Qazaqstan Prezıdenti Qasym-Jomart Toqaev birqatar memlekettiń elshilerinen senim gramotalaryn qabyldady, dep habarlaıdy Aqorda.
Aqorda rezıdensıasynda birqatar memlekettiń jańadan taǵaıyndalǵan tótenshe jáne ókiletti elshileriniń Qazaqstan Prezıdentine senim gramotalaryn saltanatty túrde tapsyrý rásimi ótti.
Memleket basshysyna Túrkıa Respýblıkasynyń elshisi Ýfýk Ekıdjı, Bolgarıa Respýblıkasynyń elshisi Boıan Hadjıev, Saýd Arabıasy Koróldiginiń elshisi Abdýlazız Abdýlla Ál-Daýd senim gramotalaryn tabys etti.
Memleket basshysy sheteldik elshilerdi Qazaqstandaǵy dıplomatıalyq jumystarynyń resmı bastalýymen quttyqtap, olardyń izgi mısıalaryna tabys tiledi.
Saltanatty shara barysynda Prezıdent árbir elshimen jeke-jeke sóılesti.
Qasym-Jomart Toqaev Ýfýk Ekıdjımen áńgimelesý barysynda Qazaqstan men Túrkıa arasyndaǵy qarym-qatynastardyń strategıalyq sıpatyn atap ótip, ekijaqty seriktestiktiń odan ári nyǵaıa túsetinine senim bildirdi. Prezıdent Túrkıa basshylyǵynyń Elbasy Nursultan Nazarbaevqa Túrki keńesiniń Qurmetti tóraǵasy mártebesin berý jónindegi bastamasyna, sondaı-aq, baýyrlas eldiń «Astana prosesine» belsendi qatysqany úshin rızashylyq bildirdi.
«Osy sátti paıdalana otyryp, áriptesim Prezıdent Erdoǵanǵa júrekjardy sálemimdi joldaımyn. Biz onyń bıylǵy sáýir aıynda Qazaqstanǵa jasaıtyn resmı saparyn asyǵa kútemiz», – dedi Qasym-Jomart Toqaev.
Qazaqstan Prezıdenti Boıan Hadjıevten senim gramotasyn qabyldaý kezinde Bolgarıamen aradaǵy yqpaldastyqtyń dostyq sıpatyn atap ótti. Memleket basshysy Nú-Iorkte ótken BUU Bas Assambleıasy 74-sessıasynyń alańynda Prezıdent Rýmen Radevpen jáne Bolgarıanyń Vıse-prezıdenti Ilıana Iotovamen Nur-Sultan qalasynda kezdeskenin aıtty.
«Osy kóktemde Bolgarıa Prezıdentiniń Qazaqstanǵa saparyn asyǵa kútemiz. Onyń sapary tabysty bolatynyna jáne eki el arasyndaǵy yntymaqtastyqtyń damýyna tyń serpin beretinine senimdimin», – dedi Memleket basshysy.
Qasym-Jomart Toqaev Abdýlazız Abdýlla Ál-Daýdpen áńgimelesý kezinde ekijaqty qatynastardyń qazirgi deńgeıi men mán-mańyzyn joǵary baǵalap, ınvestısıalyq baılanystardyń nyǵaıyp kele jatqanyn, munaı-gaz, hımıa, atom jáne jańartylǵan energıa kózderin paıdalaný salalaryndaǵy yntymaqtastyqtyń áleýeti zor ekenin erekshe atap ótti.
«Biz Saýd Arabıasynyń Taq murageri Muhammed ben Salmandy Qazaqstanǵa sapar jasaıdy dep kútemiz. Eger ol saparmen bıyl kelse, óte jaqsy bolar edi», – dedi Qazaqstan Prezıdenti.
