Әзербайжан астанасы Бакуде Түркі әлемінің ортақ әліпбиі жөніндегі комиссиясының екінші отырысы өтті, деп хабарлайды Ulys ұлттық порталы ҚазАқпаратқа сілтеп жасап. 

Аталған жиынды Түркі Академиясы Әзербайжан Ұлттық Ғылым академиясы Насими атындағы Тіл білімі институтының қолдауымен, Ататүрік атындағы мәдениет, тіл және тарих жоғары кеңесі жанындағы Түрік тілі қоғамымен бірлесіп ұйымдастырды. Онда бауырлас мемлекеттердің өкілдері ортақ әліпби идеясын ілгерілету және осы бағыттағы жаңа қадамдарды талқылады. Комиссия отырысының ашылу салтанатында сөз сөйлеген Шаһин Мұстафаев ортақ әліпби мәселесі — түркі халықтары ынтымақтастығының маңызды бағыты екенін атап өтті.

«Түркі әлемінің бірлігін нығайту үшін әліпби бірлігіне де мән берілуі тиіс. Соңғы жылдары түркі мемлекеттері арасындағы ынтымақтастық институционалды сипатқа ие болған сайын, ортақ әліпби мәселесі күн тәртібінде жиі көтеріле бастады, - деді Мұстафаев.

Басқосуға Түрік тілі қоғамының президенті Осман Мерт, Әзербайжан Ұлттық ғылым академиясының президенті Иса Габиббейли, Ататүрік орталығының төрағасы Низами Джафаров және ТМҰ ақсақалдар кеңесінің мүшесі Гасан Гасанов, сонымен қатар Түркі мемлекеттері ұйымына мүше елдерден және бақылаушы мемлекеттерден келген комиссия мүшелері мен тіл білімі саласындағы ғылыми-зерттеу институттардың ғалымдары қатысты.

Айта кетейік, Түркі Академиясының базасында жұмыс істейтін комиссия әр тараптан лингвистикалық салаға жауапты екі мүшенің қатысуымен құрылған еді. Комиссияның алғашқы отырысы 2023 жылдың 29 мамырында Астана қаласында өтіп, бірқатар маңызды шешім қабылданған болатын.

29-30 сәуірде Ыстанбұл қаласында Түркі мемлекеттері ұйымының Аға лауазымды тұлғалары комитетінің кезекті 43-ші отырысы өтеді, деп хабарлайды Ulys.

 «Кездесуде 2023 жылғы 3 қарашада Астанада өткен ұйымның 10-шы саммиті барысында қол жеткізілген уағдаластықтардың орындалу барысы, осы жазда Әзербайжанда жоспарланып отырған ұйымның бейресми саммиті және 2024 жылғы қазанда Қырғызстанда жоспарланып отырған ұйымның кезекті 11-ші саммиті бойынша дайындық жұмыстары, сондай-ақ ұйым шеңберіндегі ынтымақтастықты одан әрі нығайту бойынша өзекті мәселелері қарастырылады», — деді Айбек Смадияров министрліктің апталық брифингінде.

Сондай-ақ, 30 сәуірде Баку қаласында Түркі мәдениеті және мұрасы қоры кеңесінің 1-ші отырысы өтеді. Кеңес құрамына Қорға мүше елдердің мәдениет министрлері кіреді.

Қазақстан делегациясын Мәдениет және ақпарат министрі Аида Балаева бастап баратын болады.