تۇركىستاندا 57 ادام تاماقتان ۋلانىپ، كومەككە جۇگىنگەن، دەپ حابارلايدى Ulys.
تۇركىستان قالاسىندا ءدامحانادان پيسسا، سۋشي، چيكەن تاعامىن ساتىپ الىپ، ۋلانعاندار سانى 57 ادامعا جەتتى. ولاردىڭ 28ء-ى - كامەلەت جاسقا تولماعان بالالار. بارلىعى 22 ادام اۋرۋحاناعا جاتقىزىلعان، قالعانى امبۋلاتورلىق ەم قابىلداپ جاتىر. بۇعان دەيىن جان ساقتاۋ بولىمىنە جاتقىزىلعان ءۇش ادام جالپى بولىمگە اۋىستىرىلعان.
پوليسيا قاۋلىسىمەن اتالعان ءدامحانا جابىلىپ، قىلمىستىق ءىس قوزعالدى.
رەسمي اقپاراتقا قاراعاندا، ۋلانعانداردىڭ ءبارى تۇركىستان قالاسىنداعى ءدامحانادان پيسسا، سۋشي، چيكەن تاعامىن ۇيىنە تاپسىرىسپەن الىپ، تاماقتانعان. كوپ وتپەي ولاردىڭ ءىشى ءوتىپ، قۇسىپ، باسى اينالىپ، كوزى كىرتيىپ، اياق-قولى مۇزداپ، ەرنى كوگەرگەن. بارلىعى جەدەل جاردەممەن اۋرۋحاناعا جەتكىزىلگەن.
