Búgin Memleket basshysy Qasym-Jomart Toqaev Qazaqstanǵa resmı saparmen kelgen Qyrǵyzstan Prezıdenti Sadyr Japarovty Aqordada kútip aldy. Bul týraly Kazinform habarlady.
Kórshi el Prezıdentiniń saparyna oraı saltanatty rásimder zalynda Qurmet qaraýyly sap túzep, onyń bastyǵy Memleket basshysy men mártebeli meımanǵa raport berdi. Osydan keıin Prezıdent orkestri eki eldiń ánuranyn oryndady.
Qasym-Jomart Toqaev pen Sadyr Japarov bir-birine resmı delegasıa múshelerin tanystyrdy.
Budan ári mártebeli meıman men Qasym-Jomart Toqaev kilemshe boıymen Qazaqstan Respýblıkasynyń Memlekettik týyna qaraı júrdi.
Onyń aldyna kelgende Sadyr Japarov toqtap, basyn sál ıip, iltıpatyn bildirdi.
Saltanatty rásimnen keıin Qazaqstan men Qyrǵyzstan prezıdentteri shaǵyn quramdaǵy kezdesýge ótti.
Sapar aıasynda búgin joǵary deńgeıde ekijaqty kelissóz júrgiziledi jáne birqatar mańyzdy qujatqa qol qoıylady dep josparlanyp otyr.
Eske salsaq, keshe Qyrǵyzstan Prezıdenti Sadyr Japarov Qazaqstanǵa resmı saparmen keldi. Ony QR Prezıdenti elorda áýejaıynda kútip aldy.
