Qýandyq Bıshimbaevty qylmys ornynda ustaǵan polısıa qyzmetkerleri jaýapqa tartyldy. Bul týraly İİM habarlady.
Astana qalalyq patrúldik polısıa polkiniń ınspektoryna qyzmettik tártipti buzǵany úshin sógis jarıalanǵan. Ol Bıshimbaevty ustaǵan kezde, áńgime barysynda: «Ol ózi mazańdy alǵan shyǵar?» dep suraǵan. Osy áńgimeniń barlyǵy vıdeo-tirkeýshige túsip qalǵan. Sotta bul vıdeodaǵy áńgime kópshilik nazaryna usynylǵan bolatyn.
Osydan keıin Astana qalasynyń polısıa departamenti bul fakti boıynsha qyzmettik tekserý bastaǵan. Sol tekseris jaqynda aıaqtalyp, qyzmet tártibin buzǵan İİM qyzmetkerine qatań sógis jarıalaǵan.
Sonymen birge qoǵamdyq oryndy lastaǵany úshin taǵy bir qyzmetker sógis alǵan. Ol Bıshimbaevpen kóshede turǵanda jerge túkirgen. Onyń da bul áreketi vıdeo-tirkeýshige jazylyp, sotta kópshilikke jarıa boldy.
«QR «Quqyq qorǵaý qyzmeti týraly» Zańynyń 19, 56-57-baptaryna, sondaı-aq qyzmettik tártipti buzǵany úshin tártiptik komısıanyń sheshimine sáıkes Patrúldik polısıa polki qyzmetiniń ınspektoryna sógis jarıalandy. Qazaqstan Respýblıkasy ÁQBtK-niń 434-2-babynyń talaptaryn buzǵany úshin (Qoǵamdyq oryndardy lastaý) Astana qalasy İİB Esil aýdanynyń jedel ýákiline qatań sógis jarıalandy», – delingen İİM baspasóz habarlamasynda.
Eske salsaq, áıel óltirdi dep aıyptalǵan burynǵy mınıstr Qýandyq Bıshimbaev 24 jylǵa sottalǵan bolatyn.