Qazaqstanda quqyq qorǵaý organdarynyń qyzmetkerlerin basshy laýazymǵa taǵaıyndar aldynda ótirikti áshkereleıtin detektormen tekserý usynyldy, dep habarlaıdy Ulys.
«Quqyq qorǵaý organdarynyń, azamattyq qorǵaý organdarynyń, memlekettik feldegerlik qyzmetiniń qyzmetkerleri joǵary turǵan basshy laýazymdarǵa usynylǵan kezde (atestattaý nemese jospardan tys atestattaý nemese joǵary turǵan basshy laýazymǵa konkýrs aıasynda) polıgrafologıalyq zertteýden ótedi», - delingen «Ashyq NQA» portalynda jarıalanǵan qujatta.
Polıgrafıalyq zertteý mynalardy anyqtaıdy:
- quqyq qorǵaý organdarynda qyzmet etýdegi jasyryn teris sebepter (tyıym salynǵan qoǵamdyq birlestikterge, qylmystyq jáne terorıstik uıymdarǵa jumys isteý);
- esirtkige táýeldiligin, psıhotroptyq, psıhıkalyq jáne fızıkalyq táýeldilik týǵyzatyn ózge de psıhoaktıvti zattardy tutynyp-tutynbaıtynyn;
- quqyq qorǵaý organdarynda, azamattyq qorǵaý organdarynda, memlekettik feldegerlik qyzmetinde qyzmetin tolyqqandy ótkerýge kedergi keltiretin jasyryn syrqattaryn, óz-ózine qol jumsaýǵa beıimdigin;
- tabysy týraly, múlki jáne múliktik sıpattaǵy mindettemeleri, qos azamattyǵynyń bar ekeni týraly málimetterdi jasyrýyn nemese burmalaýyn;
- sybaılas jemqorlyq jasaý, bógde adamdarǵa qupıa nemese qyzmettik aqparat berý faktilerin;
- qylmystyq, sybaılas jemqorlyq quqyqbuzýshylyq jasaǵany úshin jaýapqa tartý faktilerin;
- tyıym salynǵan qoǵamdyq birlestiktermen, qylmystyq jáne terorıstik uıymdarmen qatynas jasaýyn nemese eger bul buryn olardyń qyzmettik mindettemelerine kirmese, komersıalyq qurylymdarǵa qatysýyn;
- qyzmettik ókilettigin teris paıdalaný faktilerin.
Qaýly jobasy portalda 14 aqpanǵa deıin talqylanady.
