ۆاليۋتا باعامى
  • USD -

    509.9
  • EUR -

    551.5
  • RUB -

    5.85
شەتەلدەگى قانداستارعا انا ءتىلىن ۇيرەنۋ مۇمكىندىگى
06 ناۋرىز 2019
شەتەلدەگى قانداستارعا انا ءتىلىن ۇيرەنۋ مۇمكىندىگى

شەتەلدە ءومىر ءسۇرىپ جاتقان قانداستاردىڭ انا ءتىلىن ەركىن مەڭگەرۋىنە جاعداي جاسالادى. وسى ماقساتتا «وتانداستار قورى» مەن ق ر تۇڭعىش پرەزيدەنتى – ەلباسى قورى جانىنداعى مەملەكەتتىك ءتىلدى دامىتۋ قورى ىنتىماقتاستىق تۋرالى مەموراندۋمعا قول قويدى. «وتانداستار قورى» ءباسپاسوزىنىڭ حابارلاۋىنشا، قۇجاتتا سونداي-اق مەملەكەتتىك ءتىلدىڭ ءرولىن ارتتىرۋ مەن  ءتىل ساياساتىنىڭ ءتيىمدى ىسكە اسۋىنا اتسالىسۋ ماسەلەلەرى دە قاراستىرىلعان.

«وتانداستار قورىنىڭ» ءبىرىنشى ۆيسە-پرەزيدەنتى تالعات ادۋوۆتىڭ ايتۋىنشا، جاقىن ارادا شەتەلدەگى قانداستارعا ارنالعان قازاق ءتىلىن قاشىقتىقتان ۇيرەنۋدىڭ تەگىن كۋرستارى باستالادى. ساباقتار Skype ارقىلى ونلاين رەجيمدە وتەتىن بولادى.

"وسى ماقساتتا ءبىز ءار ەلدەگى مۇددەلى قازاق ەتنومادەني جانە قوعامدىق بىرلەستىكتەرمەن تىعىز بايلانىس ورناتپاقپىز. سولاردىڭ كومەگىمەن ينتەراكتيۆتى تاقتالارمەن جابدىقتالاتىن ارنايى قازاق ءتىلى كابينەتتەرىن ۇيىمداستىرامىز. بۇل باستامامىز جەكسەنبىلىك مەكتەپتەر جەلىسى سياقتى بولادى. ياعني، ءتىلدى ۇيرەنۋشىلەر ءوز بەتىنشە وقىپ قانا قويماي، ءوزى سياقتى باسقا دا تالىمگەرلەرمەن بىرگە جينالىپ، ارالاسا الادى، ساباقتى بىرىگىپ وتە الادى. ءتىلدى كەز كەلگەن ۋاقىتتا كابينەتتەن تىس ونلاين وقي الۋ مۇمكىندىگىنەن بولەك، ولاردىڭ بەتپە-بەت جولىعۋ الاڭىن ۇيىمداستىرۋىمىز كەرەك دەپ سانادىق".

مەملەكەتتىك ءتىلدى دامىتۋ قورىنىڭ باسشىسى ازات شاۋەيەۆتىڭ سوزىنە سۇيەنسەك، شەتەلدىك وتانداستار ءۇشىن قازاق ءتىلىن يگەرۋدىڭ يننوۆاسيالىق ادىستەرگە نەگىزدەلگەن ءتيىمدى جۇيەسى ازىرلەنۋدە.

"قاشىقتىقتان وقىتۋ جۇيەسى تۋرالى ايتار بولساق، ءبىزدىڭ «Soyle.kz» پورتالى نەگىزىندەگى مول تاجىريبەمىز بار. بۇل قازاق ءتىلىن ينتەرنەت ارقىلى ونلاين رەجيمدە ۇيرەتەتىن قازاقستانداعى العاشقى تەگىن جوبا. ول ۇلكەن زەرتتەۋ مەن تالداۋدىڭ، وسى سالاداعى باسقا دا ەلدەردىڭ تاجىريبەسىنە ءۇڭىلۋدىڭ ناتيجەسىندە جۇزەگە استى. سونىمەن قاتار، شەتەلدىك قانداستاردىڭ دا سۇرانىستارىن بارىنشا ەسكەرۋگە تىرىسىپ جاتىرمىز. ماسەلەن، ولاردىڭ ىڭعايلىلىعى ءۇشىن ءبىز پورتالدىڭ اعىلشىن-لاتىن نۇسقاسىن دا جاساپ شىعاردىق. ەندى قازاق ءتىلىن لاتىن الىپبيىمەن ۇيرەنۋگە بولادى".

