Talǵarda tóbeles kezinde kóz jumǵana Sherzattyń aǵasy Nurqanat Ǵaıypbaev ózine qol jumsap kóz jumdy. Almaty oblysynyń polısıasy Talǵar mańynda denesi tabylǵan Nurqanat Ǵaıypbaevtyń óliminen qatysty málimdeme jasady.
Polısıanyń aıtýynsha, marqum óleriniń aldynda aǵasyna hat jazyp, ózin Sherzattyń janyna jerleýdi suraǵan.
«Aǵa, ne istesem de keshir. Men baýyrymnyń ólgenin qalamadym. Barynsha tyrystym. Aǵa, sen biz úshin kek alý kereksiń. Sol úshin jaralǵansyń. Biraq, men istegen isti qaıtalama. Sende ul-qyz bar, solardy oıla. Meni seni qatty jaqsy kóremin, keshir», - dep jazǵan marqum.
Onyń hatyn alǵan aǵasy birden jaýap berip, qaıda júrgenin suraǵan.
«Aqymaq bolma, úıge qaıt. Bergen ýádeń qaıda? Seni qaıdan izdep tabaıyn. Mama aýyryp qalady», - dep jaýap bergen aǵasy.
Bul oqıǵaǵa qatysty polısıa túsinikteme berdi.
"Talǵar qalasynyń mańynda 30 jastaǵy er adamnyń máıiti tabylǵany boıynsha, kelesini habarlaımyz. Aldyn ala málimetterge sáıkes, ol asylý arqyly óz-ózine qol jumsaǵan.
Marqum aǵymdaǵy jyldyń 4 qazanynda qaıǵyly qaza tapqan kámeletke tolmaǵan Sherzat Polattyń aǵasy ekeni anyqtaldy.Tergeý barysynda marqum týystarynyń birine ózine-ózi qol jumsaý týraly messendjerde jibergen jazbasy anyqtaldy. Habarlamada ol týysqandarymen qoshtasyp, inisiniń janyna jerleýdi surady. Bul fakti boıynsha qylmystyq is qozǵaldy. Qazirgi ýaqytta barlyq jaǵdaılardy anyqtaý úshin tergeý amaldary júrgizilýde", - delingen habarlamada.
Eske salsaq, 4 qazan kúni Talǵar qalasynda bolǵan qaıǵyly jaǵdaı qoǵamda úlken rezonans týdyrdy. 16 jastaǵy Sherzattyń ólimine qatysty is İshki ister mınıstriniń jeke baqylaýynda. Keıin marqumnyń otbasy turatyn úıdi órtep jiberdi.
