Qoǵamnyń turaqty damýy men azamattardyń qaýipsiz ómir súrýi eń aldymen zań ústemdigine, tártip pen jaýapkershilikke tikeleı baılanysty. Quqyqtyq mádenıeti joǵary, sanaly ári belsendi jas urpaq - ádiletti qoǵamnyń negizgi tiregi. Osy maqsatta «Zań men tártip» ıdeologemasy aıasynda Jetisý oblysynda «Legal Talk: ashyq mıkrofon» formatyndaǵy jastar forýmy ótkizildi. Atalǵan forým jastar men memlekettik organdar arasyndaǵy ashyq dıalogty nyǵaıtýǵa, quqyqtyq saýattylyqty arttyrýǵa jáne qoǵamdaǵy ózekti quqyqtyq máselelerdi birlese talqylaýǵa baǵyttalǵan mańyzdy alańǵa aınaldy.
Forým ashyq mıkrofon formaty boldy. Bul format qatysýshylarǵa óz oılaryn erkin bildirýge, kókeıinde júrgen suraqtaryn tikeleı sala mamandaryna qoıýǵa jáne naqty, túsinikti jaýap alýǵa múmkindik berdi. İs-shara barysynda zań men tártip, qoǵamdyq qaýipsizdik, jastardyń quqyqtary men mindetteri, ınternet keńistigindegi qaýipter, quqyq buzýshylyqtardyń aldyn alý taqyryptary keńinen qozǵaldy.
Forýmǵa spıker retinde Jetisý oblysy ákiminiń orynbasary Esdáýletov Dıas Rahmetuly, Jetisý oblysynyń prokýrory Jumaqanov Baýyrjan Albertuly, Jetisý oblysynyń Ekonomıkalyq tergep-tekserý departamentiniń basshysy Túmelıev Erkin Amangeldiuly, Jetisý oblysy Polısıa departamenti bastyǵynyń orynbasary Baıkenov Jasulan Qudaıbergenuly qatysty.
Sala mamandary jastarmen ashyq pikir almasyp, óz tájirıbelerimen bólisip, quqyqtyq mádenıetti qalyptastyrýdaǵy ózekti baǵyttarǵa toqtaldy.
İs-shara barysynda ınteraktıvti oıyn uıymdastyrylyp, 1-oryn ıelengen qatysýshyǵa alǵys hat pen syılyq tabystaldy. Qatysýshylardyń belsendiligi men qyzyǵýshylyǵyn arttyrýǵa erekshe kóńil bólindi. Bul jastardyń quqyqtyq taqyryptarǵa degen kózqarasyn jeńil ári túsinikti formatta qalyptastyrýǵa yqpal etti.
Atalǵan forým jumysyna 200-ge jýyq jas tartyldy. Forým jastardyń azamattyq ustanymyn nyǵaıtýǵa, zańǵa qurmetpen qaraýǵa tárbıeleýge jáne qoǵamdyq tártipti kúsheıtýge baǵyttalǵan júıeli jumystyń mańyzdy bóligi boldy. Bul - tek pikir almasý alańy ǵana emes, jaýapkershiligi joǵary, sanaly qoǵam qalyptastyrý jolyndaǵy naqty qadam.
İ. Jansúgirov atyndaǵy Jetisý ýnıversıtetiniń stýdenti Aqerke Esqaraevanyń aıtýynsha, is-shara óte qyzyqty ári mazmundy ótti.
- Quqyq qorǵaý organdarynyń basshylary men oblys ákimi orynbasarynyń jastarmen kezdesýge arnaıy kelýi erekshe áser qaldyrdy. Olar qoıylǵan suraqtarǵa ashyq túrde jaýap berip, kúrdeli taqyryptardan qashqan joq. Mundaı format zań men tártiptiń is júzinde qalaı jumys isteıtinin tereńirek túsinýge múmkindik beredi. Ásirese dropperlik taqyryptyń talqylanýy este qaldy, sebebi bul qazirgi jastar úshin ózekti másele. Kóp jaǵdaıda onyń saldaryna mán berilmeı jatady, sondyqtan mundaı túsindirý jumystary óte mańyzdy. Osyndaı jastarmen ashyq kezdesýler aldaǵy ýaqytta da jıi uıymdastyrylsa degen oıymyz bar, - dedi ol.