سونىمەن قاتار، كەلىسىم اياسىندا ءتىل ساياساتى جونىندەگى ءىس-شارالاردى بىرلەسىپ ۇيىمداستىرۋ، ەلەكتروندىق اقپاراتتىق كەڭىستىكتە مەملەكەتتىك ءتىلدى دامىتۋعا ىقپال ەتەتىن وتاندىق سايتتار جۇمىسىنا جاردەمدەسۋ جانە شەتەلدەگى وتانداستارعا ارنالعان قازاق ءتىلى بويىنشا وقۋ قۇرالىن ازىرلەۋ كوزدەلگەن.

RELATED NEWS
ەكى اپتادا ەكى التىن
17 قاڭتار 2019
ەكى اپتادا ەكى التىن

شەتەلدەگى قانداستار اراسىندا قارا ءۇزىپ جۇرگەن تالاي تالانت بار. سولاردىڭ ءبىرى موڭعوليا ەلىندە تۇراتىن جاس پالۋان — سەرىك بەردىمۇرات ۇلى. قازاقستانداعى جارىستارعا ءجيى قاتىسىپ، جارقىراپ كورىنىپ كەلە جاتقان سپورتشىنى مۇقىم قازاق جاقسى تانيدى. ەندى مىنە، KAZNEWS.MN سايتىنىڭ جازۋىنشا، بۇگىن ۋلاانبااتار قالاسىندا سامبودان ەرەسەكتەر اراسىندا وتكەن موڭعوليا بىرىنشىلىگىندە ءوز سالماعىندا چەمپيون اتانعان.

وتكەن اپتا عانا دزيۋدو كۇرەسىنەن سەلەنگە ايماعىنىڭ ءسۇحبااتار قالاسىندا ەرلەر مەن ايەلدەر اراسىنداعى وتكەن موڭعوليا  چەمپيوناتىندا 100 كەلى سالماقتا بەلدەسكەن سەرىك بەردىمۇرات ۇلى قارسىلاس شىداتپاي التىن مەدال العان بولاتىن. سەرىك بەردىمۇرات ۇلى جارتىلاي فينالدا 2017، 2018 جىلعى ەل چەمپيونى گ.التاناباگانادان باسىم ءتۇسىپ، فينالدىق كەزدەسۋدە قارسىلاسى د.سەرەننيامدى اياقتان ءىلىپ شالۋ ءادىسى بويىنشا ۆازاري ۇپايىمەن جەڭگەن ەدى. ال بۇگىن مىنە، سامبودان موڭعوليا چەمپيونى اتاندى. ەستەرىڭىزگە سالا كەتسەك، سەرىك بەردىمۇرات ۇلى سامبودان ەرەسەكتەر اراسىندا ءۇشىنشى رەت ەل چەمپيونى اتانىپ وتىر. ول، بۇعان دەيىن 2014، 2017 جىلدارى چەمپيون بولعان ەدى. ال دزيۋدو كۇرەسى بويىنشا سەرىك بەردىمۇرات ۇلى 100 كەلى سالماق بويىنشا ەل بىرىنشىلىگىنىڭ 2017 جىلى قولا جۇلدەسىنە يە بولعان بولاتىن. وسىلايشا، ول بايان-ولگيي سپورت تاريحىندا العاش رەت دزيۋدودان ەرەسەكتەر اراسىندا ەل چەمپيونى اتاندى. ەكى اپتادا ەكى سالماق بويىنشا موڭعوليا چەمپيونى اتانعان قازاق بالاسىنا ازىرشە تەڭ كەلەر قارسىلاس جوق.

