyndaǵy ekonomıkalyq baılanysty nyǵaıtýdy jáne eki el arasyndaǵy taýar aınalymynyń ósýin kózdeıdi.

Qazaqstan-Túrkıa birikken palatasynyń alǵashqy otyrysynda Qazaqstan Respýblıkasynyń Túrkıa Respýblıkasyndaǵy Tótenshe jáne Ókiletti Elshisi Abzal Saparbekuly sóılegen sózinde bul palatanyń Qazaqstan Respýblıkasy Tuńǵysh Prezıdenti – Elbasy Nursultan Nazarbaevtyń 2018 jylǵy 13 qyrkúıekte Ankaraǵa jasaǵan sapary barysynda qurylǵanyn jáne eki el arasyndaǵy saýda-ekonomıkalyq, ınvestısıalyq jáne tehnologıalyq yntymaqtastyqty yntalandyrý jáne nyǵaıtýdy kózdeıtinin atap ótti.