Qyrǵyz Respýbýlıkasynyń Prezıdenti Sooranbaı Jeenbekov Túrki Keńesiniń Bas hatshysy Baǵdat Ámireevti qabyldady. Bul týraly Qyrǵyz respýblıkasy prezıdentiniń baspasóz qyzmeti habarlady.
Qyrǵyz prezıdenti aldymen Baǵdat Qultaıulyn qazirgi qyzmetine taǵaıyndalýymen quttyqtap, tabys tiledi. Sosyn Sooranbaı Jeenbekov Qyrǵyz eli Túrki Keńesine tóraǵalyq kezinde jaqsy bastamalarǵa sebep bolatyn mańyzdy sharalar ótkizýge nıetti ekenin atap ótti. Ekonomıkalyq áriptestikke basymdyq berilse degen oıyn ashyq jetkizdi. «Túrki Keńesine múshe elder arasynda saýda-ekonomıkalyq yntymaqtastyqty damytýǵa baǵyttalǵan sharalardy uıymdastyrý qajet, bıznes-forýmdar ótkizý múmkindigin qarastyrý kerek»,-degen usynysyn bildirdi. Al óz kezeginde Túrki Keńesiniń Bas hatshysy byltyr jazda Túrki Keńesi basshylary samıti qyrǵyzdardyń tóraǵalyǵymen joǵary deńgeıde ótkenine aıryqsha toqtaldy. Sosyn «Túrki Keńesine Qyrǵyz Respýblıkasynyń tóraǵalyǵy kezinde baýyrlas memleketter arasyndaǵy baılanystar budan da joǵary deńgeıge kóterilerine senimdimin»,-dedi. Túrki Keńesiniń Bas hatshysy Baǵdat Ámireev sondaı-aq Qyrǵyzstanǵa resmı sapary barysynda budan ózge de mańyzdy tulǵalarmen keleli kezdesýler men keńester ótkizip, memlekettik aqparat quraldaryna suhbat berdi. Qyrǵyz Respýbýlıkasynyń Prezıdenti Sooranbaı Jeenbekov sonymen qatar, atalǵan kúni Túrkitildes elder Parlamenttik Assambleıasynyń Bas hatshysy Altynbek Mamaıýsýpovty ta qabyldaǵanyn aıta ketken jón.
Sýretter: Qyrǵyz Respýblıkasy Prezıdentiniń resmı saıtynan alyndy
