2 kún buryn Mańǵystaý oblysynyń prokýratýrasy «Kaspıı» fýtbol klýbynda oqý-jattyǵý jıyndaryna bólingen 27 mln teńgeden astam qarajat urlanǵanyn anyqtady.
Bas prokýratýranyń málimetinshe, oblystyń sybaılas jemqorlyqqa qarsy qyzmeti UQKD-men birlesip, osy faktini tergeý barysynda klýbtyń burynǵy basshysy óziniń 2 tanysymen birge, kúsh qoldaný arqyly klýbtyń qyzmetkerin aıǵaqtardy ózgertýge májbúrlegeni belgili bolǵan.
«15 mln teńge qorqytyp alýǵa árekettengen. Osy jyldyń 3 jeltoqsanynda fýtbol klýbynyń eks-basshysyn, «K» jáne «O» azamattaryn qamaýǵa alýǵa sanksıa berildi», delingen habarlamada.
Byltyr jeltoqsan aıynda Mańǵystaý oblysynyń mamandandyrylǵan aýdanaralyq ekonomıkalyq soty «Kaspıı» fýtbol klýbynyń sportshylardyń oqý-jattyǵý jıynyn uıymdastyrǵan kompanıaǵa qaryzy joq degen sheshim shyǵarǵan edi.
Sýdıanyń aıtýynsha, túrik kompanıasy Aqtaý komandasyna oqý-jattyǵý jıynyn uıymdastyrmas buryn memlekettik satyp alýǵa qatysý kerek edi.
«Sonymen qatar, sotqa «Kaspıı» fýtbol klýby janyndaǵy MKQK basshysynyń mindetin atqarýshy Erjan Djambırov tapsyrys berýshi retinde Túrkıa Respýblıkasynyń Antalıa qalasynda qandaı jaǵdaıda jáne qandaı negizde shart jasasqany belgisiz. Túrkıalyq kompanıa sot otyrysyna qatysýdan bas tartqandyqtan talap qanaǵattandyrýsyz qaldy», – dep málimdedi Mańǵystaý oblysynyń mamandandyrylǵan aýdanaralyq ekonomıkalyq soty.
Budan bólek bıyl jyl basynda, naqtylap aıtqanda qańtar aıynda Arena Sports & Travel agenttigi apelásıalyq shaǵym túsirip, FIFA men ÝEFA-ǵa shaǵymdanyp, «Kaspıı» fýtbol klýbyna qarsy sanksıa engizemin dep qorqytty. Sáýir aıynda apelásıalyq sot birinshi satydaǵy sot sheshimin buzyp, túrik kompanıasynyń shaǵymyn ishinara qanaǵattandyrdy.
«Mańǵystaý oblysynyń dene shynyqtyrý jáne sport basqarmasynyń «Kaspıı» fýtbol klýby" RMK-daǵy memlekettik komýnaldyq kásipornynan ARENA HALKLA ILISKILER ENERJI ORG.TEKS.VE TIC.LTD.STL JSHS paıdasyna 230 521 eýro qaryz jáne 1000 eýro kóleminde aıyppul óndirilsin. Sondaı-aq sottyń shyǵyny retinde memleketke 3 384 813 teńge kóleminde ótemaqy jáne ókildiń kómegi úshin 3 900 000 teńge tóleýi kerek», – delingen habarlamada.
Bul rette «Kaspıı» fýtbol klýby Joǵarǵy sotqa shaǵym túsirgen. Alaıda kasasıalyq alqa fýtbol klýby ótinishti keshiktirgenin aıtyp, ony keri qaıtarý týraly sheshim qabyldady.
Jalpy aıtatyn bolsaq Túrkıadaǵy oqý-jattyǵý jıyny aqtaýlyq fýtbolshylarǵa esh nátıje bergen joq. 2023 jyly «Kaspıı» fýtbol klýby Qazaqstan chempıonatynyń týrnırlik kestesinde sońǵy oryndy ıelenip, Qazaqstan premer-lıgasynan túsip qaldy.
Bul shýly oqıǵaǵa belgili mańǵystaýlyq bloger Azamat Sársenbaev óziniń áleýmettik jelidegi paraqshasynda pikir bildirdi.
