Aqorda rezıdensıasynda 7 memlekettiń tótenshe jáne ókiletti elshileriniń Qazaqstan Prezıdentine senim gramotalaryn tapsyrý rásimi ótti. Bul týraly Aqorda habarlady.
Senim gramotalaryn Mońǵolıa elshisi Dorj Baıarhýý, Grekıa elshisi Eftalıa Kakıopýlý, Indonezıa elshisi Mohamad Fadjrýl Rahman, Marokko elshisi Mýhammed Rashıd Maanıný, Kanada elshisi Alan Ýılfred Hemson, Izraıl elshisi Edvın Natan Iabo Glýsman, Majarstan elshisi Otto Ivan Rona tapsyrdy.
Qasym-Jomart Toqaev elshilerdi Qazaqstandaǵy dıplomatıalyq mısıalarynyń resmı bastalýymen quttyqtap, elimizdegi ıgi mindetterin oryndaý barysynda olarǵa Prezıdent Ákimshiligi men Qazaqstan Úkimeti tarapy jan-jaqty qoldaý kórsetetinin jáne kómektesetinin aıtty.
Memleket basshysy 2022 jyldyń tarıhı data, ıaǵnı Qazaqstan men olardyń elderi arasyndaǵy dıplomatıalyq qatynastardyń 30 jyldyǵy ekenin atap ótti.
– Osy jyldar ishinde biz barlyq sala boıynsha jan-jaqty seriktestik pen ózara tıimdi yntymaqtastyqty jolǵa qoıdyq. Bul baǵyt turaqty saıası dıalogty, qarqyndy ekonomıkalyq yqpaldastyqty jáne belsendi gýmanıtarlyq baılanystardy qamtıdy. Eń bastysy, bizdiń qarym-qatynasymyz myzǵymas dostyqqa, ortaq qundylyqtarǵa jáne ózara qoldaý kórsetýge negizdelgen, – dedi Prezıdent.
Memleket basshysynyń pikirinshe, bul bıylǵy jyldyń alǵashqy kúnderi ishki jáne syrtqy destrýktıvti kúshter Qazaqstanǵa aýyr ári qatygezdikpen shabýyl jasaǵanda anyq kórindi. Qasym-Jomart Toqaev qazaqstandyqtardyń tabandylyǵy men ujymdyq parasattylyǵynyń arqasynda memlekettik tóńkeris jasaýshylarǵa toıtarys berilgenin, al búlikshiler men buzaqylardyń jaýapqa tartylǵanyn jetkizdi.
– «Qańtar oqıǵasynan» keıin men kek alýǵa nemese jikshildik jasaýǵa umtylmaımyn. El Prezıdenti retinde Qazaqstan azamattarynyń jikke bólinýin emes, birigýin asa mańyzdy basymdyq sanaımyn. Sondyqtan Jańa Qazaqstan tujyrymdamasyn usyndym. Bul qujat etnosaralyq kelisim men kópvektorly syrtqy saıasat sıaqty aıqyn jetistikterimizden bas tartpaı, ótken kezeńde jiberilgen ádiletsizdikterden qutylýǵa negizdelgen. Meniń jasampaz jurtym bul synaqtan burynǵydan da kúshti, berekeli, bolashaǵynan úmit kútetin jáne óz memlekettiligin, egemendigin jáne aýmaqtyq tutastyǵyn saqtaýǵa belin bekem býǵan halyq bolyp shyǵady, – dedi Qasym-Jomart Toqaev.
Qazaqstan Prezıdenti halyqaralyq seriktesterin elimiz bastan ótkerip otyrǵan osyndaı syn saǵatta Qazaqstanǵa degen berik yntymaqtastyǵyn tanytýǵa shaqyrdy.
– Meniń Ákimshiligim óz tarapynan aýqymdy saıası jáne ekonomıkalyq reformalardy júzege asyrady, ınvestısıalyq kelisim-sharttarǵa qol suǵylmaýyn qamtamasyz etedi jáne sybaılas jemqorlyqpen toqtaýsyz kúresedi. Sizderdi pandemıadan keıingi kezeńde ózderińizdiń dıplomatıalyq jáne saıası mol tájirıbelerińizdi ekijaqty qatynastarymyzdy jańa bıikke kóterý úshin paıdalanýǵa shaqyramyn. Qazaqstan sizderdiń memleketterińizben aradaǵy ekijaqty jáne kópjaqty baılanystardy odan ári jan-jaqty nyǵaıtýǵa daıyn, – dedi Memleket basshysy.
Prezıdent Mońǵolıa elshisine eki memlekettiń tarıhı jaqyndyǵy jóninde aıtyp, Monǵolıa men Qazaqstannyń Shyǵys Azıadaǵy mańyzdy seriktesiniń biri ekenine nazar aýdardy.
– Jaqyn kórshi bolǵandyqtan jáne ortaq qundylyqtarymyzǵa mán bere otyryp, ózara yqpaldastyqty, ásirese saýda-ekonomıkalyq salada keńeıtýge zor múmkindik bar ekenin aıtqym keledi. Budan bólek azamattarymyzdyń arasyndaǵy qatynastar da mańyzdy ról atqarady. Mońǵolıada turatyn júz myńnan astam etnıkalyq qazaq –halyqtarymyz arasyndaǵy dostyqtyń altyn kópiri, – dedi Qasym-Jomart Toqaev.
