Биыл Қазақстанның басым өңірлерінде болған көктемгі су тасқыны қазақстандықтарға ауыр тиді. Елдің солтүстігі мен батыс аймақтары қатты зардап шекті, мыңдаған үйлер қирап, мал басы қырылып, жүздеген мың адамдар бас сауғалап, қауіпсіз жерге уақытша көшуге мәжбүр болды. Ол туралы талай айтылды, жазылды. Ел болып қиын күндерде бір-бірімізге қолдау көрсетіп, айтып келмейтін табиғат апатын еңсердік.
Су тасқыны кезінде қазақстандықтар бір жағадан бас, бір жеңнен қол шығарып, өзінің бірлікті ел екенін көрсетті. Еңбектеген баладан, еңкейгенген қарияға дейін апатпен күресті. Мысал ретінде айтсақ, Атырау облысы Махамбет ауданы, Бейбарыс ауылының 92 жастағы тұрғыны Орынша Қожиева жағаны бекітуге келді. 90-нан асқан қарияның «ерлігі» көпшілікке үлгі болды. Орынша апа тасқын қаупі төнгенде қол қусырып отыра алмаған.
«Мен біраз жасқа келіп қалдым. Сондықтан, менің қолымнан келетіні құм толтыруға қапшықтарды жедел дайындап отыру. Табиғаттың тосын мінезін болжап білу мүмкін емес, осы жасыма дейін мұндайдың талайын көрдік қой. Сондықтан, су тасқынына алдын - ала дайындалу керек»,-деген еді кейуана.
Қиын сәтте көмекке келгендердің арасында ересектерден бөлек мектеп оқушылары да өз үлестерін қосты. Оқушылар сабақтан кейін, Жайық өзенін бекітуге қолұшын созды.
Кентау қаласында тұратын Гауһар Шаймерден өзі жинап жүрген қаржысын Құлсары қаласының тұрғындарына аударды. Оның қайырымды ісі көпшіліктің жүрегіне ізгілік сыйлады. Әлемде қайырымдылық, ізгілік орнаған кезде кез- келген қиыншылықты жеңуге болатынын паш етті.
50 мыңнан аса еріктілер, мыңдаған белсенділер, құтқарушылар, мемлекеттік қызметкерлер, билік өкілдері күн-түн демей жұмыс жасап, зардап шеккен халыққа қолдан келгенше көмек қолын созды. Әсіресе Атырау қаласын алапат тасқын қаупінен күрес ерекше есте қалды. Халықтың көпшілігі күні-түні жағаны бекітті. Екі-үш аптаның ішінде Атырау қаласы аумағынан 200 шақырымнан асатын бөгет салынды.
Бұдан бөлек Қазақстанның басқа жағында тұратын тұрғындар зардап шеккен аймақтарға кезең-кезеңмен көмектер жөнелтті. Көптеген ерікті ұйымдар мен белсенді азаматтар, қоғамдық бірлестіктер осындай игі істердің басы-қасында болып, қиын-қыстау кезеңде тағы да ұйымшылдық, бірлігінің мығым екенін танытты. Тек Қазақстан халқы Ассамблеясы су тасқынынан зардап шеккен азаматтарға көмек беру үшін, арнайы Республикалық штаб құрып, одан әрі қарай өңірлерде штабтарды құрып гуманитарлық көмек беру бойынша жұмыстарды үйлестірді. Ассамблея мүшелері судан зардап шеккен облыстарға «Жүректен жүрекке» акциясы аясында 227 тонна гуманитарлық көмек жіберіп, 277 миллион теңге жинап, қаржылай көмек көрсетті. Сонымен қатар өңірлерде 10 мыңға жуық еріктілер зардап шеккен азаматтарға, құтқарушыларға, әскери қызметкерлерге, құрылысшыларға өз көмектерін берген.
Мұндай мысалдар жүздеп саналады. Барлығының мақсаты бір болды, ел мен жерді тасқын судан аман алып қалу еді. Мақсатқа халық болып жетіп, апаттың зардабымен бүтін ел болып күресе алдық
Кейін жағдай реттеліп, етек-жеңді жинағаннан кейін Президент Ақордада су тасқынымен күреске белсене атсалысқан азаматтарды салтанатты түрде марапаттады.
«Сын сағатта еліміз ырысты ынтымағын танытты. Біз табиғи апат кезінде жұрт болып жұмылдық. Біртұтас ел екенімізді көрсеттік. Құтқарушылар, әскерилер, ішкі істер органдары мен әкімдік қызметкерлері тәулік бойы жұмыс істеді. Олар Отан алдындағы парызын мінсіз атқарды. Бір сөзбен, антқа адал болды... Алапат су тасқындап келіп қалғанда отандастарымыз табиғат апатымен күресіп жатқан құтқарушыларға көмек қолын созды. Олар су басқан аймақтарда жауапты қызмет мекемелеріне жәрдемдесіп, жанқиярлықпен әрекет етті әрі батылдық танытты. Көбі адамдар мен жануарларды өз көліктерімен қауіпсіз жерге алып шықты. Мыңдаған жанашыр азамат тасқын судан қорғайтын бөген салуға қатысты. Ортақ күш-жігердің арқасында біз жағдайдың ушығып кетуіне жол бермедік», – деді Мемлекет басшысы 19 маусымда өткен салтанатты жиында.
Презденттен алғыс хат алғандар көп болды. Олардың арасында ветеринар Ғабит Мусинде болды. Ғабит Мусин Солтүстік Қазақстан облысы, Қызылжар ауданының Якорский ауылдық округінде 35 жылдан бері ветеринарлық фельдшер болып жұмыс істеп келеді. Ол су тасқыны кезінде жоғары кәсібилік пен көрегендік танытқан. Су тасқыны кезінде тәуліктеп жұмыс істеп, өз аумағындағы малдың барлығын аман алып қалған. Оның арқасында ерекше қауіпті аурулардың пайда болуы мен таралуына жол берілмеді.
«Мен өзім мал ауырса тағат таппайтын адаммын. Менің қарамағымда 4 ауылдың малы бар. Оның барлығына уақтылы екпе салып, тексеріп отыру қажет. Ветеринария саласында жұмыс істегеніме 30 жылдан асты. Талай қиын кезеңдерді бастан өткердік. Су тасқыны кезінде жағдай күрделі болды. Алайда жұмыла атқарған жұмыстар нәтижесін беріп жатыр. Еңбегіміз де бағаланып жатыр», - дейді Ғабит Мусин Ulys тілшісіне.
Қорыты айтқанда, жоғарыда Президент айтып кеткендей сын сағатта еліміз ырысты ынтымағын танытіп, біртұтас ел екенімізді көрсеттік. Ырысы ортаймайтын, бірлігі мығым ел ғана кез келген қиыншылыққа төтеп бере алады.
