2021 jylǵy 31 tamyzda Ystanbulda «Tomırıs» fılminiń Túrkıadaǵy premerasy ótti. Tarıhı dramanyń baýyrlas eldegi alǵashqy kórsetilimine fılmniń rejıseri Aqan Sataev jáne basty róldi somdaǵan aktrısa Almıra Tursyn arnaıy qonaq boldy. El táýelsizdiginiń 30 jyldyǵy aıasynda uıymdastyrylǵan premeraǵa, sondaı-aq, Qazaqstannyń Túrkıadaǵy Elshisi Abzal Saparbekuly men Ystanbuldaǵy Bas konsýly Álim Baıel, Túrkıanyń saıasatkerleri, jergilikti zıaly qaýym ókilderi jáne Ystanbuldaǵy qazaq dıasporasynyń ókilderi qatysty.
Uly dalanyń tarıhyn tartymdy túrde pash etken otandyq fılmdi jınalǵan kórermender ystyq yqylaspen qabyl aldy. Osy rette Tomırıs hanshaıymnyń Túrkıada da tanymal tarıhı tulǵa ekenin, onyń esiminiń qyzdarǵa beriletinin aıta ketý kerek. Atalǵan kınotýyndy 3 qyrkúıekten bastap Túrkıadaǵy eki júzden astam kınoteatrlarda kórsetilimge shyǵyp, qalyń kórermenge jol tartady.
Táýelsizdikke arnalǵan merkelik is-sharalardyń jalǵasatynyn aıtqan Qazaqstannyń Ystanbuldaǵy Bas konsýly Á. Baıel «Tomırıs» kınokartınasynyń Túrkıanyń mádenı ómirindegi úlken oqıǵaǵa aınalyp, baýyrlas halyqtardy odan saıyn jaqyndata túsetinine degen senimin bildirdi.