.jpg)
Búgin elordada Ulttyq keńestiń alǵashqy kezdesýi bolyp ótti. Jıynda tek uıymdastyrýshylyq máseleler ǵana qozǵaldy, dep jazdy óziniń feısbýk paraqshasynda Ulttyq keńestiń músheleriniń biri Baqytjan Buqarbaev.
Onyń jazǵandary tómendegideı
Búgin Nur-Sultan qalasyndaǵy Táýelizdik saraıynda Ulttyq keńestiń alǵashqy kezdesýi bolyp ótti. Bul joly tek uıymdastyrýshylyq máseleler ǵana qozǵaldy, atap aıtqanda:
1. Jumysty uıymdastyrýǵa qatysty Keńes músheleriniń jalpy usynystary
2. Keńes múshelerine kýálikterdi tabystaý
3. Jumys toptaryn anyqtaý.
Prezıdent ákimshiligi basshysy Qyrymbek Kósherbaev kezdesýdi ashty, prezıdent keńesshisi Erlan Qarın reglament máselesin qozǵady. Keńes múshelerinen alǵashqy sózdi Asylbek Qojahmetov sóıledi. Ol óńirlik keńesterdiń mártebesin arttyrýdy, Keńes músheleri arasynan on adamnyń prezıdentpen kezdesip, ózekti máselelerdi jetkizip turýdy usyndy.
Muhtar Taıjan saıası, ekonomıkalyq jáne áleýmettik reformalar boıynsha úsh jumys tobyn qurýdy aıtty.
Andreı Chebotarev óńirlerge kóshpeli jıyndar jasap turýdy jáne vedomstvolardyń basshylaryn otyrystarǵa shaqyrýdy usyndy.
Talǵan Qalıev Keńes múshelerin óńirler boıynsha bekitýdi aıtty.
Jemis Turmaǵambetova búgingi kúni polısıa qyzmetkerlerin mıtıńke shyqqandarmen durys tildesý boıynsha jobany Almaty ákimdigimen pılot tártibinde júzege asyryp jatqanyn habarlady. Osy máseleni talqylaýdy usyndy.
Aıman Omarova naqty qaı topqa kirgisi keletinin áli bilmeıtinin, sheteldegi etnıkalyq qazaqtardyń, túrme reformasy jáne BAQ máselesin kótergisi keletinin habarlady.
Jánibek Qojyq Keńeske quqyqtyq mártebe berip, ol týraly arnaıy zań qabyldaýdy usyndy.
Ózime keletin bolsam, ashyqtyqty qamtamasyz etý maqsatynda Keńes otyrystaryn áleýmettik jelide tikeleı efırde kórsetý mańyzdylyǵyn kóterdim. Bul jerde ár túrli pikirler aıtylatyndyqtan, memlekettik BAQ Keńes jumysy týraly bir jaqty aqparat bermeı, jan jaqty obektıvti kórsetýin suradym. Buǵan qosa halyqqa aqparatty jedel jetkizip turý úshin Keńes múshelerine komýnıkasıa arnalaryn erkin qoldanýǵa múmkindik jasaýdy usyndym. Sózimdi: "Bizdiń de, sizdiń de ortaq múddemiz - halqymyzdyń senimin aqtaý" dep aıaqtadym.
Budan basqa da qysqa sóılegen spıkerler boldy, biraq olardyń oılaryn dáptersheme túrtip úlgermedim.
Qyrymbek Kósherbaev Keńes múdshelerine kýálikterdi tapsyryp bolǵan soń, jumys toptaryn talqylaýǵa kiristik. Nátıjesinde bastapqyda saıası, áleýmettik, ekonomıkalyq reformalar boıynsha úsh top qurylatyn boldy.
Men saıası reformalar boıynsha jumys tobyna kirdim. Menen basqa osy topqa Danıar Áshimbaev, Rasýl Jumaly, Talǵat Qalıev, Asylbek Qojahmetov, Seıdahmet Quttyqadam, Aıman Omarova, Asqat Sadyrbaı, Erlan Saırov, Aıdos Sarym, Maksım Spotkaı, Jemis Turmaǵambetova, Marat Shıbýtov, Arman Shoraev, Andreı Chebotarev kirdi.
Keńestiń prezıdent Toqaevtyń qatysýymen ótetin alǵashqy otyrysy qyrkúıektiń altysynda bolady. Reglament boıynsha ár toptan eki adam sóıleıdi dep sheshtik. Bizdiń toptan Marat Shıbýtov pen Asylbek Qojahmetov sóıleıtin boldy.
Jumys tobynyń búgingi qorytyndysy boıynsha 3 qyrkúıekke deıin kelesi baǵyttar boıynsha ózara usynystar jasaımyz dep sheshtik:
- Saılaý týraly
- Partıalar týraly
- Jergilikti ózin-ózi basqarý týraly
- BAQ týraly
- jıyndar bostandyǵy týraly zańdarǵa ózgeris engizý
- jáne sot-quqyqtyq reforma boıynsha usynystar ázirlenedi.
Top sheńberinde kelesi ózara kezdesýimizdi 5 qyrkúıekke belgiledik.
Sýret Baqytjan Buqarbaevtyń paraqshasynan alyndy.