 

ەلوردادا 20 ەلدەگى قازاق دياسپوراسى باس قوسادى
26 قاراشا 2019
ەلوردادا 20 ەلدەگى قازاق دياسپوراسى باس قوسادى

28-قاراشا كۇنى «وتانداستار قورى» جانە «دۇنيەجۇزى قازاقتارىنىڭ قاۋىمداستىعى» شەت ەلدەردەگى قازاق دياسپوراسىنىڭ تاريحي وتانىمەن مادەني-گۋمانيتارلىق جانە ىسكەرلىك ىنتىماقتاستىعىن ودان ءارى دامىتۋ ءۇشىن جاعداي جاساۋ ماقساتىنداعى مەملەكەتتىك تاپسىرما اياسىندا وتانداستاردىڭ قاتىسۋىمەن «وتانداستار. بولاشاققا باعدار» اتتى حالىقارالىق دونگەلەك ۇستەل وتكىزەدى.

قوردىڭ باسپا ءسوز قىزمەتىنىڭ حابارلاۋىنشا، جيىنعا ق ر پرەمەر-مينيسترىنىڭ ورىنباسارى  ب. ساپاربايەۆ مەن ق ر اقپارات جانە قوعامدىق دامۋ ءمينيسترى د. ابايەۆ قاتىسادى. ەڭ باسىسى — حالىقارالىق شاراعا 20 ەلدەگى قازاق دياسپورالارىنان 150 دەلەگات كەلەدى. «وتانداستار قورى» كەاق پرەزيدەنتى ن. ابىقايەۆ قوردىڭ ىسكە قوسقان جانە جۇزەگە اسىرعان جوبالارى،  ولاردىڭ ناتيجەلەرى، وتانداستارمەن جۇمىستىڭ 2020 جىلعا ارنالعان جوسپارى جايلى ءسوز سويلەيدى. سونىمەن قاتار، شەت ەلدەردەگى قازاق قاۋىمداستىقتارىنىڭ جەتەكشىلەرى دە ءوز ۇيىمدارى جايلى ايتادى. شارا اياسىندا دۇنيەجۇزى قازاقتارىنىڭ قاۋىمداستىعى مەن قور وكىلدەرى قىزمەتتەرىنىڭ نەگىزگى باعىتتارى، ونىڭ ىشىندە شەت ەلدەردەگى قانداستارمەن مادەني-گۋمانيتارلىق جانە ىسكەرلىك بايلانىستى كەڭەيتۋ ءارى نىعايتۋدى كوزدەگەن «وتانداستار» قورىنىڭ نەگىزگى جوبالارىنىڭ ءبىرى «قازاق ءۇيى» قازاق مادەني-ىسكەرلىك ءۇيىنىڭ قۇرامىنا كىرەتىن ىسكەرلىك ۇيلەرى مەن مادەني ورتالىقتارىنىڭ  الەم بويىنشا جەلىسىن قۇرۋ جوسپارى تالقىلانادى. بىرلەسكەن جۇمىستىڭ ناقتى ۇسىنىستارى ازىرلەنەدى. قاتىسۋشىلارعا قازاقستاننىڭ ينۆەستيسيالىق الەۋەتى مەن وڭىرلەردە بيزنەستى دامىتۋ ءۇشىن جاسالعان جاعدايلار جايىندا اقپارات بەرىلەدى.  «اتامەكەن» ىسكەرلىك ءۇيىنىڭ پانەلدىك سەسسياسىندا ىسكەرلىك ءۇيىنىڭ ماقساتى مەن مىندەتى، وتانداستاردى كونسۋلتاسيالىق قولداۋ ورتالىعىنىڭ جۇمىسى جايلى ايتىلادى. شەت ەلدەردە وتكىزىلگەن بيزنەس فورۋمدار قورىتىندىلانادى. تۇركيا، شۆەسيا، ەۋروپا ەلدەرىنەن كەلگەن قانداس كاسىپكەرلەر ءسوز سويلەيدى. «قازاگرو»، «بايتەرەك» حولدينگتەرى مەن «قازاقينۆەست» ۇاق ءوز تاراپتارىنان قانداس كاسىپكەرلەردى قولداۋ مۇمكىندىكتەرىمەن بولىسەدى. شەت ەلدەردەگى ءقازاقتىلدى ب ا ق وكىلدەرىنىڭ قاتىسۋىمەن وتەتىن پانەلدىك سەسسيادا شەت ەلدەردەگى ءقازاقتىلدى ب ا ق پەن جۋرناليستەردىڭ ءوزارا ىنتىماقتاستىق ماسەلەسى تالقىلانادى. «اباي» مادەني ورتالىعىنىڭ پانەلدىك سەسسياسىندا مادەني ورتالىقتىڭ  ماقساتى مەن مىندەتى، شەت ەلدەردە قازاق مادەنيەتى مەن ونەرىن دامىتۋ، ءبىلىم بەرۋ جوبالارىن ىسكە اسىرۋ، ەلىمىزدە تۋريستىك كلاستەردى دامىتۋ جانە ەلىمىزدىڭ تۋريستىك تارتىمدىلىعىن ارتتىرۋ، بارلىق ەلدە قازاق ادەبيەتى ورتالىعىنىڭ جەلىسىن قۇرۋ ماسەلەلەرى تالقىلانادى. «وتانداستار» قورىنىڭ جوباسى – «الەمدەگى تانىمال قازاقتار تۋرالى» كىتابى مەن «مۇزبالاق» انيماسيالىق ءفيلمى تانىستىرىلادى. «جاس قازاق» جاستار كلۋبىنىڭ پانەلدىك سەسسياسىندا شەت ەلدەردەگى قازاق جاستارىن تاريحي وتانىن اينالاسىنا شوعىرلاندىرۋ جانە ولارعا جان-جاقتى قولداۋ كورسەتۋ،  دياسپورالىق جانە جاستار ساياساتى سالاسىنداعى ءوزارا ارەكەتتەستىك جانە سەرىكتەستىك اياسىن كەڭەيتۋ، جاس بەلسەندىلەردى تانىستىرۋ، دوستىعىن نىعايتۋ،  ولاردىڭ بويىندا تاريحي وتانىنا دەگەن پاتريوتتىق سەزىمدەرىن قالىپتاستىرۋ، قازاقستان رەسپۋبليكاسىنىڭ بارلىق جاستار ۇيىمدارىنىڭ ءىس-شارالارىنا دياسپورا وكىلدەرىن قاتىستىرۋ، ءوزارا بىرىككەن جۇمىس جوسپارىن قۇرىپ، بىرلەسە جۇمىس ىستەۋ ماسەلەسى تالقىلانادى. «قازاق ەلى» جاستار كلۋبى جۇمىسىنىڭ جوسپارى بەكىتىلەدى. 

 

«اتامەكەن» شەت ەلدەردە تۇراتىن ەتنيكالىق قازاقتاردى قولدايدى
24 قاراشا 2019
«اتامەكەن» شەت ەلدەردە تۇراتىن ەتنيكالىق قازاقتاردى قولدايدى

«اتامەكەن» ۇكپ جانە «وتانداستار قورى» كوممەرسيالىق ەمەس اكسيونەرلىك قوعامى اراسىندا ءوزارا تۇسىنىستىك جانە ىنتىماقتاستىق تۋرالى مەموراندۋمعا قول قويۋ ءراسىمى ءوتتى.

قوردىڭ باسپا ءسوز قىزمەتىنىڭ حابارالۋىنشا، كەلىسىمگە «وتانداستار» قورىنىڭ پرەزيدەنتى نۇرتاي ابىقايەۆ پەن پالاتانىڭ باسقارما ءتوراعاسى ابىلاي مىرزاحمەتوۆ قول قويدى.

