3,9 jylda Ulttyq ulan qatarynda 11 sarbaz qaza tapqanyn. Bul týraly Ulttyq ulan Bas qolbasshysynyń tárbıe jáne áleýmettik-quqyqtyq jumys jónindegi orynbasary Qaırat Úmbetov málim etti, dep habarlaıdy Ulys.
«AMANAT» partıasy janyndaǵy Jastardy qoldaý jónindegi respýblıkalyq keńestiń kezekti otyrysynda baıandama jasaǵan Úmbetov óz sózinde sońǵy úsh jyl men 2024 jyldyń 9 aıynda Ulttyq ulan qatarynda 58 áskerı qyzmetshi qaza tapqanyn, biraq, onyń bári sarbaz emes jáne jumysta qaza tappaǵanyn aıtty.
«Ulttyq ulan qatarynda sońǵy úsh jyl men 2024 jyldyń 9 aıynda 58 áskerı qyzmetshi qaza tapqan bolsa, onyń ishinde sarbazdar sany 11 adam. Qalǵandary – ofıserler men kelisimshart boıynsha jumys isteıtin áskerı adamdar», - degen ol olardyń qalaı jáne neden kóz jumatynyn túsindirdi.
Úmbetov aıtqandaı, 2022 jyly eki sarbaz Qańtar oqıǵasy kezinde qaza tapqan. Bir sarbaz, ıaǵnı, Almaty qalasynda ornalasqan 5574 áskerı bóliminiń sarbazy Almaz Shahımov Ulttyq ulannyń áýel basta bergen málimeti boıynsha ústine shatyr qulap qaza tapqan.
Alaıda, anasy onyń súıegin qazyp alyp, zertteý júrgizgende, ulynyń denesine áldekimder pyshaq suqqanyn jáne temeki izderi baryn anyqtaǵan.
«Taǵy eki áskerı qyzmetker jol apatynan qaza tapty. Iaǵnı, ózderi demalyp júrgende nemese jumystan tys ýaqytta jol apatynan qaza tapqandar», - dedi ol.
Úmbetovtiń sózine sensek, 3,9 jyl kezinde Ulttyq ulannyń qataryndaǵy 29 áskerı qyzmetshi aýrýdan qaza tapqan.
«Olardyń ishinde soldat bolyp qaza tapqany 4 adam. Iaǵnı, áskerge kelgen tórt adam densaýlyǵy jarymsyz bolyp aýrýdan qaza tapqan. Taǵy bir áskerı qyzmetshini toq uryp qaza tapty. Bıyl bir áskerı qyzmetshi demalysy kezinde qaıtys boldy. Osylaısha, osy 58 faktiniń ishinde 2021 jyly 5 soldat, 2022 jyly – 4 soldat, 2023 jyly - bir soldat qaza tapsa, 2024 jyly toǵyz aı ishinde qaza tapqan soldatymyz joq. Buny meniń resmı málimdem dep qabyldańyzdar», - dedi otyrysta ol.
Buǵan deıin habarlaǵandaı, tórt jyl ishinde Ulttyq ulanǵa jáne ózge de áskerı quramalarǵa boryshyn óteýge barǵan 310 sarbaz kóz jumǵan.
