پارلامەنت ءماجىلىسىنىڭ دەپۋتاتى دۇيسەنباي تۇرعانوۆ ويىن بيزنەسىنە قاتىستى زاڭعا پىكىر ءبىلدىردى، دەپ حابارلايدى Ulys.
«بۇگىن ەل پرەزيدەنتى ماڭىزدى زاڭعا – «قازاقستان رەسپۋبليكاسىنىڭ كەيبىر زاڭنامالىق اكتىلەرىنە ويىن بيزنەسى، لوتەرەيا قىزمەتى، دەنساۋلىق ساقتاۋ، مەملەكەتتىك ەڭبەك ينسپەكسياسى، مەملەكەتتىك باقىلاۋ جانە ارتىق زاڭنامالىق رەگلامەنتتەۋدى بولعىزباۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» قازاقستان رەسپۋبليكاسىنىڭ زاڭىنا قول قويدى. ۇلتتىق قۇرىلتايدىڭ اتىراۋ قالاسىندا وتكەن ءۇشىنشى وتىرىسىندا مەملەكەت باسشىسى جاستاردىڭ ەرەكشە تاۋەكەل توبىنا جاتاتىنىنا باسا نازار اۋدارا وتىرىپ، ويىنعا تاۋەلدىلىكتى باستى الەۋمەتتىك ماسەلەلەردىڭ ءبىرى دەپ اتاعانى ءبارىمىزدىڭ ەسىمىزدە. پرەزيدەنت ويىنعا تاۋەلدىلىكپەن كۇرەسۋ بويىنشا جۇيەلى جۇمىستى جولعا قويۋدى، كەشەندى جوسپاردى جانە ءتيىستى زاڭدى قابىلداۋدى جەدەلدەتۋدى تاپسىردى. مىنە، ناتيجە. پارلامەنت ويىن بيزنەسى، لوتەرەيا جانە لوتەرەيا قىزمەتى ماسەلەلەرى بويىنشا زاڭنامالىق تۇزەتۋلەردى قابىلدادى، سونىڭ ىشىندە، اكىمشىلىك قۇقىق بۇزۋشىلىق تۋرالى كودەكسىنە دە. 100-دەن استام تۇزەتۋلەردى دەپۋتاتتار ەنگىزدى. نەگىزگىلەرى تۋرالى قىسقاشا. ەندى ءوزىن-وزى شەكتەيتىن تۇلعالارعا ارنالعان زاڭ ويىن بيزنەسىنە قاتىسۋدى ءوزىن-وزى شەكتەۋدىڭ ەڭ جوعارى مەرزىمىن 1 جىلدان 10 جىلعا دەيىن ۇلعايتتى. تىيىم سالۋدى ەرتەرەك توقتاتۋ مۇمكىن ەمەس بولادى»، -دەدى دەپۋتات جەلىدەگى پاراقشاسىندا.
سونداي-اق ول بورىشكەرلەردىڭ ءبىرىڭعاي تىزىلىمىنە ەنگىزىلگەن جەكە تۇلعالارعا قۇمار ويىندارعا قاتىسۋعا جانە ءباس تىگۋگە قوسىمشا تىيىم سالىنعانىن، ولاردىڭ سانى شامامەن 3،5 ميلليون ادامدى قۇرايتىنىن جەتكىزدى.
