Qorǵanys mınıstrligine qarasty Aıagóz garnızonynda ofıser kóz jumǵan. Garnızonnyń baspasóz qyzmeti áskerı qyzmetker óz úıinde sýısıd jasady dedi. Bul oqıǵaǵa Qorǵanys mınıstrligi túsinikteme berdi, dep habarlaıdy Ulsy.

Qorǵanys mınıstrligi tárbıe jáne ıdeologıalyq jumys departamentiniń bastyǵy, ádilet polkovnıgi Tileýhan Basqojaev aıtýynsha, marqum Aıagóz garnızonyna eki jylǵa shaqyrylǵan. 

«Ofıser dalalyq jumyspen baılanysty emes qarjylyq qyzmette laýazym atqarǵan. Qonys aýdarýyna baılanysty barlyq ótemaqyny, aqshany aldy. Keshe sońǵy ret ákesimen sóılesken, áskerı qyzmetke eshqandaı shaǵym túsirmegen. Múmkin, Aıagóz garnızonyna kóshýine, ıaǵnı oryn aýystyrýyna baılanysty psıhologıalyq áser bolǵan shyǵar. Qazir endi biz boljam jasamaı-aq qoıaıyq. Tergeýshi áriptesterimiz mán-jaıdy anyqtaıdy.  Biz onyń ata-anasyna, otbasyna kóńil aıtamyz. Bul durys emes. Biz shette qalmaımyz, barlyq qajetti tergeý amaldary júredi», - dedi Basqojaev Ortalyq komýnıkasıalar qyzmetinde ótken brıfıńte.

Ofıserdiń ólimi boıynsha Qylmystyq kodekstiń «Ózin-ózi óltirýge deıin jetkizý» babymen qylmystyq is qozǵalǵan.

2020 jyldan beri áskerde qaza tapqan sarbazdardyń sany 310 adamǵa jetken, dep habarlaıdy Atameken business arnasy.

Qorǵanys mınıstrligi beıbit kúnde qynadaı qyrylyp jatqan jas jigitterdiń ólimine túrli sebepterdi ataıdy: aýrý-syrqaý, sýısıd, jol-kólik oqıǵasy, taǵy basqalar.

Otan aldyndaǵy boryshyn óteýge attanǵandardyń ólimi jyldan-jylǵa artyp kele jatqanyn aıta ketken jón.

Bas áskerı prokýrordyń birinshi orynbasary Maqsat Qazıev byltyr 2020 jyl men 2023 jyl aralyǵynda armıada 270 sarbazdyń baqılyq bolǵanyn málimdegen edi.

Jýyrda ǵana Aqtaýda áskerde júrgen taǵy bir sarbaz kóz jumǵany týraly jazǵan bolatynbyz.

Prezıdent Qasym-Jomart Toqaevtyń tóraǵalyǵymen Qazaqstan Respýblıkasy Qaýipsizdik keńesiniń kezekti otyrysy ótti, dep habarlaıdy Aqorda.

Jıynda premer-mınıstrdiń orynbasary-ulttyq ekonomıka mınıstri Nurlan Baıbazarov, qorǵanys mınıstri Rýslan Jaqsylyqov, ónerkásip jáne qurylys mınıstri Qanat Sharlapaev elimizdiń qorǵanys qabiletin nyǵaıtý týraly baıandama jasaǵan.

Qaýipsizdik keńesi memlekettiń áskerı áleýetin arttyrýǵa baılanysty usynylǵan tásilderdi, sondaı-aq armıany zamanaýı qarýmen, áskerı tehnıkamen, sonyń ishinde otandyq qorǵanys kesheni kásiporyndary shyǵarǵan ónimdermen jaraqtandyrýǵa qatysty sheshim shyǵarǵan. 

Jıyn sońynda prezıdent-Qaýipsizdik keńesiniń tóraǵasy Qasym-Jomart Toqaev úkimetke jáne basqa da múddeli memlekettik organdarǵa elimizdiń áskerı uıymyn jetildirý baǵytynda birqatar naqty tapsyrma berdi.