مەملەكەت باسشىسى قاسىم-جومارت توقايەۆ «ۇلىتاۋ – 2019» حالىقارالىق
تۋريستىك فورۋمىنا قاتىسىپ، تۋريزمگە قاتىستى كەلەلى ماسەلەلەردى اتاپ ءوتتى.
فورۋمنىڭ اشىلۋىندا «بۇل – بۇكىل قازاق ەلى ءقادىر تۇتاتىن قاستەرلى ولكە. ۇلىتاۋ – ۇلتىمىزدىڭ التىن بەسىگى، تاعىلىمدى تاريحىمىزدىڭ كۋاسى. «ءۇش ءجۇزدىڭ باسىن قوسقان ۇلىتاۋدا» بابالارىمىز ۇلتتىڭ كەلەشەگىن ويلاپ، بىرلىكتىڭ تۋىن جەلبىرەتكەن. قالىڭ قاۋىم وسى كيەلى ولكەدە ەل بيلەگەن حانداردى اق كيىزگە كوتەرىپ، تاققا وتىرعىزعان. سوندىقتان ءبىز ۇلىتاۋ جەرىنە حان ورداسى، قازاق جەرىنىڭ كىندىگى دەپ، ەرەكشە قۇرمەتپەن قارايمىز!»-دەپ ءسوزىن باستاعان پرەزيدەنت قاسىم-جومارت توقايەۆ قاسيەتتى مەكەننىڭ قادىر-قاسيەتىن بارشا الەمگە تانىمال عۇلامالار دا مويىنداعانىنا توقتالىپ، وعان ايگىلى گەرودوتتىڭ جازبالارى دالەل ەكەنىن العا تارتتى. «ۇلىتاۋ توپىراعى – الىپ تۇلعالاردىڭ رۋحى توعىسقان جەر.حالىق بۇل جەرگە جوشى حان، الاشا حان، دومباۋىل كەسەنەلەرىن، حان ورداسى مەن اۋليەتاۋداي كيەلى ورىنداردى كورۋ ءۇشىن كەلەدى.«ازيانىڭ ارىستانى» اتانعان اتاقتى اقساق تەمىر دە وسى وڭىرگە ات شالدىرعان. ۇلىتاۋ اڭىزدارىندا ۇلتتىڭ ۇيىسۋى، جۇرتتىڭ جۇمىلۋى ايقىن كورىنىس تاپقان.
تىرلىگىندە ەگەسكەن، توپىراعى تەڭەسكەن باتىرلار تۋرالى اڭگىمەلەر وسى ماقساتتان تۋعان.
ءبىر-بىرىن داۋعا قيسا دا، جاۋعا قيماعان حالقىمىز بەرەكە-بىرلىكتى بارىنەن جوعارى قويعان.
بابالاردان قالعان سالت-داستۇرلەردى بۇگىنگى ۇرپاق لايىقتى جالعاستىرۋى ءتيىس.
ەلباسىمىز وسىدان بەس جىل بۇرىن ۇلىتاۋ تورىندە ارنايى سۇحبات بەرىپ، قاسيەتتى مەكەننىڭ ءمان-ماڭىزىن ەرەكشە اتاپ كورسەتكەنىن بىلەسىزدەر. سول سەبەپتى ءبىز بۇگىن كيەلى ولكەگە تاعزىم ەتىپ، ونىڭ كەلەشەگى جونىندە وي ءبولىسۋ ءۇشىن ۇلىتاۋ جەرىندە باس قوسىپ وتىرمىز» دەگەن ول تاريحى تەرەڭ ۇلىتاۋدىڭ قادىر-قاسيەتىن باعالاي ءبىلۋ – بارشامىزعا ورتاق پارىز ەكەنىن ايرىقشا اتاپ ءوتتى. سوسىن وسى ۋاقىتقا دەيىن ءبىراز جۇمىستار جاسالعانىن اتاپ ايتقاندا، «ۇلىتاۋ» ۇلتتىق تاريحي-مادەني جانە تابيعي مۇراجاي قورىعى ەل يگىلىگىنە اينالعانىن، ۇلىتاۋ اۋدانىنىڭ ورتالىعىندا قازاق حاندارىنىڭ اللەياسى بوي كوتەرگەنىن مىسالعا كەلتىردى. سونىمەن قاتار، مەملەكەت باسشىسى بۇدان بىلاي ەلىمىزدىڭ وسىنداي باعا جەتپەس باي مۇراسىن وزگە جۇرتقا تانىتۋدىڭ جاڭاشا جولدارىن ويلاستىرۋدىڭ قاجەتتىگىنە توقتالدى. «مىسالى، مونعوليا شىڭعىس حان تۇلعاسىن حالىقارالىق ءتۋريزمدى دامىتۋ ءۇشىن وتە ءتيىمدى پايدالانىپ وتىر. ال، ۇلى حاننىڭ ۇلكەن ۇلى – جوشىنىڭ مازارى قازاق جەرىندە تۇرعانىن بۇگىندە ەلىمىزدەگى جانە شەتەلدەگى جۇرتشىلىقتىڭ كوبى بىلە بەرمەيدى. اتا-بابالاردىڭ اماناتىنا ادال بولۋ – بىزگە سىن. سوندىقتان ءبىز التىن وردانىڭ نەگىزىن قالاعان جوشى حاننىڭ ەسىمىن ۇلىقتاۋدى مىندەتتى تۇردە قولعا الۋىمىز قاجەت. ونىڭ تاريحي تۇلعاسىنا الەمنىڭ نازارىن اۋدارىپ، كەسەنەسىن مادەني تۋريزم نىسانىنا اينالدىرۋ – وتە ماڭىزدى مىندەت. ۇلىتاۋ – حالىقارالىق دەڭگەيدەگى ەتنوگرافيالىق ءتۋريزمنىڭ ورتالىعى بولۋى ءتيىس. بۇل جۇمىستار التىن وردانىڭ 750 جىلدىعىن مەرەكەلەۋ اياسىندا باستالۋى قاجەت. اشىعىن ايتۋ كەرەك، قازىرگى وتاندىق تۋريزم يندۋسترياسى – كەنجە قالىپ كەلە جاتقان سالا. جىل سايىن قىرۋار قاراجات سالساق تا، بۇل سالا تولىققاندى دامىماي وتىر. ال، قازاقستاننىڭ بارلىق وڭىرىندە تۋريزم ايماعى بولۋعا لايىقتى كيەلى ورىندار جەتكىلىكتى.