اتاپ وتەيىك، «وتانداستار» قورى - شەت ەلدەردە تۇراتىن ەتنيكالىق قازاقتار مەن وتانداستاردى قولداۋ جۇمىسى بويىنشا مەملەكەتتىك ورگاندار جانە ۇكىمەتتىك ەمەس ۇيىمدارمەن ناقتى باعىتتاردى ايقىنداپ، سەرىكتەستىك تانىتىپ قىزمەت ەتىپ كەلە جاتقان ۇيىم.

مەموراندۋم «اتامەكەن» ۇكپ مەن قوردىڭ كوپتەگەن باعىتتا تىعىز بايلانىستا جۇمىس اتقارۋى ءۇشىن قۇقىقتىق نەگىز بەكىتتى. ماسەلەن، قۇرىلىمىندا call-ورتالىق پەن وڭىرلىك قوعامدىق قابىلداۋى بار ۇيىمنىڭ وتانداستاردى اقپاراتتىق قولداۋ ورتالىعىنا «اتامەكەندە» جيناقتالعان كاسىپكەرلىك تۋرالى ءبىلىم بانكىن پايدالانۋ، بيزنەستى قۇرۋ جانە دامىتۋ، پالاتا جۇزەگە اسىراتىن باعدارلامالار بويىنشا وقۋ، ينۆەستورلار مەن ستارتاپتاردى ىزدەۋ مۇمكىندىگى تۋدى.

سونىمەن قاتار ىنتىماقتاستىق اياسىندا «مەنىڭ اتامەكەنىم» جانە بيزنەس سالاسىنداعى شەتەلدىك قازاقتاردىڭ ۇيىمدارىن الەم بويىنشا ءبىر جەلىگە بىرىكتىرەتىن «اتامەكەن» ىسكەرلىك ءۇيى» جوباسىن ىسكە اسىرۋ ماسەلەلەرى دە قامتىلدى. ەتنيكالىق قازاقتاردىڭ تاريحي وتانىنا جاپپاي كوشۋىن ىنتالاندىرۋدى قاراستىراتىن «تەمىر قازىق» باعدارلاماسىنا دەربەس باسىمدىق بەرىلدى.

«وتانداستار» قورى مەن «اتامەكەن» ۇكپ بىرلەسكەن جۇمىسىنىڭ الداعى باعىتتارى «وتانداستار. بولاشاققا باعدار» حالىقارالىق دوڭگەلەك ۇستەل اياسىندا وتەتىن «اتامەكەن» ىسكەرلىك ءۇيىنىڭ» پانەلدىك سەسسياسىندا كەزىندە ناقتىلانادى.  اتالعان شارا بيىل 28 قاراشادا نۇر-سۇلتان قالاسىندا وتەدى، جيىنعا 20 ەلدەگى قازاق دياسپوراسىنان 150 دەلەگات قاتىسادى.

ءبىز تۋرالى
ulys.kz — اقپاراتتىق، ساراپتامالىق جانە تانىمدىق باعىتتاعى ماتەريالداردى بەرەدى.
 
مۋلتيمەديالىق جوبا زامان تالابىنا ساي جاسالعان. قازاقستاننىڭ اقپاراتتىق نارىعىن ساپالى
كونتەنتپەن قامتاماسىز ەتۋگە ۇلەس قوسۋعا باعىتتالعان. مۇنداعى ساراپتامالىق، تانىمدىق
ماقالالار سان سالانى قامتيدى. گەوستراتەگيا، گەوەكونوميكا، گەوساياسات، حالىقارالىق
قاتىناستار مەن ەلدىڭ ىشكى-سىرتقى ساياساتى، ەكونوميكا، جاھاندا بولىپ جاتقان تەكتونيكالىق
وزگەرىستەر مەن ترەند تاقىرىپتار ۇلتتىق مۇددە تۇرعىسىنان تەرەڭ تالدانىپ قازاق
وقىرماندارىنا جەتكىزىلەدى. ورتالىق ازيا مەن تۇركى الەمىنە ەرەكشە كوڭىل بولىنەدى.