Memleket basshysy Grekıamen aradaǵy yntymaqtastyqtyń udaıy keńeıip kele jatqanyn atap ótip, bul el Qazaqstannyń Eýropa Odaǵyndaǵy jáne Jerorta teńizi aýmaǵyndaǵy mańyzdy seriktesi ekenine toqtaldy.
– Qazaqstandaǵy on myńdaǵan grek dıasporasy bizdiń halyqtarymyz arasyndaǵy máńgilik dostyq pen ózara tıimdi is-qımyldyń sımvoly sanalady. Biz, ásirese aýyl sharýashylyǵy, týrızm jáne qurylys salalaryndaǵy jańa múmkindikterdi paıdalanamyz dep úmittenemin, – dedi Prezıdent.
Memleket basshysy Indonezıamen tyǵyz qarym-qatynasty damytý Qazaqstannyń Ontústik-SHyǵys Azıadaǵy syrtqy saıasatynyń ajyramas bóligi ekenin aıtty.
– Biz ekijaqty jáne kópjaqty negizde ortaq múddeleri bar seriktespiz. Eýrazıalyq ekonomıkalyq odaqqa múshe bolýymen qatar «Bir beldeý, bir jol» bastamasyndaǵy Qazaqstannyń negizgi róli ASEAN elderimen, sonyń ishinde Indonezıamen yntymaqtastyqty nyǵaıtý úshin jańa múmkindikterge jol ashady, – dedi Prezıdent.
Memleket basshysy Marokkomen qarym-qatynastar týraly aıta kele, bul elmen aradaǵy yntymaqtastyqty damytý Qazaqstannyń Batys Afrıkadaǵy startegıalyq basym baǵyttarynyń biri ekenin atap ótti.
– Biz ınvestısıalyq bastamalardy júzege asyrý jáne ekijaqty saýda-sattyqty keńeıtý úshin Marokkomen ózara kúsh biriktirýge daıynbyz, – dedi Prezıdent.
Qasym-Jomart Toqaev Kanadanyń Batys jarty shardaǵy Qazaqstannyń senimdi ári jaqyn seriktesi ekenine erekshe toqtalyp, saýda-ekonomıkalyq, ınvestısıalyq salalardaǵy, óńirlik jáne halyqaralyq qaýipsizdikti, zań ústemdigi men adam quqyqtaryn qamtamasyz etý isindegi tabysty yntymaqtastyqty atap ótti.
– Qazaqstan men Kanada – halqy az bolǵanymen, iri memleketter. Bizdiń ulttyq baılanystardy damytý jáne óńirlik teńgerimdilikti qamtamasyz etý jónindegi mindetterimiz ortaq. Men taý-ken óndirý jáne aýyr ónerkásip, aýyl sharýashylyǵy men jańartylatyn energıa kózderi, ınfraqurylym jáne aqyldy qalalar, aqparattyq tehnologıalar men aeroǵarysh salalarynda kóptegen múmkindikter bar ekenin bilemin, – dedi Prezıdent.
Qazaqstan Prezıdenti Izraıl elshisine eki eldiń berik adamı baılanystarǵa, jan-jaqty yntymaqtastyqqa, ortaq qunydylyqtar men ózara múddelerge negizdelgen jaqsy qarym-qatynastardy turaqty saqtap kele jatqanyn atap ótti.
– Barlyq deńgeıdegi qarqyndy is-qımyldar, sonyń ishinde Saýda-ekonomıkalyq yntymaqtastyq jónindegi úkimetaralyq komısıadaǵy yqpaldastyq, seriktestigimizge jańa múmkindikter ashyp, ózara ıgilimizge qyzmet etedi. Qazaqstan sizdiń elmen aradaǵy jan-jaqty qarym-qatynastardy odan ári keńeıtýge, ásirese bilim berý, ónerkásiptik óndiris, joǵary tehnologıalar jáne basqa da salalardaǵy baılanystardy nyǵaıtýǵa nıetti, – dedi Memleket basshysy.
Qasym-Jomart Toqaev Majarstanmen arada berik tarıhı-mádenı baılanystarǵa, sondaı-aq ortaq qundylyqtar men múddelerge negizdelgen shynaıy strategıalyq seriktestiktiń ornaǵanyn rızashylyqpen atap ótti.
– Bizdiń elderimiz qarqyndy damyp kele jatqan eki naryqtyń ortasynda óte tıimdi ornalasqan. Atap aıtqanda, aýmaǵymyz bir jaǵynan, Eýrazıa aımaǵyn, ekinshi jaǵynan Eýropa odaǵyn qamtıdy. Munyń bizge paıdasy zor. Osynyń arqasynda bizdiń kásiporyndarymyzǵa ártúrli sala boıynsha yntymaqtastyq ornatý úshin mol múmkindikterge jol ashylady. Búginde energetıka, kólik jáne logıstıka, farmasevtıka jáne tamaq ónerkásibi salalarynda jemisti qarym-qatynas jasap kelemiz. Biz aýyl sharýashylyǵy, «jasyl» ekonomıka, atom energetıkasy, ornyqty ónerkásip, sıfrlandyrý jáne qarjy salalaryndaǵy baılanystarymyzdy keńeıtýge nıettimiz, – dedi Memleket basshysy.
Jıyn sońynda Qazaqstan Prezıdenti dıplomattarǵa tabys tilep, olardyń memleketteriniń basshylaryna júrekjardy sálemin joldady.