تۇركىستان مەن وتىرار، ساۋران مەن سىعاناق، شەرقالا مەن وعىلاندى، بەرەل مەن مارقاكول، باياناۋىل مەن قارقارالى، شارىن مەن كولساي بارشا جۇرتتىڭ قۇندىلىعىنا اينالۋى ءتيىس.
قورقىت اتا، ارىستان باب، قوجا احمەت ياسساۋي، بەكەت اتا، بايدىبەك بي، بەگىم انا، قابانباي باتىر، رايىمبەك باتىر، ءماشھۇر ءجۇسىپ، حاكىم اباي، تاعى باسقا كوپتەگەن دارا تۇلعالارىمىزدىڭ ەسىمدەرىن تۋريزم ارقىلى كەڭىنەن ناسيحاتتاۋ – بۇگىنگى، ياعني ءبىزدىڭ زامانىمىزدىڭ تالابى.
ءبىز، قازاق حالقى، ۇلى تاريحي تۇلعالاردىڭ ءىزباسار ۇرپاعى ەكەنىمىزدى ەشقاشان ۇمىتپاۋىمىز قاجەت. اتا-بابالارىمىزدىڭ رۋحىن ءتۋريزمنىڭ وزىق ۇلگىلەرى ارقىلى دارىپتەۋىمىز كەرەك.
سوندىقتان ەلىمىزدەگى تۋريزم سالاسىنىڭ قازىرگى احۋالىن تۇبەگەيلى وزگەرتەتىن ۋاقىت كەلدى.
بۇل جۇمىستاردى ۇلىتاۋداي قاسيەتتى جەرلەردەن باستاۋىمىز قاجەت»-دەپ ويلارىن تىزبەلەدى. سونىمەن قاتار ول وتاندىق ءتۋريزمدى وركەندەتۋ ءۇشىن جۇمىس ىستەلۋى ءتيىس ءبىرقاتار باعىتتاردى اتاپ ءوتتى.
ءبىرىنشى. ۇلىتاۋ ايماعى مىندەتتى تۇردە قازاقستاننىڭ تۋريستەر تارتۋ كارتاسىنىڭ الدىڭعى قاتارىندا بولۋى ءتيىس.
بۇرىن جوبالانعان «ۇلىتاۋ» ۇلتتىق تابيعي پاركىن قۇرۋ ماسەلەسىن جۇزەگە اسىرۋ كەرەك.
بيىل مۇندا تۋريستەر ءۇشىن ارنايى ورتالىق اشىلۋى ءتيىس.
بۇل ءۇشىن وبلىس اكىمدىگى ۇكىمەتپەن بىرلەسىپ، قازىرگى كولىك-لوگيستيكالىق ينفراقۇرىلىمدى قاجەتتى تارتىپكە كەلتىرۋى كەرەك.
ءوڭىر تۋريزم ءارى دەمالىس ايماعىنا اينالۋى ءۇشىن جولداردىڭ ساپاسىن جاقسارتۋ قاجەت.
جەزقازعان – بەينەۋ، ارقالىق – شۇباركول تەمىرجولدارىنىڭ ىسكە قوسىلۋى – ۇلىتاۋ ءۇشىن وتە ماڭىزدى.
تەمىرجولمەن قاتار اۆتوجولداردىڭ جاعدايىنا كوڭىل بولىنگەنى وتە قاجەت.
قىزىلوردا – جەزقازعان – قاراعاندى – نۇر-سۇلتان قالالارى اراسىنداعى جولداردى جەدەل رەتكە كەلتىرۋ كەرەك.
سونىمەن بىرگە ارقالىق – ۇلىتاۋ اۆتوجولىنىڭ احۋالى كۇن تارتىبىنەن تۇسپەۋى ءتيىس.
سۋرەتتەر akorda.kz سايتىنان الىندى
