Qazaqstan Respýblıkasy Prezıdenti Qasym-Jomart Toqaevtyń qarasha aıynda Qyrǵyz Respýblıkasyna memlekettik sapar jasaýy josparlanǵan. Sonyń qarsańynda ótken Syrtqy ister mınıstrlikteri arasyndaǵy konsýltasıalar taraptarǵa ózekti máseleler boıynsha áreketterdi sáıkestendirýge jáne  odan arǵy ózara is-qımyl perspektıvalaryn josparlaýǵa múmkindik berdi.  

Elimizdiń syrtqy ister vedomstvasy baspasóz qyzmetiniń habarlaýynsha, Qazaqstan-Qyrǵyz Syrtqy ister mınıstrlikteri arasyndaǵy konsýltasıa Bishkek qalasynda ótken. Oǵan Qazaqstan Respýblıkasy Syrtqy ister mınıstriniń orynbasary Marat Syzdyqov pen Qyrǵyz Respýblıkasynyń Syrtqy ister mınıstriniń birinshi orynbasary Nýran Nıazalıev deńgeıinde jáne taraptardyń jaýapty memlekettik organdar ókilderi qatysqan. 

Konsýltasıalar barysynda saıası, saýda-ekonomıkalyq, sý-energetıkalyq jáne mádenı-gýmanıtarlyq salalardaǵy ekijaqty yntymaqtastyq, sondaı-aq eki el arasynda týrızmdi damytý boıynsha ózekti máseleler keńinen talqylandy.

Sonymen qatar, taraptar joǵary jáne bıik deńgeılerde, onyń ishinde parlamentaralyq yntymaqtastyq sheńberinde bolatyn aldaǵy kezdesýler men saparlardyń kúntizbelik josparyn qarastyryp, halyqaralyq jáne óńirlik uıymdar sheńberinde ózara is-qımyl máseleleri jóninde pikir almasqan.  

Kelissózder qorytyndysy boıynsha taraptar dostyq jáne tatý kórshilik, odaqtastyq jáne strategıalyq seriktestik rýhynda ózara tıimdi yntymaqtastyqty jalǵastyrý týraly ýaǵdalasqan.

Sýretter mfa.gov.kz saıtynan alyndy.