Búgin Túrki tildes memleketter yntymaqtastyq keńesiniń (Túrki keńesi) Bas
hatshysy Baǵdat Ámireev pen Syrtqy ister mınıstri Beıbit Atamqulov
kezdesip, Túrki yntymaqtastyq uıymdaryn reformalaý máselelerin
talqylady. Túrki keńesiniń delegasıasy Qazaqstanǵa uıymǵa múshe
memleketterdiń keden qyzmetteri basshylarynyń otyrysyna qatysý úshin
jumys saparmen kelgen. Bul týraly Syrtqy ister mınıstrliginiń baspasóz
qyzmeti habarlady.
Sholpan-Ata qalasynda ótken Túrki keńesiniń 6-shy samıti barysynda
Qazaqstan Respýblıkasynyń Prezıdenti Nursultan Nazarbaev Túrki
yntymaqtastyq uıymdaryn qurylymdyq reformalaý prosesine
bastamashylyq etti.
«Túrki tildes memleketterdiń yntymaqtastyq keńesi - qazirgi zamanda róli
aıtarlyqtaı artyp kele jatqan biregeı halyqaralyq uıym. Uıymnyń
barlyq músheleri úshin Túrki keńesiniń bedeli men áleýetin odan ári nyǵaıtý
óte mańyzdy. Sondyqtan Qazaqstan Túrkitildes ıntegrasıanyń qazirgi
ınstıtýttaryn ońtaılandyrý jáne qyzmetterin qaıta formattaý men
ortalyqtandyrý boıynsha nátıjeli jumysqa úmittenedi», - dep atap ótti
Mınıstr.
Óz kezeginde B. Ámireev naýryz aıynyń basynda Abý-Dabıde ótken Islam
Yntymaqtastyǵy Uıymy (IYU) syrtqy ister mınıstrleriniń 46-shy
sesıasy barysynda Túrki keńesiniń IYU janyndaǵy baqylaýshy
mártebesin alýyna jan-jaqty qoldaý kórsetkeni úshin Qazaqstan SİM
basshysyna alǵysyn bildirdi.
Túrki Keńesiniń Bas hatshysy Keńeske múshe memleket basshylarynyń
ýaǵdalastyqtary men tapsyrmalaryn iske asyrý barysy týraly habardar
etti. Ol Hatshylyqtyń uıymdy reformalaý máselesi boıynsha múshe-
memleketterdiń astanalarynda belsendi konsýltasıalar júrgizetinin
habarlady. Sonymen qatar, jýyrda bul másele jóninde Aǵa laýazymdy
tulǵalar komıtetiniń kezekti otyrysy ótedi.
Bas hatshy Túrki keńes memleketteri basshylarynyń Ázerbaıjandaǵy
samıtine, Ózbekstandaǵy túrki memleketteriniń bıznes-forýmyna, sondaı-
aq salalyq mınıstrlikter men vedomstvolardyń basshylary deńgeıindegi
birqatar kezdesýlerge daıyndyq barysy týraly áńgimeledi.
Suhbattasýshylar mádenı-gýmanıtarlyq jobalardy júzege asyrý, baspa
jáne muraǵat qyzmeti týraly pikir almasty.