Memleket basshysy Soltústik Qazaqstan oblysynyń evakýasıalanǵan turǵyndarymen kezdesti, dep habarlaıdy Aqorda.
Prezıdent Qasym-Jomart Toqaev Soltústik Qazaqstan oblysynyń sý basqan aýmaǵyn tikushaqpen aralap kórgennen keıin qarǵyn sý saldarynan evakýasıalanǵan aýdandardyń halqymen kezdesti.
Turǵyndarmen áńgimelesý barysynda Qasym-Jomart Toqaev shyǵyndardy óteý úshin memleket barlyq tıisti sharany qabyldaıtynyn aıtty. Qazirgi ýaqytta sý tasqynynan zardap shekken barlyq turǵynǵa birrettik kómek berilip jatyr jáne komısıa múlik shyǵyndaryn eseptegennen keıin ótemaqy tólenedi. Turǵyn úıi jaramsyz azamattarǵa jańa baspana salynady jáne barlyq qajetti ınfraqurylymmen qamtamasyz etiledi. Sonymen qatar zardap shekken turǵyndardyń nesıeleri men zaımdaryn tóleý merzimi shegeriledi.
Memleket basshysy eshbir azamat nazardan tys qalmaıtynyn atap ótti.
– Qazir bárimiz óte kúrdeli kezeńdi bastan keship jatyrmyz. Bul – jalpyulttyq apat. Degenmen, bir jaǵynan alyp qarasaq, oń ózgerister de anyq baıqalady. Sýdyń beti qaıtyp keledi. Jaqyn aradaǵy 10 kúnde óte qaýipti bolady dep oılaımyn. Biraq biz elimiz boıynsha apat saldaryn joıý sharalaryn qabyldap jatyrmyz. Buǵan deıin aıtqanymdaı, Úkimet zardap shekken azamattardyń barlyǵyna qoldaý kórsetedi. Biz sý tasqyny saldarynan bolǵan barlyq shyǵyndy óteımiz. Árbir azamat, árbir otbasy memlekettiń qamqorlyǵynda bolady. Bul – men úshin basty mindet, – dedi Qasym-Jomart Toqaev.
Memleket basshysy elimizdiń birqatar óńirindegi sý tasqynyna baılanysty qalyptasqan kúrdeli jaǵdaıdy eskere otyryp, sondaı-aq búdjet qarjysyn únemdeý maqsatynda Úkimetke, ortalyq memlekettik jáne jergilikti atqarýshy organdarǵa ımıjdik jáne basqa da iri is-sharalardy ótkizbeý jóninde tapsyrma berdi.
– Men búdjet qarjysyn únemdeý maqsatynda iri halyqaralyq forýmdy ótkizýden bas tarttym. Sonymen qatar Dúnıejúzilik kóshpendiler oıyndaryna jumsalatyn shyǵyndy qysqartamyz. Árıne, qazir bul sharadan túpkilikti bas tartý múmkin emes. Biraq oǵan jumsalatyn qarjy kólemi aıtarlyqtaı azaıady. Budan bólek, elimizdiń Tokıoda ótetin Dúnıejúzilik kórmege qatysýyna bólingen búdjet te qysqarady, – dedi Prezıdent.
Qasym-Jomart Toqaev barlyq memlekettik organǵa sý tasqyny saldarynan sabaq alýy kerek ekenin aıtty.
– Bizde mundaı apattardy aldyn ala eskertý júıesi jetispeıdi. Qajetti mamandar da tapshy. Qazir gıdrotehnık kadrlardy daıarlaý týraly shuǵyl sheshim qabyldandy, – dedi Memleket basshysy.
