Búgin Memleket basshysy Qasym-Jomart Toqaevtyń qatysýymen Ulttyq qoǵamdyq senim keńesiniń alǵashqy otyrysy boldy. Elordadaǵy Táýelsizdik saraıynda ótken jıynda Keńes músheleri búgingi qazirgi kezdegi eń ózekti máseleler týraly sóz qozǵady.
Aqorda saıytynyń habarlaýynsha, Qasym-Jomart Toqaev óz sózinde elimizdi damytýǵa jáne jańǵyrtýǵa baǵyttalǵan bastamalar men usynystardy pysyqtaý isindegi Ulttyq qoǵamdyq senim keńesiniń rólin atap ótti.
– Ulttyq keńestiń árbir múshesiniń ózindik pikiri men ustanymy bar. Bul damyǵan azamattyq qoǵam úshin qalypty jaǵdaı. Ulyqtaý rásiminde «Áralýan pikir – birtutas ult. Shyn máninde, balamasyz, bastamasyz jáne belsendiliksiz damý bolmaıdy. Osy úsh kıt ilgerileýdi qamtamasyz etedi» degen sózimdi negizge alýymyz qajet, – dedi Memleket basshysy.
Qasym-Jomart Toqaev Qazaqstannyń saıası reformalarynyń birden qaryshtap alǵa ketpeıtinin, aqylǵa salyp, birtindep júzege asyrylatynyn, damýǵa jáne jemisti jumysqa baǵyttalatynyn aıtty.
– Keıde keıbir urandar men úndeýler óte tartymdy kórinedi, biraq olardyń avtorlarynyń el aldynda eshqandaı jaýapkershiligi joq. Reforma úshin reforma – bul daǵdarysqa bastaıtyn jol ári memleketti basqarýdan aýyrylýǵa ákelip soǵady. Eshqaısymyzdyń muny qalamaıtyndyǵymyzǵa senimdimin. Damý dáıekti ári údemeli bolýy tıis. Sonda ǵana biz ózimizdiń memlekettilikti saqtaýǵa jáne nyǵaıtýǵa baǵyttalǵan azamattyq ári saıası boryshymyzdy oryndaımyz, – dedi Qazaqstan Prezıdenti.
Qasym-Jomart Toqaev memleketimiz úshin mańyzdy ári kókeıtesti máseleler jóninde biryńǵaı túsiniktiń mańyzdy ekenin aıtty, sondaı-aq óndiristerdi kóshirýge qatysty qaýesetterge túsinikteme bere otyryp, jerdiń sheteldik azamattarǵa satylmaıtynyn taǵy da atap ótti.
– Sońǵy ýaqytta jer sheteldikterge satylady eken nemese kórshi eldiń 55 eski zaýyty kóshiriledi, myńdaǵan sheteldik jumyskerler tartylady eken degen sıaqty túrli qaýeset áńgimeler tarap júr. Halqymyz mundaı dańǵaza áńgimelerge ermeýi qajet. Ózderiniń kózdegen maqsattaryna jetý úshin jurttyń patrıottyq sezimderin óz múddeleri úshin paıdalana biletin adamdar osyndaı alyp-qashpa áńgimelerdi shyǵaryp júr. Bıliktiń mindeti – qoǵammen dıalog júrgizý arqyly memlekettik saıasattyń maqsatyn túsindirý. Men jerdi eshkimge bermeıtinimizdi taǵy da aıtqym keledi, – dedi Qasym-Jomart Toqaev.
Prezıdent Qazaqstannyń halyqaralyq yntymaqtastyq, úzdik standarttar men ozyq tehnologıa úshin ashyq ekenin atap ótip, barlyq daýly máseleler konsensýs arqyly sheshiletinin aıtty.
– Qazaqstannyń qazirgi syrtqy ıdeologıasynda «halyq jaýy», «besinshi kolonna», «yqpal etý agentteri» sıaqty túsinik joq. Bul biz úshin jat nárse. Biz óz azamattarymyzdyń adaldyǵy men patrıottyǵyna nyq senemiz. Ulttyq tutastyqtyń taǵy bir negizi – damýdyń demokratıalyq úlgisine beıildilik. Biz, eń aldymen, memlekettiligimizdi nyǵaıtý mısıasyn basshylyqqa alyp, ózimizge utymdy ustanymda qalýǵa tıispiz, – dedi Memleket basshysy.
Qasym-Jomart Toqaev memleketti órkendetý úshin barlyq salany jańǵyrtý isi damýdyń strategıalyq maqsattarynyń jáne azamattyq qoǵamnyń pikirine taldaý jasaý negizinde júzege asyrylatynyn aıtty.
– Azamattyq qoǵam ókilderin ulttyq kompanıalardyń, áleýmettik-kásipkerlik korporasıalardyń, ortalyq memlekettik organdardyń baqylaý keńesterine engizý jónindegi usynysty qoldaımyn. Bul ashyq bolýǵa, sonyń ishinde, qoǵamdyq nazardan tys qalǵan kvazımemlekettik sektordyń ashyq bolýyna múmkindik beredi. Ulttyq keńestiń músheleri «Ashyq ákimdik» tájirıbesin jappaı taratýdy usynyp otyr. Shyn máninde, bizge basqarý mádenıetiniń jańa standartyna kóshý kerek. «Ashyq ákimdik» jergilikti bıliktiń qoǵam úshin qoljetimdi bolýyna múmkindik beredi, halyq pen memlekettik qyzmetshiler arasyndaǵy kedergini joıady, – dedi Memleket basshysy.
Prezıdent saıası júıeni jańǵyrtýdy jáne kiristerdiń ádil bólinýin qamtamasyz etýi tıis áleýmettik saıasatty qaıta qaraý isin jalǵastyrý qajettigin aıtty. Sonymen qatar Qasym-Jomart Toqaev Ulttyq keńestiń jumys tobynyń aıasynda Qazaqstan halqyna arnalǵan Joldaýda aıtylǵan bastamalardy egjeı-tegjeıli pysyqtaýdy usyndy.
Jıynda Ulttyq keńestiń músheleri – Rahym Oshaqbaev, Muhtar Taıjan, Aıdos Sarym, Asylbek Qojahmetov, Qazybek Isa, Saıasat Nurbek, Aıman Omarova, Ermek Tursynov, Seıdahmet Quttyqadam, Oraz Jandosov sóz sóıledi.
Sýretter akorda.kz saıtynan alyndy.
