Memleket basshysy qorǵanys mınıstri Rýslan Jaqsylyqovty qabyldady. Prezıdent – Qazaqstan Respýblıkasy Qarýly Kúshteriniń joǵarǵy bas qolbasshysy Qasym-Jomart Toqaevqa qorǵanys vedomstvosynyń bıylǵy atqarǵan qyzmeti týraly esep berildi. Bul týraly Aqorda habarlady.
Memleket basshysyna bólimshelerdiń jaýyngerlik daıyndyǵy men qarýly kúshter qataryna kúzgi shaqyrý naýqanynyń nátıjeleri, sondaı-aq áskerı qyzmettegi tártip pen qaýipsizdikti nyǵaıtýǵa, áskerı qyzmetshilerdiń áleýmettik mártebesi men jalaqysyn arttyrýǵa baǵyttalǵan sharalar jóninde baıandaldy.
«Armıanyń jaýyngerlik áleýetin kezeń-kezeńimen kóterý jáne áskerdi daıarlaýdyń jańa tásilderine kóshý máselelerine aıryqsha nazar aýdaryldy. Rýslan Jaqsylyqov memlekettik qorǵanys tapsyrysynyń oryndalý barysy týraly baıandap, áskerdiń qarý-jaraq pen tehnıkanyń jańa úlgilerimen, atap aıtqanda, ushqyshsyz basqarylatyn avıasıalyq júıelerimen, radıoelektrondyq kúres keshenderimen jaraqtandyrylyp jatqanyn habardar etti. Budan bólek, jaýyngerlik mashınalardy jáne baılanys quraldaryn jańǵyrtý, rasıonalızatorlyq jumysty, sondaı-aq áskerı ınfraqurylymdy damytý máseleleri qarastyryldy.
Qasym-Jomart Toqaev elimizdiń bitimgerlik kontıngentiniń BUU aıasynda Golan jotalarynda atqaryp jatqan qyzmeti mańyzdy ekenin atap ótti», - delingen Aqorda habarlamasynda.
Kezdesý sońynda joǵarǵy bas qolbasshy Qasym-Jomart Toqaev mınıstrge otandyq qorǵanys kásiporyndarymen ózara yqpaldastyqty jandandyrý, aýmaqtyq qorǵanys pen arnaıy operasıa kúshterin damytý, áleýmettik-quqyqtyq jumysty kúsheıtý jóninde naqty mindetter júktedi.