«سونىمەن قاتار، جوعارىدا اتالعان تۇلعالاردى قۇمار ويىندار مەن ءباس تىگۋگە تارتۋعا جانە جىبەرگەنى ءۇشىن زاڭدى تۇلعالاردىڭ اكىمشىلىك جاۋاپكەرشىلىگى ەنگىزىلگەن. ەندى مەملەكەتتىك قىزمەتكەرلەرگە كەز كەلگەن قۇمار ويىندارعا – بۋكمەكەرلىك كەڭسەلەرگە، كازينولارعا جانە ونلاين كازينولارعا زاڭدى تۇردە شەكتەۋ قويىلادى. وسىلايشا، جالپى سانى 280 مىڭعا جۋىق ادامدى قۇرايتىن اسكەري قىزمەتكەرلەر، مەملەكەتتىك مەكەمە قىزمەتكەرلەرى، بيۋدجەتتىك ۇيىمداردىڭ باسشىلارى قۇمار ويىندارعا قاتىسا المايدى. زاڭدى بۇزعان جاعدايدا ولارعا قاتىستى قاتاڭ شارالار قولدانىلادى، ونىڭ ىشىندە، كەلەڭسىز سەبەپتەرمەن جۇمىستان بوساتىلادى. ويىن بيزنەسىن ۇيىمداستىرۋشىلارعا ويىن مەكەمەلەرىندە جانە وزدەرىنىڭ ينتەرنەت-رەسۋرستارىندا قۇمار ويىندارعا قاتىسۋدىڭ جانە ءباس تىگۋدىڭ قاۋىپتىلىگى مەن زيانى تۋرالى ەسكەرتۋلەردى ورنالاستىرۋعا مىندەتتەمە ەنگىزىلۋدە. زاڭ قۇمار ويىندارعا تاۋەلدى ادامداردى مەديسينالىق وڭالتۋ ءتارتىبىن دە بەلگىلەيدى. زاڭنىڭ ماڭىزدى جاڭالىقتارىنىڭ ءبىرى – 21 جاسقا تولماعان ادامدارعا ەنەرگەتيكالىق سۋسىنداردى ساتۋعا تىيىم سالۋ. زاڭ بايلانىس وپەراتورلارىنا قۇمار ويىندار مەن ءباس تىگۋلەر تۋرالى جارنامانى قامتيتىن حابارلامالاردى جىبەرۋگە تىيىم سالادى، بۋكمەكەرلىك كەڭسەنىڭ نەمەسە ءباس تىگۋ دۇكەنىنىڭ ورنالاسقان جەرىندە، سپورت عيماراتتارىنىڭ ىشىندە ورنالاسقانداردى قوسپاعاندا، بۋكمەكەرلىك كەڭسەلەر مەن بۋكمەكەرلىك دۇكەندەردىڭ عيماراتتاردا، كولىكتەردە سىرتقى جارناماسىنا، سپورتشىلاردىڭ جابدىقتارىندا تىيىم سالىنادى. بۇقارالىق اقپارات قۇرالدارىندا سپورتتىق تاقىرىپتاعى، سونداي-اق وتاندىق تەلەارنالاردىڭ حالىقارالىق سپورت جارىستارىن تىكەلەي ترانسلياسياسى كەزىندەگى جارنامانى قوسپاعاندا، بۋكمەكەرلىك كەڭسەلەر مەن لوتەرەيالاردى بۇقارالىق اقپارات قۇرالدارىندا، كينو، بەينە جانە انىقتامالىق قىزمەتتەردە جارنامالاۋعا تىيىم سالىنادى. بۋكمەكەرلىك كەڭسەلەردىڭ جارناماسىن تاراتقان جاعدايدا 60 اەك جانە ودان جوعارى ايىپپۇلدار قاراستىرىلعان. سونىمەن بىرگە، ەندى ونلاين-كازينو ۇيىمداستىرۋشىلارى ەكى جىلعا دەيىن باس بوستاندىعىنان ايىرىلۋمەن قىلمىستىق جاۋاپكەرشىلىككە تارتىلادى. بۇل رەتتە لوتەرەيا بيلەتتەرىن تۇرعىن ۇيلەردە، جاتاقحانالاردا، ءبىلىم بەرۋ، دەنساۋلىق ساقتاۋ، ءدىني عيماراتتار مەن قۇرىلىستاردا، سونداي-اق، ءبىلىم بەرۋ جانە دەنساۋلىق ساقتاۋ ۇيىمدارىنان ءجۇز مەتر راديۋستا تاراتۋعا تىيىم سالىنادى. بۇل شارالاردىڭ بارلىعى قۇمار ويىندارعا تاۋەلدىلىكپەن ءتيىمدى كۇرەسۋگە ىقپال ەتەتىنىنە سەنىمدىمىن. ال ءقازىر بارلىق مەملەكەتتىك ورگانداردىڭ، ۇكىمەتتىك ەمەس ۇيىمداردىڭ، بۇكىل قوعامىمىزدىڭ بىرىككەن جانە جۇيەلى جۇمىسى وتە ماڭىزدى»، - دەپ تولىقتىردى د.تۇرعانوۆ.
